ỌTA NIN ELASẸRE NỌỌN
Be IBaibo Ha Rẹ Sabọ Rẹkpa Mẹn Yẹ?—Obọ 2: Ebi Uwẹ Ha Lu Nin Baibo Nan Tie Da Ha Ti Uwẹ Bhọ
Usẹn-obhokhan ọkpa natiọle Will da yọle: “Ahamiẹn uwẹ bha lẹn uwedẹ nọn khẹke nin uwẹ rẹ ha tie iBaibo, ọ ida yẹẹ uwẹ rẹ ha tie ọle”
Uwẹ be guanọ nin uwẹ lẹn ebi uwẹ ha lu nin Baibo nan tie da ha ti uwẹ bhọ? Ahamiẹn iriọ, ọne uhọnmhọn-ọta nan dẹ sabọ rẹkpa uwẹ.
Ha tie ẹmhọn nọn ribhi Baibo bii emhin nọn sira uwẹ sunu
Mun egbe rebhe ọbhi emhin nin uwẹ tie. Ene emhin ea nan dẹ sabọ rẹkpa uwẹ rẹ lu ọnan:
Zẹ okha ọkpa bhi Baibo nin uwẹ guanọ nin uwẹ tie. Uwẹ sabọ tie okha ọsi Jesu la emhin ọbhebhe nọn ki rẹ khin. Uwẹ sabọ yẹ khue uremhinman nan kaehọ ọle ne ribhi jw.org.
Tie ọne okha bhi Baibo. Uwẹ ọkpa sabọ rẹ tie ọle, la uwẹ bi imọẹ uwẹ la ene ribhi azagba-uwa nọnsẹ ko tie ọle. Ibha sabọ gha egbe ọbhi ẹbho kẹkẹ ne talọ bhi ọne okha.
Uwẹ sabọ yẹ lu ọkpa bhi ene emhin nan:
Drọ ifoto ọsi ebi uwẹ tiele. Ene ifoto sabọ ha yi ifoto kẹkẹ ne re emhin ne sunu bhi ọne okha man. Uwẹ sabọ yẹ gbẹnẹn emhin sikẹ ene ifotọ nin uwẹ rẹ tẹmhọn ebe sunu bhi ene ifoto.
Uwẹ ha tie okha ọsi ọria nọn ga Osẹnobulua nọnsẹn, gbẹn ikpẹ esili nesọle dagbare, emhin nin ọle lu, bi erọnmhọn nin ọle miẹn.
Gbe otọ ọne okha fanọn an. Tale bhi uwedẹ kẹkẹ, beji ẹbho kẹkẹ ha rẹ tale. Uwẹ sabọ yẹ ria ẹmhọn ebi ẹbho kẹkẹ nan tẹmhọn ọlẹn ha tayẹ sade uwẹ gua ele ọta bhi unun.
Ria ẹmhọn ebe ha rẹ sunu sade eria nan tẹmhọnlẹn lu emhin bhi uwedẹ ikẹ. Bhi ọsi ijiẹmhin, ria ẹmhọn ebi ọ rẹ khẹke nin Peter lu yẹ ẹghe nan rẹ ha nọọn ọlẹn si ọle lẹn iJesu. (Mark 14:66-72)
Uwẹ sabọ re ọne okha lu arẹman. Uwẹ ki yẹ re emhin nin uwẹ luẹ bhi ọne okha man.—Romans 15:4.
Uwẹ dẹ sabọ ha tie iBaibo bhi uwedẹ nọn ha da ha ti uwẹ bhọ!
Guanọ otọ ọne ẹmhọn nin uwẹ tiele
Uwẹ ha manman guanọ otọ emhin nin wẹ tie bhi iBaibo, uwẹ ki miẹn emhin ne bunbun luẹ bhi ẹkẹ ọle. Ẹgheso, uwẹ bhọ dẹ sabọ miẹn emhin luẹ bhi ukpọta ọkpa la eva nan noo bhi eji uwẹ tiele.
Bhi ọsi ijiẹmhin, fẹ Matthew 28:7 bi Mark 16:7 ghe.
Bezẹle nin Mark da muegbe tale bhi okha nọnsọle ghe Jesu dẹ kẹ re egbe man iPeter?
Ebe ha rẹkpa uwẹ rẹ lẹn ọne ewanniẹn: Mark bha ha ribhi enin ẹghe nin ọne emhin nan rẹ sunu. Asabọmiẹn unun iPeter ọle da họn.
Emhin nin uwẹ ha sabọ luẹ bhi ọne okha: Bezẹle nọn ha da ko iPeter udu re ghe iJesu guanọ nin ọle miẹn ọlẹn? (Mark 14:66-72) Be iJesu rẹ rẹman yẹ ghe ọmọẹ ọsaje ọle khin rẹji Peter? Be uwẹ ha rẹ re egbe khọkhọ iJesu yẹ?
Ahamiẹn uwẹ tie iBaibo bhi uwedẹ nọn mhẹn bhi ẹlo, yẹ ha guanọ otọ emhin nin uwẹ tiele, Baibo nan tie ki wo ha ti uwẹ bhọ!