ỌTA NIN ELASẸRE NỌỌN
Emhin Ebe Be Nọn Nin Okpea bi Okpea La Okhuo bi Okhuo Rẹ Ha Ne Egbe Nowẹ?
“Ẹghe nin mẹn rẹ ha wanre, ẹmhọn ikpea bii mẹn da wo ha yẹẹ mẹn. Ọnin deba emhin nọn wo nọghọ mẹn rẹ khọn miotọ. Mẹn da ha riale ghe, mẹn ha ki ha wanre, mẹn ida ha mhọn iria-eria nọn sẹriọ. Sokpan, ẹmhọn ikpea bii mẹn sẹyẹ wo yẹẹ mẹn.”—David, 23.
Kristiẹn nọn guanọ nọn lu ebe yẹẹ Osẹnobulua David khin. Ọle dẹ be sabọ ha lu ebe yẹẹ Osẹnobulua, beji a miẹn ghe ẹmhọn ikpea bii ọle yẹẹ ọle? Ọ be yẹẹ Osẹnobulua nin okpea bi okpea la nin okhuo bi okhuo rẹ ko ha ne egbe nowẹ?
Be Baibo ta yẹ?
Ẹlo kẹkẹ, ọle agbaẹbho kẹkẹ rẹ ghe okpea bi okpea la okhuo bi okhuo ne ne egbe nowẹ. Sẹyẹ ẹlo nin ẹbho rẹ ghe ọle sabọ rẹ dikẹ ranmhude ẹghe nin ele rẹ nyẹnlẹn. Sokpan, ọ iyi uwedẹ nin ẹbho ne bunbun rẹ ghe emhin yẹ Kristiẹn ghe rẹ lu emhin. Sẹyẹ, ele iji “ahoho ọsi iman-emhin rebhe ha mun [ele] yo mun [ele] re.” (Ephesians 4:14) Sokpan, ebi Baibo tale rẹji nin okpea bi okpea la nin okhuo bi okhuo rẹ ha ne egbe nowẹ (bi ẹmhọn inegbenowẹ nọn hi ki rẹ ha khin), ọle ele re obọ ọi.
Ebi Baibo tale rẹji nin okpea bi okpea la nin okhuo bi okhuo rẹ ha ne egbe nowẹ wo manman khia bhi ẹlo. Ọta nọnsi Osẹnobulua yọle:
“Hẹi ne okpea ibo ẹ nowẹ beji uwẹ rẹ ne okhuo nowẹ.”—Leviticus 18:22.
“Osẹnobulua da ji ele da ha lu emhin ne bha khia nin ele mhọn bhi ọkhọle . . . [yẹ] re otọ nin ele rẹ ha lu ilọnmhọn oghẹ nọn yẹẹ ele. Ene ikhuo bha yẹ ha nin ikpea nowẹ beji Osẹnobulua mhanmhanlẹn nọn dia, ele da ha lu ọnọn bha khẹke.”—Romans 1:24, 26.
“Hẹi ji a hiẹ ibha. Ene gboghẹ, ene ga ẹbo, ọdọ la amhẹn nọn ne eria ọbhebhe nowẹ, ikpea ne ji ikpea da ne ele nowẹ, ikpea ne nẹ ikpea nowẹ, la oyi, la ene mhọn ẹlobhọ, edanyọn gbe egbe, la eria ọkhọbhunun, la ene mun ibo ele lu ida nabhi Agbejele nọnsi Osẹnobulua.”—1 Corinthians 6:9, 10.
Bhi ọsi ẹmhọanta, uhi nọnsi Osẹnobulua rẹtẹ ọrebhe, aharẹmiẹn ikpea la ikhuo ne mhọn ọkhọle nan rẹ ha ne ẹbho bii ele nowẹ nọn, la ikpea ne mhọn ọkhọle rẹ ha ne okhuo nowẹ bi ikhuo ne mhọn ọkhọle rẹ ha ne okpea nowẹ nọn. Ẹmhọanta nọn ribhọ hi, ọrebhe ọkhẹke nọn ha mun egbe ọbhi ibẹẹ sade ọ ghọn ele nin ele rẹ lu emhin nin Osẹnobulua hele.—Colossians 3:5.
Ọnin be rẹman ghe . . . ?
Ọnin be rẹman ghe Baibo yọle nin mhan ha he ikpea ne ne ikpea nowẹ?
Eye. Baibo bha re obọ ọbhọ nin mhan ha he ọria soso, aharẹmiẹn okpea nọn ne okpea nowẹ nọn la okpea nọn ne okhuo nowẹ nọn. Uwedẹ nọn hi ki rẹ khin nin mhan rẹ nyẹnlẹn, Baibo yọle nin mhan deba ọrebhe ha ribhi ọfure. (Hebrews 12:14) Bhiriọ ọ bha khẹke nin mhan ha re unun gbe okpea bi okpea la okhuo bi okhuo ne ne egbe nowẹ, he ele, la ha re obọ oya mun ele bhi uwedẹ nọn hi ki rẹ khin.
