“Osẹnobulua Ọsi Ẹmhọanta” Wo Mun Ive Nesọle Sẹ

1. Beji Psalm 31:​2-5 rẹman, bezẹle nin mhan ha da sabọ mun udu nyan Jehova ghe, ọle dẹ gbega mhan bhi ohoghe nin Esu bha?

AGBỌN nin Esu gbẹloghe mhan da nyẹnlẹn ẹlẹnan. Ẹbho ne bunbun i ta ẹmhọanta. Ranmhude ọnan, ọ manman wo nọghọ nan rẹ gbaẹkẹ ẹbho. Ene do ẹki wo mun ẹbho lu. Ẹbho ne bunbun wo ha bha ohoghe ọbhi emhin nin ele khiẹn, beji ẹbho ha da ne ele dẹ ọle. Rẹ deba ọnin, imọẹ ne manman sikẹ egbe i mun ive rebhe nin ele ve nin egbe sẹ. Arẹmiẹn agbọn nọn sẹriọ mhan da nyẹnlẹn, ọ manman wo ti mhan bhọ ghe mhan dẹ sabọ ha mun udu nyan Jehova! Ọle hi “Osẹnobulua ọsi ẹmhọanta.” (Tie Psalm 31:​2-5.) Jehova i bha ohoghe, ẹmhọanta emhin rebhe nin ọle ta khin. Mhan dẹ sabọ rẹọbhọ ghe Jehova dẹ lu emhin rebhe nin ọle yọle ghe ọle dẹ lu.

2. Be mhan ha zilo nyan bhi ọne uhọnmhọn-ọta nan?

² Bhi ọne uhọnmhọn-ọta nan, mhan dẹ ka zilo nyan ebezẹle nin ọ da khẹke nin mhan re ọkhọle rebhe ha mun udu nyan Jehova. Mhan dẹ yẹ zilo nyan ebi Osẹnobulua ọsi ẹmhọanta ha rẹ re ọkpẹnlẹn ọbhi ọne gbọn Esu nan nọn i mhẹn yẹ, bi ebi ọle ha rẹ mun emhanmhan nesọle sẹyẹ. Ọne uhọnmhọn-ọta nan dẹ rẹkpa mhan rẹ manman re izebhudu ha tẹmhọn Osẹnobulua.

EBEZẸLE NIN MHAN HA DA SABỌ MUN UDU NYAN JEHOVA NIN OSẸ ỌSI ẸMHỌANTA

3. Bezẹle nin mhan ha da sabọ mun udu nyan Jehova?

³ Mhan dẹ sabọ mun udu nyan Jehova ranmhude ọle hi Aman nọn man emhin rebhe. Ọle hi ọnọn man otọ bi okhun bi emhin rebhe ne nyẹnlẹn bhọ. (Gen. 1:1; Ps. 36:9; Arẹm. 4:11) Ọle da man emhin kẹkẹ bhi ọne otọ nan ne ha rẹkpa mhan rẹ sabọ ha nyẹnlẹn. Emhin bii ahoho nin mhan hiẹnhiẹn bi amẹn nin mhan wọn. Jehova hi ọnọn zẹle nin emhin rebhe nin ọle manlẹn da wẹnna nọnsẹn, sẹyẹ, ọle dẹ wo ha lu iriọ khian. Ranmhude ghe Jehova man mhan, ọle lẹn emhin rebhe, sẹyẹ, ọle mhọn ahu nẹ, mhan dẹ sabọ rẹọbhọ ghe, ọle dẹ ha dia mhan bhi uwedẹ nọn gbale, yẹ re iẹnlẹn nọn mhẹn nin mhan bhi ẹghe odalo.

