Be Mhan Ha Lu Nin Mhan Rẹ Rẹman Ghe Izọese Nọnsi Jesu Ti Mhan Bhọ?

1-2. Beji a miẹn Jesu re iẹnlẹn nọnsọle zọese nin mhan, be ọkhẹke nin mhan lu? (2 Kọrint 5:​14, 15) (Yẹ fẹ ifoto ghe.)

AHAMIẸN uwẹ hi ọne okpea nan tẹmhọnlẹn bhi uhọnmhọn-ọta nọn gbera nin uwa shiẹn nyan, ọkpakinọn, ọria da dọ hinmhin uwẹ re sibhi ẹkẹ ọle re, be ẹmhọn ọne ọria ha dia uwẹ bhi egbe yẹ? Edandan i ribhọ ghe uwẹ dẹ wo manman khuẹnmhẹn ọne ọria, yẹ ji ọle lẹn ghe uwẹ i da ye ebi ọle lu nin uwẹ a ghẹdẹ.

² Beji mhan ka luẹ bhi uhọnmhọn-ọta nọn gbera, ọ khia bhi ẹlo a ghe mhan i da sabọ tobọmhan hinmhin egbe mhan bhi obọ emhin ebe bi uu. Ọkpakinọn, Jehova da hinmhin mhan. Ọle da ji Jesu re nin ọle dọ yu nin mhan beji ọle ha da (1) re emhin ebe nesẹmhan rẹhunmhan mhan (2) rẹkpa mhan rẹ sabọ ha mhọn ọne ikhuaẹloghe ghe, mhan dẹ kiẹn eria nọn gba nan bhi ẹghe odalo, bi (3) rẹ kie sabọ deba ọle ha mhọn ikolu nọn mhẹn. Ranmhude izọese nọnsi Jesu, mhan mhọn ọne ikhuaẹloghe nin mhan rẹ nyẹnlẹn bhi agbejele nọnsi Jehova. Bhi ọsi ẹmhọanta, izọese nọnsi Jesu rẹman ghe, Jesu wo hoẹmhọn eria, ọle mhọn ọne oyẹẹ nan da mhan ọkuẹsẹ ọle vae bhi ọne otọ nan. (Prov. 8:​30, 31) Pọl nin odibo da gbẹn yọle ghe, “oyẹẹ nin Kristi mhọnlẹn, ọle re mhan lu emhin nin mhan lu.” (Tie 2 Kọrint 5:​14, 15.) Ọnan rẹman ghe ọkhẹke nin mhan ji ebi Jesu lu nin mhan ha ti mhan bhọ, yẹ wo ha ria ẹmhọnlẹn ẹghe rebhe.

3. Bezẹle nin ene emhin nin mhan zẹ rẹ lu nin mhan rẹ rẹman ghe izọese nọnsi Jesu ti mhan bhọ ha da sabọ dikẹ bhi ọsi ẹbho ebhebhe?

³ Be oyẹẹ nin Jesu mhọn da uwẹ ha re uwẹ lu? Ebi ọ ha re uwẹ lu sabọ rẹ dikẹ bhi ọsi ẹbho ebhebhe. Nin mhan rẹ lẹn ebezẹle nọn da dia iriọ, bha ji mhan fẹ ọne ijiẹmhin nan ghe. Ji a man yọle ghe itue ea ne nyẹnlẹn bhi ije kẹkẹ ho nin ele diọbhi ijan ọkpa. Beji a miẹn ọ i yi ijan ọkpa ele ye, uwedẹ kẹkẹ ele da rẹkhan, nin ele rẹ sabọ sẹbhi eji ele khian. Iriọ yẹ nọn. Ebi ikolu nin uwẹ bi Jehova ko mhọnlẹn diaye nian, ọle ha rẹman si uwẹ ji izọese nọnsi Jesu ti uwẹ bhọ. Beji mhan ki mhọn ọnin bhi ọkhọle, bha ji mhan zilo nyan usun ẹbho ea: (1) Eria nin mhan man ele Baibo, (2) ene mianmẹn, bi (3) ene zobọ bhọ rẹ ha ga Jehova.

