Osẹnobulua Da Dọnmhẹn Urẹọbhọ Ọsi Ebraham

Ebraham da man ọmọn nọnsọle nin Aizik nin ọle hoẹmhọn Jehova yẹ rẹọbhi ive rebhe nesọle. Ẹghe nin Aizik rẹ ha ribhi ebe sẹbhi ikpe 25, Jehova da taman Ebraham nin ọle lu emhin nọn bha lẹkhẹ nan rẹ lu. Be bhọ hi ọne emhin?

Osẹnobulua da taman Ebraham yọle: ‘Huẹan, re ukpọmọn ọkpa nọnsẹ rẹ lu izọese bhi uke oke nọn ribhi Moraya.’ Arẹmiẹn Ebraham bha lẹn ebezẹle nin Jehova da yọle nin ọle dọ lu iriọ, ọle da sẹyẹ lu ebi Jehova taman ọlẹn nin ọle lu.

Bhi ọsewewiẹ bhi ukpẹdẹ nọn rẹkhan ọlẹn, Ebraham da re Aizik bi eva bhi eguọmhandia nesọle ha khian Moraya. Ele ki gbe ikpẹdẹ ea bhi uwedẹ, ele da ha daghe ọne oke bhi odalo. Ebraham da ki taman eguọmhandia nesọle nin ele mundia, nin ọle bi Aizik dọ lu ọne izọese. Ebraham da mun ene eran nan ha rẹ fie eranlẹn nin Aizik, ọle da re ọghale mhọn. Aizik da ki nọọn aba ọle yọle: ‘Ọne elanmhẹn bho nin mhan ha rẹ lu izọese?’ Ebraham da wanniẹn ọlẹn yọle: ‘Ọmọn nọnsẹmhẹn, Jehova dẹ rẹ re.’

Ele ki sẹbhi ọne oke, ele da bọn ukhuo-izọese. Ebraham da gbanọ Aiziki obọ bi oẹ, yẹ mun ọlẹn ọbhi ọne ukhuo-izọese.

Ebraham ki wo re ọne ọghale okhun, ẹhi nọnsi Jehova da na okhun sotie ọle yọle: ‘Ebraham, hẹi kuan ọne ọmọn! Mẹn ki lẹn nian ghe uwẹ mhọn urẹọbhọ da Osẹnobulua, ranmhude uwẹ muegbe nin uwẹ rẹ re ọmọn nọnsẹ rẹ zọese.’ Bhi ọne ẹghe nan, Ebraham da daghe ohuan nin emhin mun ọlẹn ikhuan mhọn bhi ẹwẹ. Ọle da re ẹjẹje tan Aizik a yẹ re ọne ohuan zọese.

Rẹ na ọne ẹdẹ nin rẹ ha khian, Jehova da ha tie Ebraham ọmọẹ ọle. Uwẹ be lẹn ebezẹle? Ranmhude Ebraham wo ha lu emhin rebhe nin Jehova yọle nin ọle lu aharẹmiẹn ọle bha lẹn ebezẹle nin Jehova da yọle nin ọle lu ọle.

Jehova da kie ve ọne ive nin ọle ka ve nin Ebraham. Ọle da yọle: ‘Mẹn dẹ nan erọnmhọn nin uwẹ, sẹyẹ, mẹn dẹ lu ọle nin imọn nesẹ manman bunbun.’ Ebi ọnan mundia nan hi, rẹ na obọ azagba-uwa ọsi Ebraham, ọle Jehova ha rẹ nan erọnmhọn nin ọrebhe ne lu emhin esili.