4. Be mhan rẹ lẹn yẹ ghe Jehova hoẹmhọn mhan?

⁴ Mhan dẹ sabọ mun udu nyan Jehova ranmhude ọle hoẹmhọn mhan. Jehova man eria ranmhude ọle guanọ nin ele ha nyẹnlẹn yẹ sọnyẹnmhẹn beji ọle yẹ lu. Ọnan zẹle nin Jehova da taman ukpọmọn ọkpa sẹsẹ nọnsọle yọle: “Ji mhan man okpea bhi arẹkhọkhọ nọnsẹmhan, mhan ki man ọlẹn nọn khọ imhan.” (Gen. 1:26) Ọle da man mhan bhi uwedẹ nin mhan ha rẹ sabọ tobọmhan ha zẹ ebi mhan ha lu. Ọle da man ọne otọ nan nọn mhọn-ose a nin mhan da ha nyẹnlẹn. (Ps. 115:16) Ọle da mun ọne ẹsọn nin Adam bi Ivi ne biẹ mhan, nin ele re ọne otọ nan kiẹn otọ ọfubhegbe. (Gen. 1:28; 2:15) Ọle da ne ebale, elanmhẹn bi emhin ekọnọn kẹkẹ nin ele, nin ele ha rẹ sabọ ha sọnyẹnmhẹn. Ene emhin nan rebhe rẹman ghe Jehova hoẹmhọn mhan, sẹyẹ, ọle “dẹ ha re ahoẹmhọn-egbe nọn ibeghe nọnsọle man . . . rẹ ha khian ighegheghe.”—Ps. 103:17.

5. (a) Be Jehova lu yẹ bhi ẹghe nin Adam bi Ivi rẹ sọtẹ da ọle? (b) Ive nela Osẹnobulua vele nin ọle sẹ munsẹ? (Fẹ ọne ẹkpẹti ghe nọn yọle, “Ije Kẹkẹ Bhi Baibo Ne Rẹman Ghe, Osẹnobulua Ọsi Ẹmhọanta Jehova Khin.”)

⁵ Mhan dẹ sabọ mun udu nyan Jehova ranmhude, ọle wo mun ive nesọle sẹ. Jehova bha man ọne otọ nan “bhi ihoho, sokpan, ọle man ọlẹn nan ha nyẹnlẹn bhọ.” (Isa. 45:​18, 19) Bhi ẹghe nin Adam bi Ivi rẹ sọtẹ da Jehova, ọle da bhu ele ohiẹn ghe ele dẹ yu. Ọne emhin nan nọn sunu dẹ sabọ re ọle diabe ghe, emhanmhan nọnsi Jehova i da sabọ munsẹ. Ọkpakinọn, emhin i ribhọ nọn ha sabọ mun Jehova mhọn nin ọle hẹi lu ebi ọle yọle ghe ọle dẹ lu. (Isa. 46:​10, 11) Emhanmhan nọnsi Jehova nin eria ne khiale rẹ ha nyẹnlẹn bhi ọne otọ nan bha sẹ fidenọ. Ọnan zẹle nin Jehova da re otọ nin Adam bi Ivi rẹ biẹ imọn. Sẹyẹ, Ọle da je Ukpọmọn ọkpa sẹsẹ nọnsọle re nin ọle dọ yu nin imọn nesi Adam. Ọnan da re isẹhoa nin mhan rẹ sabọ miẹn iẹnlẹn ọsi ighegheghe bhi ẹghe odalo.—Jọni 3:16.

JEHOVA NIN OSẸ ỌSI ẸMHỌANTA WO MUN IVE NESỌLE SẸ

6. Be Jehova yọle ghe ọ dẹ sunu ji Esu beji ọle re Adam bi Ivi sọtẹ fo?

⁶ “Ẹnyẹn nin ọhẹnhẹn, natiọle Esu, nan yẹ tiọle Ojuu”a, ọle hi ọnọn re Adam bi Ivi sọtẹ da Jehova. (Arẹm. 12:9; Gen. 3:​4, 5; Jọni 8:44) Ranmhude ọne emhin nan nin Esu lu, Jehova da bhu ọle ohiẹn ghe bhi ẹghe odalo, a dẹ gbe ọle khuelo. (Gen. 3:15) Ọkuẹsẹ ẹghe nan ha rẹ gbe Esu khuelo, ẹbho ne bunbun dẹ deba ọle ha lu emhin ne bha gba yẹ sọtẹ da Osẹnobulua. Ọrẹyiriọ, ẹbho ne bunbun dẹ yẹ wo ha sun rẹkhan Jehova.

