Baibo Dẹ Be Sabọ Rẹkpa Ọria Nọn Guanọ Nin Ọle Yu?
Ewanniẹn nin Baibo re ọbhọ
Ehe! Obọ “Osẹnobulua nọn re ikoudure nin ẹbho nin ahu fo ele bhọ”, ọle Baibo na vae. (2 Corinthians 7:6) Arẹmiẹn ghe ọ iyi ebi ẹrere nọnsẹmhan rẹ wẹnna yẹ Baibo tẹmhọnlẹn, ọ wo sẹ manman rẹkpa ẹbho ne bunbun ne ria ẹmhọn ebi ele ha rẹ gbe egbe ele a yẹ rẹ rẹban iria eria nọn sẹriọ. Adia nọn ribhi ẹkẹ ọle dẹ yẹ sabọ rẹkpa uwẹ.
Baibo be taman mhan ẹmhọn ẹbho ne ha guanọ nin ele gbe egbe ele a?
Ulọnlẹn kẹkẹ nela bhi Baibo ha sabọ rẹkpa uwẹ rẹ rẹban ọne iria eria nin uwẹ rẹ gbe egbe uwẹ a?
Ahamiẹn mẹn ka ha guanọ nin mẹn gbe egbe mẹn an bhi ẹghe nọn gbera kii?
Adia nela ribhi ẹkẹ Baibo nọn ha sabọ rẹkpa mẹn?
● Taman ọria ebi emhin dia uwẹ yẹ bhi egbe.
Ebi Baibo tale: “Ọmọẹ ọsaje re oyẹẹ man ẹghe rebhe. Obhio ọle yẹ khin bhi ẹghe ọnọghọ.”—Proverbs 17:17.
Ebi a re ọle ta: Ọkhẹke nin mhan guanọ urẹkpa bhi obọ ẹbho sade iria eria ne imhẹn kpokpo mhan bhi ọkhọle.
Ahamiẹn uwẹ bha taman ọria ẹmhọn iria eria ne imhẹn nin uwẹ ria ẹmhọnlen, ọ ida lẹkhẹ nin uwẹ rẹ sabọ ziẹngbe ọle. Ọkpakinọn, uwẹ ha taman ọria ebi emhin dia uwẹ yẹ bhi egbe, uwẹ ki sabọ dọ ha ziẹngbe ọne ọnọghọ nin uwẹ ye, sẹye, uwẹ ki rẹ ẹlo nọn kheke ha ghe ọle.
Dọnmhẹn ọnan fẹghe: Ne ọria talọ ẹlẹnan, ọ ha rẹ ha yi ọria bhi azagba-uwa nọnsẹ, la ọmọẹ nin uwẹ gba ẹkẹ ọle. Uwẹ dẹ yẹ sabọ gbẹn ebi emhin dia uwẹ yẹ bhi egbe ọbhi otọ.
● Dọ guanọ urẹkpa bhi eji a da gbẹloghe egbe.
Ebi Baibo tale: “Eria nin egbe bha daan, ele guanọ idọkitọ, ọ iyi eria nin egbe daanlẹn.”—Matthew 9:12.
Ebi a re ọle ta: Okhẹke nin mhan diọbhi eji a da gbẹloghe egbe sade mhan khọnmhọn.
Ahamiẹn ọria ria ẹmhọn ebi ọle ha rẹ gbe egbe ọle a yẹ, asabọmiẹn egbe iẹnlẹn lọ ọle, la uhọnmhọn bha yẹ gba nanlẹn. Hẹi ji ẹkhọle ha lo uwẹ ranmhude ọne emianmhẹn nan. A dẹ sabọ gbẹloghe emianmhẹn nọn sẹnian.
Dọnmhẹn ọnan fẹghe: Jẹje dọ guanọ urẹkpa bhi obọ idọkitọ nọn manman guẹ iwẹnna.
●Yere ghe ẹmhọn uwẹ rẹtẹ Osẹnobulua.