ERIA NAN MAN ELE BAIBO

4. Be ẹmhọn eria ne luẹ Baibo dia Jehova yẹ bhi egbe?

⁴ Ahamiẹn ọria nan man ọlẹn Baibo nian uwẹ khin, ria eria nyan ọnan: Nin uwẹ rẹ ka nin uwẹ rẹ ha luẹ Baibo rẹman ghe, uwẹ deba eria nin Jehova ha rẹkpa rẹ sabọ deba ọle ha mhọn ikolu. (Jọni 6:44; Iwẹn. 13:48) “Jehova hi ọnọn fẹ ọkhọle ghe.” Ọnan rẹman ghe, Jehova daghe uwedẹ nin uwẹ rẹ ha dọnmhegbe rẹ sabọ ha luẹ ẹmhọnlẹn. Sẹyẹ, ọ re ọle ghọnghọn rẹ daghe uwedẹ nin uwẹ rẹ ha fi emhin denọ bhi iẹnlẹn nọnsẹ, beji uwẹ ha da sabọ ha nyẹnlẹn bhi uwedẹ nin ọle guanọ. (Prov. 17:3; 27:11) Izọese nọnsi Jesu, ọle zẹle nin uwẹ da sabọ dọ kiẹn ọmọẹ Jehova. (Rom 5:​10, 11) Hẹi ye ọnan a ghẹdẹ.

5. Be eria nan man ele Baibo ha rẹ re obọ rẹkhan adia nọn ribhi Filipai 3:16 yẹ?

⁵ Ahamiẹn ọria nan man ọlẹn Baibo uwẹ khin, be uwẹ ha lu nin uwẹ rẹ rẹman ghe izọese nọnsi Jesu ti uwẹ bhọ? Emhin ọkpa nin uwẹ ha lu hi, nin uwẹ rẹ re ọbọ rẹkhan adia nin Pọl nin odibo re nin Kristiẹn ne ribhi Filipai. Ọle da taman ele yọle: “Uwedẹ nọn hi ki rẹ khin nin mhan da sẹ lu re alo, bha ji mhan wo re obọ iriọ.” (Fil. 3:16) Inian Baibo ọbhebhe rẹ zedu ọne ulọnlẹn nan. Ọ da yọle: “Ọkhẹke nin mhan wo ha khian khian bhi ọne uwedẹ nan nin mhan ye nian.” Beji ọne Baibo nan rẹman, hẹi ji emhin soso de uwẹ idobolo rẹ ha khian bhi ọne uwedẹ nọn ha sabọ re iẹnlẹn nin uwẹ.—Mat. 7:14; Luk 9:62.

6. Be eria nan man ele Baibo ha sabọ lu sade ọ nọghọ ele rẹ rẹọbhi ebi ele luẹ bhi Baibo la fi emhin denọ bhi iẹnlẹn nọnsele? (Deuteronomy 30:​11-14) (Yẹ fẹ ifoto ghe.)