7. Hela ribhi ibo nọnsi Esu? Be ha sunu ji ele?

⁷ Ẹbho ne bunbun yẹ wo re egbe khọkhọ Esu ẹlẹnan. Ele i hẹnmhọn nin Jehova. Ẹhi eso yẹ wo ribhọ ne deba ibo nọnsi Esu ne sọtẹ da Jehova. Ranmhude nin ele rẹ sọtẹ da Jehova, ele da re ọnan rẹman ghe, ibo nọnsi Esu ele ki ye. Ahamiẹn ẹghe nin Osẹnobulua rẹyi sẹle, a ki gbe Esu bi ẹbho ne rẹkhan ọlẹn khuelo.—Dan. 2:44; Rom 16:20.

8. Be Jesu lu bhi ukpe 1914? (Yẹ fẹ ene ifoto ghe.)

⁸ Be ha rẹkpa mhan rẹ gene rẹọbhọ ghe, Jehova dẹ gene gbe Esu bi ẹbho ne rẹkhan ọlẹn khuelo beji ọle tale? Bhi ukpe 1914, a da re Jesu kiẹn ojie. Sẹyẹ, bhi ọne ukpe nin, ọle Jesu ne Esu bi ẹhi ne i mhẹn nesọle khọnlẹn, yẹ khu ele vae bhi ọne otọ nan. (Arẹm. 12:​7-9) Arẹmiẹn okhun a da khọn ọne okhọn nan, ọ yẹ wo rẹso ọrebhe ne ribhi ọne otọ nan. Ọnan zẹle nin Baibo da yọle: “Ọkhọbhegbe hi ọsi ọne otọ nan, bi ọne okpẹdẹ, ranmhude, Ojuu bu bha re. Ẹkẹ manman khọ ọle, ranmhude, ọle lẹnmhin ghe, obhi ẹghe khere, ọle ki kẹ ọle re.” (Arẹm. 12:12) Rẹ na bhi 1914 ha vade, ọle Esu rẹ wo ha zughu ọne otọ nan an. Ranmhude ọnan, emhin da kie wo ha khọ ọbhọ. Bhi ọsi ẹmhọanta, ọkhọbhegbe wo gene vuọn ọne otọ nan! Bhi ẹghe nọn bha yẹ ree gbe, Jesu ki “khọn eghian ọlẹn miotọ”, sẹyẹ, ọle ki gbe Esu bi ene rẹkhan ọlẹn khuelo. (Arẹm. 6:2) Jesu ki kpe elin nọnsi Jehova khia sẹsẹsẹ. (Ps. 45:​4-6) Ẹghenin, ọrebhe ki dọ lẹn ghe Osẹnobulua ọsi ẹmhọanta Jehova khin!—Ezek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

JEHOVA NIN OSẸNOBULUA ỌSI ẸMHỌANTA WO SI ỌREBHE NE HOẸMHỌN ẸMHỌANTA KOKO

9. Hela Jehova sikoko ẹlẹnan?

⁹ Jehova wo ha “ku emhin rebhe kugbe rẹ na obọ Kristi, emhin ne ribhi okhun bi emhin ne ribhi otọ.” (Ẹfẹ. 1:10) “Emhin ne ribhi okhun” mundia nin enanzẹle ne ha deba Jesu Kristi gbẹloghe bhi okhun. “Emhin ne ribhi otọ” mundia nin ẹbho ne ha nyẹnlẹn bhi Agbọn Ọsọgbọn rẹ sẹbhi ighegheghe. Ene usun nan veva wo ha rẹkpa ẹbho rẹ daghe ọle ghe, ọbhahoghe Esu khin. Ele yẹ wo guanọ ẹbho ne mhọn ọkhọle esili rẹ luẹ ẹmhọanta.