Ebi Baibo tale: “Ibhi ikpigho eva ne bha sẹ emhin soso, ele a rẹ dẹ arẹlẹ isẹn, ọi be yi iriọ? Ọrẹyiriọ, Osẹnobulua bha ye ọsoso bhi ẹwẹ ele a. . . . Bha hẹi ji ofẹn mun bha; ibha ghan gbera arẹlẹ ne bunbun.”—Luke 12:6, 7.
Ebi a re ọle ta: Uwẹ wo manman ghan bhi ẹlo nọnsi Osẹnobulua.
Ọ sabọ rẹ dia uwẹ bhi egbe ghe uwẹ ọkpa khian, ọkpakinọn, Osẹnobulua lẹn idia nin uwẹ ye. Aharẹmiẹn egbe iẹnlẹn lọ uwẹ, ẹmhọn uwẹ rẹtẹ ọle. Psalm 51:17 yọle: “Eo Osẹnobulua, uwẹ ida fikeke gbe ọria nin emhin wanọ ọle udu a.” Osẹnobulua guanọ nin uwẹ ha nyẹnlẹn ranmhude ọle hoẹmhọn uwẹ.
Dọnmhẹn ọnan fẹghe: Fẹ ijiemhin eso ghe bhi Baibo ne ha rẹkpa uwẹ rẹ rẹọbhọ ghe Osẹnobulua họẹmhọn uwẹ. Bhi ọsi ijiemhin, fẹ uhọnmhonlẹn nọnzi 24 ghe bhi ọne ebe natiọle Draw Close to Jehovah.
● Nan erọnmhọn ji Osẹnobulua.
Ebi Baibo tale: “Bha zẹ ekpokpo rebhe nesẹbha obọ [nin Osẹnobulua], ranmhude ẹmhọn bha rẹtẹ ọle.”—1 Peter 5:7.
Ebi a re ọle ta: Osẹnobulua guanọ nin uwẹ taman ọlẹn ebi emhin gene dia uwẹ yẹ bhi egbe, bi emhin ne kpokpo uwẹ bhi ọkhọle.
Osẹnobulua dẹ sabọ rẹkpa uwẹ rẹ ha mhọn ọkhọle nọn lọre, yẹ re ahu nin uwẹ rẹ sabọ ziẹngbe ọnọghọ nin uwẹ ye. (Philippians 4:6, 7, 13) Ọle rẹkpa ẹbho ne nan erọnmhọn ji ọle nin ọle rẹkpa ele.—Psalm 55:22.
Dọnmhẹn ọnan fẹghe: Nan erọnmhọn ji Osẹnobulua ẹlẹnan. Noo elin nọnsọle nin Jehova bhi ọne erọnmhọn, uwẹ ha yẹ taman ọlẹn ebi emhin dia uwẹ yẹ bhi egbe. (Psalm 83:18) Bhii ọle nin ọle rẹkpa uwẹ ha mhọn iziẹngbe.
● Ria eria nyan ive nin Baibo tẹmhọnlẹn rẹji ẹghe odalo.
Ebi Baibo tale: “Ọne ikhuaẹloghe nan hi emhin nọn mun iẹnlẹn nọnsẹmhan mhọn, yẹ re imhan deziẹn nin mhan hẹi ha mhọn edandan.”—Hebrews 6:19.
Ebi a re ọle ta: Beji ahoho rẹ fi okọ nọn ribhi ẹkẹ ẹdẹ fi-yo-fi-re, ẹgheso emhin sabọ rẹ re uwẹ ha ghọnghọn, la re uwẹ ha kiẹ egbe. Ọrẹyiriọ, ikhuaẹloghe nọn ribhi ẹkẹ Baibo dẹ rẹkpa uwẹ rẹ sabọ deziẹn.
