Ekhẹn Azemhinre Si Agogo Nọn Rẹman Ukpẹdẹ Nan Ha Rẹ Fuẹn Agbọn An Ke Odalo—Be Baibo Ta Yẹ?

Bhi Jẹnuare 24, 2023, ekhẹn azemhinre da si Agogo Nọn Rẹman Ukpẹdẹ Nan Ha Rẹ Fuẹn Agbọn An ke agogo 12 ọsasọn ogiziẹn.a Ọne agogo 12 ele rẹọbhọ ghe a ha rẹ fuẹn ọne agbọn nan an.

• “Ọne ‘Agogo Nọn Rẹman Ukpẹdẹ Nan Ha Rẹ Fuẹn Agbọn An’ mundia nin ukpẹdẹ nin eria ha rẹ fuẹn ọne agbọn nan an. Bhi ẹdẹ Tiuzde, ekhẹn azemhinre da si ọne agogo gbera eji ọ ka ye khẹ, nọn sikẹ agogo 12 bhi ọsasọn ogiziẹn. Ele lu ọle ranmhude okhọnlẹn nọn sunu bhi Ukraine, ofẹn nọn mun ghe okhọnlẹn dẹ kẹ de bhi ije nekẹle, bi ebi emhin ki dia yẹ bhi ọne otọ nan.”—AFP International Text Wire.

• “Bhi ẹdẹ Tiuzde, ekhẹn azemhinre yọle ghe a si ‘Agogo Nọn Rẹman Ukpẹdẹ Nan Ha Rẹ Fuẹn Agbọn An’ ke odalo, nọn ha yi ihuẹnlo 90 kẹre nọn rẹ sẹbhi agogo 12 bhi ọsasọn ogiziẹn. Eria bha sẹ ka re inian sike ukpẹdẹ nin ele ha rẹ fuẹn egbe ele a khẹ.”—ABC News.

• “Usun azemhinre ne na otọ agbọn rebhe vae yọle ghe, eria bha sẹ ka lu emhin nin ele ha rẹ fuẹn egbe ele a bọsi ọne ele lu nian.”—The Guardian.

Ẹmhọanta be nọn ghe, mhan bu ukpẹdẹ nan ha rẹ fuẹn eria bi ọne otọ an? Ọ be khẹke nin mhan ji emhin ne ha sunu bhi ẹghe odalo ha re ofẹn mun mhan? Be Baibo ta yẹ?

Emhin ne ha sunu bhi ẹghe odalo

Baibo yọle ghe, “ọne otọ nan dẹ ha ribhọ bhi ighegheghe,” sẹyẹ, eria dẹ “nyẹnlẹn bhọ bhi ighegheghe.” (Ecclesiastes 1:4; Psalm 37:29) Bhiriọ, eria ida sabọ fuẹn ọne oto nan an la lu ọle nin ẹbho ida sabọ ha nyẹnlẹn bhọ.

Ọkpakinọn, Baibo tẹmhọn rẹji ọkpẹnlẹn. Bhi ọsi ijiẹmhin, ọ yọle ghe ọne agbọn nan “re egbe khian.”—1 John 2:17.

• Nin uwẹ rẹ lẹn ebi Baibo re ọle ta ẹghe nọn rẹ yọle ghe a dẹ kpẹn ọne agbọn nan, tie ọne uhọnmhọn-ọta nọn yọle, “Is the World Coming to an End? What Is the Apocalypse?” (Ẹghe Nan Ha Rẹ Fuẹn Ọne Agbọn Nan Be Sire? Be Bhọ Hi Ọkpẹnlẹn Ọsi Ọne Agbọn Nan?)

• Nin uwẹ rẹ lẹn ebi Baibo tale rẹji ẹghe nin ọkpẹnlẹn ọsi ọne agbọn nan ha rẹ vae, tie ọne uhọnmhọn-ọta nọn yọle, “When Will the World End?” (Ẹghela Ọkpẹnlẹn Ọsi Ọne Agbọn Nan Ha Rẹ Vae?)

Ha mhọn ọne ọkhọle ghe emhin dẹ kẹ ha mhẹn

Baibo dẹ sabọ rẹkpa mhan rẹ ha mhọn ọne ọkhọle ghe emhin dẹ kẹ ha mhẹn aharẹmiẹn ghe ẹghe ọkakale mhan ye. Be ọ ha rẹ rẹkpa uwẹ yẹ?

• Baibo re adia kẹkẹ ne ha sabọ rẹkpa mhan nin mhan. (2 Timothy 3:16, 17) Bhi ọsi ijiẹmhin, nin uwẹ rẹ lẹn ebi Baibo ha rẹ sabọ rẹkpa uwẹ yẹ rẹ ha mhọn ọkhọle nọn lọre arẹmiẹn ẹghe ọkakale mhan da nyẹnlẹn, tie ọne uhọnmhọn-ọta nọn yọle, “How to Control Worry.” (Ebi Uwẹ Ha Rẹ Sabọ Lọ Ikpokpo-egbe Yẹ)

• Baibo re ikhuaẹloghe ọsaje nin mhan rẹji ẹghe odalo. (Romans 15:4) Ọ tẹmhọn emhin nin mhan ha sabọ miẹn nian bi ẹghe odalo nọn ha sabọ rẹkpa mhan ziẹngbe ọkakale ne sunu bhi ọne agbọn nan.

Nin uwẹ rẹ sabọ miẹn emhin ne bun luẹ bhi Biabo, deba mhan luẹ Baibo nin mhan man ẹbho le ọsọhẹ.