10. Be Jehova rẹ ha miẹn ẹbho fan yẹ bhi ohoghe kẹkẹ nin Esu bha? (Arẹman 14:​6, 7)

¹⁰ Iwẹnna itẹmhọn Osẹnobulua nin mhan lu, ọle Jehova noo rẹ si ọrebhe ne hoẹmhọn ẹmhọanta koko ẹlẹnan. Ọne ẹmhọn Agbejele nan, ọle hi iwẹnna nan ki sẹ lu nẹ rẹ na otọ ha de. (Tie Arẹman 14:​6, 7.) Arẹmiẹn ẹbho Jehova noo rẹ lu ọne iwẹnna nan, ene ẹhi yẹ wo deba bhi ọne iwẹnna. Ele hi ene dia mhan bu ene ẹbho nan ne mhọn ọkhọle esili rẹ luẹ ẹmhọn Jehova. Ọne iwẹnna nan Jehova noo rẹ rẹkpa ọrebhe rẹ lẹn ghe, ọbhahoghe Babilọn Nọn Khua khin, nọn yi oga ohoghe rebhe ne ribhi ọne otọ agbọn nan rebhe. Esu hi ọnọn mọn da ha noo ọle rẹ bha Jehova ohoghe. (Arẹm. 18:​2, 4) Bhi ẹghe nọn bha yẹ ree gbe, a ki dunmhun oga ohoghe rebhe a, sẹyẹ, ọrebhe ne hoẹmhọn Osẹnobulua ki ha re ogẹn nọn khẹke ọle ji ọle.—Arẹm. 17:16.

11. Be mhan ha rẹ sabọ lẹn ẹbho ne gene ga Jehova bhi uwedẹ ẹmhọanta yẹ?

¹¹ Jehova wo ha ne unan ẹbho kẹkẹ bhi otọ ọne agbọn nan rebhe vae bhi agbotu nọnsọle. (Arẹm. 7:​9, 10) Bhi ẹghe nin ele rẹ hẹnmhọn Agbejele, ele da dọ lẹn ghe ẹmhọanta ebi ele luẹ khin, bhiriọ, ele ki da re eghọnghọn deba ẹbho nesi Jehova ha ga ọle. (Mak 13:10) Ẹlẹnan nian, a ki wo dọ lẹn ẹbho ne gene ga Osẹnobulua bhi uwedẹ ẹmhọanta, bi ẹbho ne i ga ọle bhi uwedẹ ẹmhọanta. Malakai nin akhasẹ da yọle: “Bha ki sẹyẹ dọ daghe ikẹkẹ nọn ribhi ẹwẹ ọria nọn khiale bi ọria nọn imhẹn, ọria nọn wo ha ga Osẹnobulua bi ọria nọn iga ọle.” (Mal. 3:18) Ẹbho nesi Jehova wo re uwedẹ nin ele rẹ nyẹnlẹn bi uwedẹ nin ele rẹ tẹmhọn Osẹnobulua rẹ rẹman ghe, ele hi ene ga Osẹnobulua ọsi ẹmhọanta.

12. Be iwẹnna itẹmhọn Osẹnobulua rẹ ha mun iho nọnsi Jehova sẹ yẹ?

¹² Uwedẹ nin mhan rẹ tẹmhọn “ọta nọn mhẹn ọsi Agbejele” wo rẹman ghe imhan lu iwẹnna nin Jesu yọle nin mhan lu, yẹ mun akhasẹ ne ribhi Baibo sẹ. (Mat. 24:14; 28:​18-20) Ranmhude ọne iwẹnna nan, ẹbho ne bunbun bhi otọ ọne agbọn nan rebhe wo dọ ha kiẹn edibo nọnsi Jesu, yẹ zẹ ghe ele dẹ ga Jehova rẹ sẹbhi ighegheghe. Udede isẹhoa nọn rẹji mhan ghe Jehova wo noo mhan rẹ lu ọne iwẹnna nan rẹ mun iho nọnsọle sẹ.

MHAN DẸ SABỌ HA MHỌNLẸN BHI ỌKHỌLE GHE JEHOVA DẸ MUN IVE REBHE NIN ỌLE VELE SẸ

13. Hela Esu manman kpokpo? Bezẹle?

¹³ Ẹkẹ wo manman ha khọ Esu nin Ojuu ranmhude ọle lẹnmhin ghe “obhi ẹghe khere, ọle ki kẹ ọle re” nan rẹ dunmhun ọlẹn an. (Arẹm. 12:​12, 13) Enanzẹle ne ha deba Jesu gbẹloghe bhi okhun, ọle Esu manman wo ha kpokpo. Ele hi “ene re obọ rẹkhan uhi nesi Osẹnobulua, ele hi ene yẹ sọsali nin Jesu.” (Arẹm. 12:17; 14:12) Esu yẹ wo kpokpo ọrebhe ne robọkpa ele bhi ọne iwẹnna nan.