Ọne ikhuaẹloghe nan igheghe yi ọsi ukpunun, ive nin Osẹnonulua vele ghe ọle dẹ dọ re ọkpẹnlẹn ọbhi ọbalọ nesẹmhan rẹ mhan mhọn ọlẹn.—Revelation 21:4.
Dọnmhẹn ọnan fẹghe: Nin uwẹ rẹ luẹ ba ẹmhọn ene ikhuaẹloghe ne ribhi Baibo, tie iluẹmhin nọnzi 5 bhi brokiọ natiọle Ọta Nọn Mhẹn Nọn Nin Obọ Osẹnobulua Vae!
● Ha lu emhin ne re uwẹ ghọnghọn.
Ebi Baibo tale: “Ikhunmhun esili, ọle ọkhọle nọn sọnyẹnmhẹn khin.”—Proverbs 17:22.
Ebi a re ọle ta: Ahamiẹn mhan lu emhin ne rẹ mhan ghọnghọn, ọ dẹ sabọ re ọkhọle nọnsẹmhan rẹ fẹkẹ ha lọre.
Dọnmhẹn ọnan fẹghe: Ha lu emhin ne re uwẹ ghọnghọn. Bhi ọsi ijiemhin, kaehọ ilo nọn ti uwẹ bhọ, tie ebe nọn ha ko uwẹ ude re. Uwẹ dẹ yẹ sabọ ha ghọnghọn sade uwẹ guanọ emhin nin uwẹ ha lu rẹ rẹkpa ọria, aha rẹmiẹn obhi emhin nọn.—Acts 20:35.
● Ha gbẹloghe egbe nọnsẹ.
Ebi Baibo tale: “Isasa-egbe mhẹnmhin.”—1 Timothy 4:8.
Ebi a re ọle ta: Ahamiẹn mhan lu isasa egbe, mhan le ebale nọnsẹn, yẹ wẹ nọnsẹn, ọ dẹ sabọ rẹkpa mhan.
Dọnmhẹn ọnan fẹghe: Ha khian nẹga, aharẹmiẹn ihuẹnlo 15 ọkpa uwẹ sabọ rẹ lu ọle.
● Yere ghe emhin dẹ sabọ fidenọ.
Ebi Baibo tale: “Ibha bhọ bha lẹn ebi iẹnlẹn nọnsẹbha ha dia yẹ ewiẹ.”—James 4:14.
Ebi a re ọle ta: Ọnọghọ nọn manman kaka, nin mhan riale ghe ọ ida fo ghẹdẹ, sabọ wo rẹ si egbe kie.
Aharẹmiẹn ghe ọnọghọ nin uwẹ ye ẹlẹnan diabe emhin nọn ida fo ghẹdẹ, emhin dẹ sabọ fidenọ ewiẹ. Bhiriọ, guanọ emhin ne ha rẹkpa uwẹ rẹ sabọ iziẹngbe. (2 Corinthians 4:8) Ọnọghọ nin uwẹ ye sabọ rẹ fo ẹdẹ ọkpa, ọkpakinọn, uwẹ ha gbe egbe uwẹ a, ọsi uwẹ folo.
Dọnmhẹn ọnan fẹghe: Tie okha ọsi ẹbho bhi Baibo nin egbe lọle rẹsẹbhọ ghe ele da ha guanọ nin ele yu. Uwẹ ha yẹ fẹghe ebe iẹnlẹn nọnsele rẹ fidenọ yẹ bhi uwedẹ nin ele bha rẹ re ẹlo ọi. Mhan fẹ ijiemhin eso ghe.
Baibo be tẹmhọn ẹbho eso ne ha guanọ nin ele yu?
Ehe. Baibo tẹmhon ẹbho eso ne yọle ghe ele ho nin ele yu. Osẹnobulua bha khọẹkẹ ele, sokpan, ọle da rẹkpa ele. Ọle dẹ yẹ sabọ rẹkpa uwẹ.