⁶ Be uwẹ ha lu yẹ sade ọ nọghọ uwẹ rẹ rẹọbhi iman-emhin nin uwẹ la luẹ ẹmhọnlẹn bhi Baibo? Ebe uwẹ ha sabọ lu hi, nin uwẹ rẹ manman gua otọ ọne iman-emhin, yẹ bhii Jehova nin ọle rẹkpa uwẹ rẹ sabọ lẹn otọle nọnsẹn. (Ps. 86:11) Ahamiẹn ọ sẹyẹ nọghọ uwẹ rẹ lẹn otọ ọne iman-emhin arẹmiẹn uwẹ lu ene emhin nan, uwẹ sabọ rẹ zọbọ fo, ọkpakinọn, hẹi zobọ bhọ rẹ ha luẹ Baibo. Asabọmiẹn beji ẹghe ha rẹ ha khian, uwẹ dẹ lẹn otọle. Ahamiẹn ọ nọghọ uwẹ rẹ re obọ sibhi emhin nin Jehova hele re kii? Ọ ha yi riọ, yere ghe ẹghe i ribhọ nin Jehova ha rẹ yọle nin mhan lu emhin nọn nẹ mhan ahu. Uwẹ dẹ sabọ ha nyẹnlẹn bhi uwedẹ nin Jehova guanọ. (Tie Deuteronomy 30:​11-14.) Rẹ deba ọnin, Jehova ve ghe ọle dẹ rẹkpa uwẹ. (Isa. 41:​10, 13; 1 Kọr. 10:13) Bhiriọ, hẹi ji egbe lọ uwẹ. Hẹi dọ ha kpokpo egbe gbe ba ẹmhọn emhin ne bha lẹkhẹ nin uwẹ rẹ lu. Sokpan, wo ha ria ẹmhọn emhin esili kẹkẹ nin Jehova sẹ lu nin uwẹ manman nọn ẹmhọn izọese nọnsi Jesu. Beji oyẹẹ nin uwẹ mhọn da Jehova ha rẹ ha ziẹn ọbhọ, uwẹ ki dọ kere ghe “Uhi nesọle bha nọghọ gbe nan rẹ re obọ rẹkhan.”—1 Jọni 5:3.a

7. Be ibhokhan nin aba ele bi inẹn ele yi Esali Jehova ha sabọ ria eria nyan?

⁷ Ibha nin ibhokhan nin aba ele bi inẹn ele yi Esali Jehova kii? Ibha deba eria nan man ele Baibo nin mhan tẹmhọnlẹn. Bhi ọsi ẹmhọanta, ibha eria ne khẹke nin aba bha bi inẹn bha ka man ọlẹn Baibo ọkuẹsẹ ele dọ ha man ẹbho Baibo bhi ole. Baibo yọle ghe: “Bha sikẹ Osẹnobulua, ọle ki yẹ sikẹ bha.” (Jem. 4:8; 1 Chron. 28:9) Ahamiẹn uwẹ dọnmhegbe rẹ ha lu emhin ne ha re uwẹ sikẹ Jehova, Jehova tobọle ki yẹ sikẹ ẹ. Ọ i yi ranmhude ghe azagba-uwa nọnsẹ yi Esali Jehova zẹle Jehova si uwẹ kẹ egbe, sokpan, ranmhude ọle guanọ nin uwẹ ha yi ọmọẹ ọle zẹle. Bezẹle nin uwẹ da sabọ deba Jehova ha mhọn ikolu nọn sẹnian? Izọese nọnsi Jesu ọle hi emhin nọn zẹle. Hẹi ye ọnan an ghẹdẹ. (Rom 5:​1, 2) Bhiriọ, ọkuẹsẹ a lu Ayere Ọsi Uyumhin Nọnsi Jesu bhi ọne ukpe nan, ria eria nyan ebi Jehova bi Jesu lu nin uwẹ. Ji ọnan re uwẹ ria ẹmhọn ebi uwẹ ha re iẹnlẹn nọnsẹ lu la emhanmhan nin uwẹ ha khu ọi bhi oga, nin uwẹ rẹ rẹman Jehova ghe emhin nin ọle lu nin uwẹ ti uwẹ bhọ.b

