Ewanniẹn ọsi Inọnta Ne Rẹtẹ IBaibo / Esu bi Ẹhi Nesọle / Esu Gene Ribhọ?
Ewanniẹn nin Baibo re ọbhọ
Ehe, Esu gene ribhọ. Ọle hi “ọnọn gbẹloghe ọne agbọn nan,” ọle ọne ẹhi nọn re egbe ọle kiẹn ọria ebe yẹ sọtẹ da Osẹnobulua. (John 14:30; Ephesians 6:11, 12) Baibo noo ene elin nan bi ene arẹkhọkhọ nan rẹ rẹman unan ọria nin Esu khin:
Esu mundia nin “Ọnọn Ne Ọria Suan.”—Job 1:6.
Ojuu mundia nin “Ọnọn Riia Ọria Elin An.”—Revelation 12:9.
Ẹnyẹn, beji Baibo rẹ noo ọle, ọ mundia nin ọnọn “Hiẹ” ọria.—2 Corinthians 11:3.
Ọnọn Dọnmhẹn Ọria.—Matthew 4:3.
Ọbhahoghe.—John 8:44.
Esu iyi mhan nin eria la ọkhọle nọn imhẹn nin eria mhọnlẹn
Ẹbho eso yọle ghe imhan nin eria hi Esu, eso yẹ yọle ghe ọkhọle nọn imhẹn nin mhan mhọnlẹn hi Esu. Ọkpakinọn, Baibo tẹmhọn ebi Osẹnobulua bi Esu rẹ ko zilo yẹ. Osẹnobulua gbamhin, bhiriọ, ọle imhọn ọkhọle nọn imhẹn nin ọle deba ha zilo. (Deuteronomy 32:4; Job 2:1-6) Sẹyẹ, Esu dọnmhẹn Jesu nọn imhọn emhin ebe bhi egbe. (Matthew 4:8-10; 1 John 3:5) Bhi ọsi ẹmhọanta, Baibo rẹman ghe Esu gene ribhọ. Ọle iyi ọkhọle nọn imhẹn nin eria mhọnlẹn.
Ọ be khẹke nọn han mhan illo ranmhude ẹbho ne bunbun bha rẹọbhọ ghe Esu gene ribhọ? Hiehie, ranmhude Baibo ji mhan lẹn ghe ọle hiẹ ẹbho. (2 Thessalonians 2:9, 10) Eku ọkpa nin ọle manman lu hi, ọle ki ha gue ẹbho ọkhọle nin ele hẹi rẹọbhọ ghe ọle gene ribhọ.—2 Corinthians 4:4.
Ọta ebhebhe nin ẹbho yẹ ta bhi ẹmhọn Esu ne iyi ẹmhọanta
Ẹmhọanta nọn ribhọ: Ọne ukpọta Hebrew nin Baibo eso zedu ọle kiẹn “Lucifer” mundia nin ọnọn fi wanlan-wanlan. (Isaiah 14:12) Ẹmhọn nan ta nẹga Isaiah 14:12 rẹkpa mhan rẹ lẹn ghe, ọnọn fi wanlan-wanlan mundia nin ijie kẹkẹ ne ha gbẹloghe bhi Babylon nin Osẹnobulua ha dunmhun an ranmhude akan-ehọ nọnsele. (Isaiah 14:4, 13-20) Ọne ukpọta, ọnọn fi wanlan-wanlan, ọle a rẹ ha re ejele ọsi Babylon rẹ zọjie beji a dunmhun ọlẹn an fo.
Ebi ẹbho nin Esu dọnmhẹn rẹ lu emhin yẹ, ki rẹkpa Osẹnobulua rẹ lẹn ebi ọle ha rẹ bhohiẹn nọnsele yẹ.
Ẹmhọanta nọn ribhọ: Oghian Osẹnobulua Esu khin, ọle iyi ọguọmhandia nọnsọle. Esu ne ẹbho ne ga Osẹnobulua suan, yẹ bha ele ohoghe.—1 Peter 5:8; Revelation 12:10.