Elijah
● Họla ọle ha khin? Akhasẹ nọn mhọn izebhudu, ọle Elijah ha khin. Ọrẹyiriọ, egbe iẹnlẹn yẹ wo ha lọ ọle ẹgheso. James 5:17 yọle: “Ọria ọkhankhan bii mhan Elijah ha khin.”
● Bezẹle nin ọle da ha ho nin ọle yu? Ẹghe ọkpa ribhọ nin Ẹlijah rẹ ha riale ghe ọle ọkpa khian, ofẹn da ha mun ọlẹn. Ọle da ha ghe egbe ọle bii ọria nọn bha sẹ emhin soso. Bhiriọ ọle da bhii Jehova yọle: “Jehova, gbe mẹn an.”—1 Kings 19:4.
● Be ki rẹkpa ọle? Elijah da taman Osẹnobulua bhi erọnmhọn ebi emhin dia ọle yẹ bhi egbe. Be Osẹnobulua ki rẹ rẹkpa ọle ye? Osẹnobulua da rẹman Elijah ghe ẹmhọn ọlẹn ti ọle bhọ. Ọle da yẹ rẹman ọlẹn ghe ọle manman mhọn ahu. Sẹye, Ọle da ji Elijah lẹn ghe ọle yẹ mhọn emhin nin ọle ha sabọ lu, bhiriọ, ọle da rẹkpa Elijah.
▸ Tie okha ọsi Elijah: 1 Kings 19:2-18.
Job
● Họla ọle ha khin? Okpea nọn wo manman fe, nọn yẹ mhọn azagba-uwa, ọle Job ha khin. Ọle da wo manman sun rẹkhan Osẹnobulua.
● Bezẹle nin ọle da ha ho nin ọle yu? Osukpa, emhin ebe kẹkẹ rẹ wo munhẹn ha sunu ji Job. Emhin rebhe nin ọle ha mhọnlẹn da yulu ọle. Imọn nesọle rebhe da yuno. Ọle da yẹ ha khọnmhọn emianmhẹn ebe. Bhi ọkike ọle, ẹbho da yẹ mun orẹsin sin ọlẹn ghe ọle tobọle si ọnọghọ kẹkẹ nin ọle ye. Job da yọle: “Iẹnlẹn nọnsẹmhẹn sọnọn mẹn; Ọ iyẹ ghọn mẹn rẹ ha nyẹnlẹn.”—Job 7:16.
● Be ki rẹkpa ọle? Job da nan erọnmhọn ji Osẹnobulua, yẹ ne ẹbho talọ. (Job 10:1-3) Ọmoẹ nọnsọle nin Elihu da wo re itohan nanlẹn lu emhin, yẹ ziẹn ọlẹn udu. Ọle da yẹ rẹkpa ọle rẹ re ẹlo nọn khẹke ha ghe idia nin ọle ha ye. Job da wo miẹn adia bi urẹkpa nọnsi Osẹnobulua ọbhi egbe.
▸ Tie okha ọsi Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moses
● Họla ọle ha khin? Moses hi ọria nọn sun ibhokhan Isreal bhi ẹghe ẹdẹlẹ. Akhasẹ nọn manman ga nọnsẹn ọle ha khin.
● Bezẹle nin ọle da ha ho nin ọle yu? Ọle wo manman ha mhọn ẹsọn ne bunbun bhi obọ, sẹyẹ, ẹghe ẹghe ẹbho rẹ wo ha re unun je ọle. Ọnan da wo re egbe lọ ọle. Bhiriọ, ọle da viẹ bu Jehova yẹ taman yọle: “Wowo gbe mẹn a nian.”—Numbers 11:11, 15.
● Be ki rẹkpa ọle? Moses da taman Osẹnobulua ebi emhin dia ọle yẹ bhi egbe. Osẹnobulua da rẹkpa ọle beji a ha da miẹn ghe ọne ẹsọn bha yẹ bun ọle gbe.
▸ Tie okha ọsi Moses: Numbers 11:4-6, 10-17.