ENE MIANMẸN

8. Be ene mianmẹn sẹ rẹ rẹman yẹ ghe izọese nọnsi Jesu ti ele bhọ?

⁸ Ahamiẹn uwẹ ki mianmẹn fo, edandan i ribhọ ghe uwẹ sẹ wo lu emhin ne bunbun nin uwẹ rẹ rẹman ghe izọese nọnsi Jesu ti uwẹ bhọ. Bhi ọsi ijiẹmhin uwẹ wo lu emhin kẹkẹ beji uwẹ ha da sabọ deba Jehova ha mhọn ikolu, yẹ rẹ ha nyẹnlẹn bhi uwedẹ nin ọle guanọ. Uwẹ da re obọ rẹkhan uhi nin Jesu gbe nin mhan. Nin mhan rẹ ha tẹmhọn ebi mhan rẹọ i man ẹbho. Uwẹ da re egbe guẹ nin Jehova yẹ mianmẹn. Asabọmiẹn uwẹ bhọ sẹ kuẹlo da ekpokpo nin uwẹ rẹ zẹ nin uwẹ rẹ ha ga Jehova. (2 Tim. 3:12) Ọrẹyiriọ, uwẹ da sẹyẹ sun rẹkhan Jehova. Ọnan rẹman ghe uwẹ hoẹmhọn Jehova, sẹyẹ, izọese nọnsi Jesu ti uwẹ bhọ.—Hib. 12:​2, 3.

9. Emhin nela ọkhẹke nin uwẹ da ha babegbe sade uwẹ mianmẹn fo?

⁹ Ahamiẹn ọ bue nin uwẹ mianmẹn, ọkhẹke nin uwẹ ha babegbe. Bezẹle? Ranmhude beji ẹghe ha rẹ ha gbera, ọ dẹ sabọ sunu ghe uwẹ bha yẹ ha re ẹlo nọn ghanlẹn ghe izọese nọnsi Jesu. Be ọnan ha rẹ sabọ sunu yẹ? Ria ẹmhọn ebe sunu ji Kristiẹn ne ha ribhi Ẹfẹsọs bhi ore nin ọhẹnhẹn. Jesu da wo manman khuẹnmhẹn ele bhi iziẹngbe nin ele ha mhọn. Ọrẹyiriọ, ọle da taman ele yọle: “Emhin ribhọ nin [ibha] lu nọn bha yẹẹ mẹn. [Ibha] iyẹ re oyẹẹ man beji [ibha] ka rẹ re oyẹẹ man khẹ.” (Arẹm. 2:​3, 4) Ọta nin Jesu tale rẹman ghe, ọ dẹ sabọ sunu ghe ọria nọn ga Jehova bha yẹ ha re ọkhọle rebhe rẹ ga Jehova beji ọle ka lu khẹ. Ọria nọn sẹnian sabọ rẹ ha nan erọnmhọn, yo ikolo oga yẹ dagbare bhi inẹbho, ranmhude ọle riale ghe emhin nọn khẹke nan lu nọn. Ọkpakinọn, ọle i yẹ re oyẹẹ lu ebi ọle lu. Be ọkhẹke nin uwẹ lu sade uwẹ riale ghe oyẹẹ nin uwẹ mhọn da Jehova bha yẹ ziẹn sẹ bii ọnikhẹ?

10. Be uwẹ ha rẹ sabọ re obọ rẹkhan adia nin Pọl re nin Timoti yẹ? (1 Timoti 4:​13, 15)

¹⁰ Pọl nin odibo da taman Timoti nin ọle “ha ria eria nyan” uwedẹ kẹkẹ nin ọle rẹ ga Jehova, sẹyẹ, nin ọle “mun ọkhọle rebhe ọbhọ.” (Tie 1 Timoti 4:​13, 15.) Beji adia nin Pọl re nin Timoti rẹman, dọnmhegbe ria ebi uwẹ ha lu rẹ re oga nin uwẹ re ji Jehova mhẹn gbera ọnikhẹ, beji ‘ẹlinmhin nọn khiale ha da ha re uwẹ sasa.’ (Rom 12:11) Bhi ọsi ijiẹmhin, uwẹ sabọ rẹ zẹ nin uwẹ rẹ manman re ẹghe ọbhi otọ rẹ ha muegbe ikolo oga. Ọnan ki rẹkpa uwẹ rẹ ha mun ọkhọle ọbhi ebi a luẹ bhi enin. La uwẹ sabọ rẹ zẹ nin uwẹ rẹ diọbhi eji uwẹ ọkpa ha da ha ribhi ọsẹ, sade uwẹ ho nin uwẹ lu iluẹmhin Baibo nọnsẹ. Ọnan ki re otọ nin uwẹ rẹ sabọ ria eria nyan ebi uwẹ luẹ, yẹ wo manman ha miẹn elele bhọ. Beji ọria rẹ kuẹ ọbhi eranlẹn beji ọ ha da manman ha bhala, iriọ ọ rẹ khẹke nin uwẹ rẹ ha lu ene emhin nin mhan tẹmhọnlẹn nan, beji uwẹ ha da sabọ wo ha mhọn ọtibhọ da izọese nọnsi Jesu bi emhin rebhe nin Jehova sẹ lu nin uwẹ. Rẹ deba ọnin, beji iluemhin ọsi Ayere Ọsi Uyumhin Nọnsi Jesu ha rẹ ha sire, uwẹ sabọ zẹ nin uwẹ rẹ ria eria nyan ene emhin ne re iẹnlẹn nọnsẹ mhẹn an ranmhude nin uwẹ rẹ yi ọkpa bhi Esali Jehova. Ọnan dẹ rẹkpa uwẹ rẹ wo ha ziẹn ọtibhọ nin uwẹ mhọn da izọese nọnsi Jesu, nọn re ọne isẹhoa nin uwẹ rẹ sabọ deba Jehova ha mhọn ikolu.