14. Be ha sunu sade Esu mun okhọn bu ẹbho nesi Jehova re? (Fẹ ifoto nọn ribhi odalo ọle ghe.)

¹⁴ Ẹghe nin a ha ki rẹ dunmhun oga ohoghe rebhe a fo, Esu bi ọrebhe ne rẹkhan ọlẹn ki ha guanọ nin ele mun okhọn bu ẹbho nesi Jehova re. Ọne ẹghe nan okhọn Amagẹdọn ha rẹ munhẹn. (Arẹm. 16:​13, 14, 16) Jesu bi ẹbho ne rẹkhan ọlẹn dẹ miẹn ẹbho nesi Jehova fan, yẹ re ọkpẹnlẹn ọbhi ọne agbọn Esu nan sẹsẹsẹ. (Arẹm. 19:​19-21) Bhi ọne ẹghenin, a i da yẹ ha miẹn eria ọbe, ene bha ohoghe la ene hiẹ ẹbho. (Arẹm. 21:8) A ki kpe elin nọnsi Jehova nin Osẹnobulua ọsi ẹmhọanta khia sẹsẹsẹ.

15. Bezẹle nin mhan ha da sabọ ha mhọnlẹn bhi ọkhọle ghe, Jehova dẹ mun ive rebhe nin ọle vele sẹ rẹji ẹghe odalo? (Isaiah 65:​16, 17) (Yẹ fẹ ifoto ghe.)

¹⁵ Ẹlẹnan nian, okugbe i yẹ ribhi ọne agbọn nan. Ọkpakinọn, Jehova wo ha rẹkpa ẹbho nesọle rẹ ha mhọn okugbe bhi ẹwẹ ele. Ọle wo ha ne ẹbho ne hoẹmhọn ẹmhọanta vae bhi azagba-uwa nọnsọle. Emhin soso i ribhọ nọn ha sabọ mun Jehova mhọn nin ọle hẹi nan erọnmhọn ọbhi iwẹnna obọ nọnsele bi iwẹnna itẹmhọn Osẹnobulua nin ele lu. (Tie Isaiah 65:​16, 17.) Ọkhẹke nin mhan ha mhọnlẹn bhi ọkhọle ghe, Jehova dẹ mun ive nin ọle vele sẹ. Ọta nin Pọl nin odibo tale bhi Rom 8:​38, 39 dẹ sabọ ko mhan udu re. Enin yọle: “Emhin iribhọ nọn ha zẹ Osẹnobulua bha yẹ hoẹmhọn mhan. Uu ida sabọ, iẹnlẹn ida sabọ, ẹhi ida sabọ, ugbẹloghe ida sabọ, emhin ne sunu nian la ene ha sunu bhi ẹghe odalo ida sabọ, ahu ida sabọ, emhin ne yoyo ida sabọ, emhin ne dinmhin ida sabọ, emhin soso nan manlẹn ida sabọ. Emhin soso iribhọ nọn ha zẹ Osẹnobulua bha yẹ re oyẹẹ nọnsọle man mhan, rẹ na obọ Jesu Kristi nin Ebeanlẹn mhan.”

16. Bezẹle nin uwẹ da re ọkhọle rebhe mun udu nyan Jehova?

¹⁶ Emhin ne bunbun ribhọ ne zẹle nọn da khẹke nin mhan mun udu nyan Jehova nin Osẹ ọsi ẹmhọanta. Ọle hi Aman nọn man mhan. Sẹyẹ, ọle wo manman hoẹmhọn mhan. Ọle wo ha koko ẹbho ne bunbun vae bhi agbotu nọnsọle nin ele dọ ha ga ọle bhi uwedẹ ẹmhọanta. (Isa. 60:22; Zech. 8:23) Mhan lẹn ghe ọle manman wo mun ive nesọle sẹ. Bhi ẹghe nọn bha yẹ ree gbe, ọle dẹ gbe Esu khuelo, beji a ha da miẹn ghe ọle bha yẹ ha hiẹ ẹbho. Bọsi Devid, mhan bhii ghe nin ọrebhe “gẹn Osẹnobulua nin Jehova, . . . nin ọle ọkpa sabọ lu emhin ọhan-ilo kẹkẹ. [Nin ọrẹbhe] gẹn elin nọn khua nọnsọle rẹ sẹbhi ighegheghe. [Nin] uyi nọnsọle gba ọne otọ nan rebhe.”—Ps. 72:​18, 19.