Be IBaibo Tale bhi Ẹmhọn Ẹsele Nan Lu Nin Ẹbho?
Ewanniẹn nin Baibo re ọbhọ
Baibo yọle nin mhan ha zẹ emhin bhi obọ, mhan ha yẹ re ọkhọle nọn khẹke ha lu ọle. Ọ da yẹ yọle ghe ọria nọn lu ọne ẹsele, bi ọria nin ọle lu ọne ẹsele nan dẹ ha ghọnghọn. (Proverbs 11:25; Luke 6:38) Jesu yọle: “A ha re emhin sibhi obọ re, ọle eghọnghọn ye gbera a ha miẹn emhin bhi obọ.”—Acts 20:35.
Ẹsele nela ti Osẹnobulua bhọ?
Eghọnghọn nabhọre sade mhan re ọkhọle rebhe zẹ emhin bhi obọ. Baibo yọle: “Ji ọdeọde ha lu beji ọle mhanmhanlẹn bhi ọkhọle, ọ iyi bọsi ebi a sua ọle lu, ranmhude, ẹmhọn ọria nọn re eghọnghọn zẹ emhin bhi obọ ti Osẹnobulua bho.”—2 Corinthians 9:7.
Nan rẹ re ọkhọle rebhe ha zẹ emhin bhi obọ deba “oga nọn khiale” nin Osẹnobulua miẹn ọbhi egbe. (James 1:27) Emhin nọn ti Osẹnobulua bho nọn sade ọria wo ha zẹ emhin bhi obọ rẹ rẹkpa ẹbho, Osẹnobulua ghe ọle bii emhin nan rẹ nanlẹn mọnmọn. (Proverbs 19:17) Baibo rẹman ghe Osẹnobulua dẹ re ihaosa nin ọria nọn lu ẹsele.—Luke 14:12-14.
Ẹsele nela iti Osẹnobulua bhọ?
Ahamiẹn ebi ọria ha miẹn bhọ zẹle nin ọle da lu ẹsele. Bhi ọsi ijiẹmhin:
Nin ẹbho da ha re ẹlo esili ghe ọle.—Matthew 6:2.
Beji ẹbho ha da yẹ lu ẹsele nanlẹn.—Luke 14:12-14.
Beji Osẹnobulua ha da re ẹlo esili ha ghe ele.—Acts 8:20.
Ahamiẹn a dẹ re ọne ẹsele lu emhin nọn bha yẹẹ Osẹnobulua. Bhi ọsi ijiẹmhin, ahamiẹn mhan lẹnmhin ghe mhan ha re igho nin ọria, ọle dẹ re ọle fi ono, re ọle dẹ ikhunmhun nọn imhẹn, la re ọle da anyọn gbegbe, ọ bha khẹke nin mhan re nanlẹn. (1 Corinthians 6:9, 10; 2 Corinthians 7:1) Sẹyẹ, ọ bha khẹke nin mhan re igho nin ọria nọn mhọn ahu nin ọle rẹ wẹnna, sokpan ọle bha guanọ nin ọle wẹnna.—2 Thessalonians 3:10.
Ahamiẹn mhan wo ha lu ẹsele nin ẹbho rẹ sẹbhọ ghe mhan fikeke gbe azagba-uwa nọnsẹmhan. Baibo rẹman ghe ọ khẹke nin ọdafẹn-uwa ha gbẹloghe azagba-uwa nọnsọle. (1 Timothy 5:8) Ọ bha khẹke nin ọdafẹn-uwa rẹ ha lu ẹsele nin ẹbho ebhebhe rẹ sẹbhọ ghe, azagba-uwa nọnsọle ki ha ribhi oya. Sẹyẹ, ẹghe nin ẹbho eso bha rẹ ka gbẹloghe ene biẹ ele, ranmhude ele yọle “ẹseọhẹ nan rẹ guẹ nin Osẹnobulua,” ọle emhin nin ele mhọnlẹn rebhe khin, Jesu bha re obọ ele bhọ.—Mark 7:9-13.