11-12. Ahamiẹn uwẹ i yẹ sasa bhi oga, ọnin be rẹman ghe uwẹ i yẹ mhọn ẹlinmhin nọn khiale nọnsi Osẹnobulua? Re otọle man. (Yẹ fe ifoto ghe.)

¹¹ Ahamiẹn uwẹ i yẹ sasa bhi oga beji uwẹ ka lu khẹ, hẹi ji ọ re egbe lọ uwẹ la ha riale ghe uwẹ i yẹ mhọn ẹlinmhin nọn khiale nọnsi Osẹnobulua. Ye ẹmhọn nin Pọl nin odibo taman Kristiẹn ne ribhi Kọrint re rẹji iwẹnna itẹmhọn Osẹnobulua nin ọle ha lu. Ọle da yọle: “Aharẹmiẹn ghe ranmhude oko nọn zẹle nin mẹn da lu ọle, ẹsọn nọn khua a yẹ mun mẹn bhi obọ.” (1 Kọr. 9:17) Be Pọl ha tẹmhọnlẹn?

¹² Ẹghe wo ha ribhọ nọn bha rẹ ha hu Pọl bhi udu rẹ ha tẹmhọn Osẹnobulua. Arẹmiẹn ọ bha ha hu ọle bhi udu, ọle da sẹyẹ dọnmhegbe rẹ ha lu ọle. Uwẹ dẹ sabọ re egbe khọkhọ Pọl. Wo dọnmhegbe rẹ ha lu emhin ne khẹke aharẹmiẹn ọ i hu uwẹ bhi udu. Bhiriọ, bhii Jehova nin ọle “re ọhubhudu bi ahu nin [uwẹ] rẹ ha lu ọle.” (Fil. 2:13) Wo ha lu ene emhin ne rẹkpa uwẹ rẹ sabọ ha sikẹ Jehova. Ha mhọnlẹn bhi ọkhọle ghe beji ẹghe ha rẹ ha khian, oyẹẹ nin uwẹ mhọn da Jehova dẹ kie ziẹn ọbhọ, sẹyẹ, uwẹ ki sabọ dọ ha mhọn ọne ọyaya nin uwẹ ka ha mhọn khẹ.