Ọnin be rẹman ghe ọkhẹke nin Krisitiẹn he uhi ne re obọ ọbhọ nin okpea bi ọkpea la nin okhuo bi okhuo rẹ ha bọ egbe?
Baibo rẹman ghe, uhi ọsi Osẹnobulua rẹji ibọdọ bi ireokhuo hi, nin okpea ọkpa bi okhuo ọkpa rẹ ko bọ egbe. (Matthew 19:4-6) Ọkpakinọn, eria tobọ ele gbe ọne uhi ghe nin okpea bi okpea la nin okhuo bi okhuo rẹ ko ha bọ egbe. Sẹyẹ ekhẹn ahinmhin-ibo re obọ ọbhi ọne emhin nan, sokpan ọnin iyi uwedẹ nọn khẹke nan rẹ ha bọ egbe. Baibo yọle nin Kristiẹn hẹi deba ibo soso. (John 18:36) Bhiriọ gọvamẹnt ha gbuhi ghe nin okpea bi okpea la nin okhuo bi okhuo rẹ ko ha bọ egbe la ha ne egbe nowẹ, Kristiẹn ida re obọ ọbhọ, sẹyẹ ele ida lu emhin rẹ rẹman ghe ele he ọne uhi.
Sokpan ahakimiẹn ghe . . . ?
Sokpan ahakimiẹn ghe okpea bi okpea la okhuo bi okhuo ko ne egbe nowẹ fo kii? Ele dẹ be sabọ fidenọ?
Ehe. Ẹbho eso bhi ore nin ọhẹnhẹn ne rẹ ha lu iriọ, wo sabọ fidenọ! Baibo ki yọle okpea bi okpea la okhuo bi okhuo ne ko ne egbe nowẹ ida nabhi Agbejele nọnsi Osẹnobulua fo, ọ da yọle: “Iriọ eso bhi ẹwẹ ibha rẹ khin.”—1 Corinthians 6:11.
Ọnin be rẹman ghe okpea bi okpea la okhuo bi okhuo ne zobọ bhọ rẹ ko ha ne egbe nowẹ iyẹ da ha mhọn ọne ọkhọle yẹ rẹ ha lu iriọ hiehie? Eye. Baibo yọle: “Bha ha kiẹn eria ọgbọn, ọria nin ilẹn-emhin nọn gbale rẹ kiẹn ọsọgbọn.” (Colossians 3:10) Ọria isabọ wo re osukpa fidenọ.
Sokpan ahakimiẹn ghe ọria nọn guanọ nọn re obọ rẹkhan uhi nọnsi Osẹnobulua, ọ sẹyẹ ghọn ọlẹn rẹ ne okpea la okhuo bii ọle nowẹ kii?
Beji ọria ha lu sade ọ ghọn ọlẹn rẹ lu emhin nekẹle ne bha gba, iriọ ọle ha yẹ sabọ lu bhi ọne idia nan. Ọle dẹ sabọ zẹ ghe ọle ida lu emhin nin egbe nọnsọle guanọ. Be ọle ha rẹ sabọ lu iriọ yẹ? Baibo yọle: “Bha wo ha ji ẹlinmhin nọn khiale dia bha, bhiriọ, bha ida lu ilọnmhọn efun egbe soso hiehie.”—Galatians 5:16.
Uwẹ be gbẹlokotọ ghe, ọne ulọnlẹn nin bha yọle ghe, ọ ida ha ghọn ọne ọria rẹ ha lu ilọnmhọn efun egbe soso hiehie? Sokpan ahakimiẹn ghe ọle tie Baibo yẹ nan erọnmhọn ẹghe rebhe, ọle ki ha mhọn ọne ahu rẹ sabọ khọn ọne ọkhọle nin miotọ.
Emhin nọn sẹriọ rẹkpa David nin mhan ka tẹmhọnlẹn, manman nọn, ẹghe nin ọle ki rẹ ne ene biẹ ọle ne yi Kristiẹn zilo ọne ẹmhọn fo. Ọle da yọle: “Ọ da wo diabe ghe, mẹn mun ihẹ nọn khua sibhi ijianbọ nọnsẹmhẹn re. Sade mẹn kẹ taman ene biẹ mẹn nọn, iẹnlẹn nọnsẹmhẹn ha rẹ mhẹn gbera ebi ọ dia ẹghe nin mẹn rẹ ha yi ọlasẹre.”
Eghọnghọn nabhọre sade mhan re obọ rẹkhan adia nesi Jehova. Mhan lẹnmhin ghe adia nesi Jehova khiakhiamhin, ọ yẹ re ọkhọle ghọnghọn. Sẹyẹ udede elele a miẹn bhọ sade a re obọ rekhan ọlẹn.—Psalm 19:8, 11.