13. Be mhan ha rẹ ha fẹghe yẹ si mhan “sẹyẹ mun oga mhọn nọnsẹn”?

¹³ Rẹ na ẹghe rẹ sẹ ẹghe, ọ dẹ ha mhẹn nin mhan rẹ re adia nọn ribhi 2 Kọrint 13:5 rẹ ha fẹ egbe mhan ghe. Bhi enin Pọl da yọle: “Bha wo ha fẹ egbe bha ghe, nin bha rẹ lẹn si bha sẹyẹ mun oga mhọn nọnsẹn. Bha wo ha fẹ egbe bha ghe nin bha re lẹn unan eria nin bha gene khin.” Rẹ na ẹghe rẹ sẹ ẹghe, mhan sabọ rẹ ha nọọn egbe mhan inọnta ne sẹnian: ‘Uwedẹ nin mẹn rẹ nyẹnlẹn be rẹman ghe ẹmhọn Agbejele mẹn mun kalo bhi iẹnlẹn?’ (Mat. 6:33) ‘Emhin nin mẹn noo rẹ re egbe re ahoho be rẹman ghe, mẹn he emhin ne i mhẹn?’ (Ps. 97:10) ‘Emhin nin mẹn lu be rẹman ghe mẹn khu ọbhọ nin ọfure bi okugbe rẹ ha ribhi agbotu?’ (Ẹfẹ. 4:​2, 3) Inọnta ne khẹke nin mhan ria eria nyan bhi ọne ẹghe nan, nan ha rẹ lu Ayere ọsi Jesu Kristi khenan. Mhan ha ria eria nyan ebi Jehova bi Jesu lu nin mhan, mhan ki ha guanọ nin mhan rẹman Jehova ghe, ebi ọle lu ti mhan bhọ. Sẹyẹ, mhan ki ha guanọ nin mhan rẹman Jesu ghe ọle mhan ki nyẹnlẹn nan, ghe mhan i yẹ nyẹnlẹn nin egbe mhan.c

ENE ZOBỌ BHỌ RẸ HA VAE BHI IKOLO OGA

14. Emhin eso nela ha sabọ zẹ ibhio mhan bha yẹ ha vae bhi ikolo oga?

¹⁴ Ibhio mhan eso sẹ wo zobọ bhọ rẹ ha ga Jehova. A bhọ sabọ miẹn ọ reele nin eso bhi ẹwẹ ele mọn da ga Jehova ọkuẹsẹ ọnan sunu. Bezẹle nin ọnan da sunu? “Ẹmhọn iẹnlẹn” re eso zobọ bhọ rẹ ha vae bhi ikolo oga. (Luk 21:34) Ọta la emhin nin obhio mhan lu re eso ebhebhe lu iriọ. (Jem. 3:2) Sẹyẹ rẹji eso, emhin ebe nọn kaka nin ele lu nin ele bha ho nin ele ta dagbare zẹle nin ele bha yẹ da ha vae bhi ikolo oga. Ahamiẹn ọkpa bhi ene emhin nan la emhin ebhebhe zẹle nin uwẹ bha yẹ da ha vae bhi ikolo oga, be uwẹ ha lu rẹ kie sabọ dọ deba azagba-uwa nọnsi Jehova? Be izọese nọnsi Jesu ha re uwẹ lu?

15. Be Jehova rẹ rẹman yẹ ghe ẹmhọn eria ne zobọ bhọ rẹ ha vae bhi ikolo oga sẹyẹ rẹtẹ ọle? (Ezekiel 34:​11, 12, 16)

¹⁵ Ria eria nyan ebi ẹmhọn eria ne zobọ bhọ rẹ ha vae bhi ikolo oga dia Jehova yẹ bhi egbe. Ọle bha fikekegbe ele. Ọle guanọ ihuan nesọle ne yulua. Ọle gbẹloghe ele yẹ rẹkpa ele rẹ sabọ fikie bu ọle re. (Tie Ezekiel 34:​11, 12, 16.) A bhọ sabọ miẹn ọnan hi emhin nin Jehova lu nin uwẹ nian. Bezẹle mhan ta riọ? Ranmhude uwẹ sẹyẹ ha tie ọne ebe ọkhẹughe nan. Ọnan rẹman ghe uwẹ sẹyẹ guanọ nin uwẹ ha lu ebe ti Jehova bhọ. Beji Jehova rẹ daghe emhin nọn mhẹn bhi egbe nọnsẹ ẹghe nin ọle rẹ tie uwẹ vae bhi agbotu nọnsọle, iriọ ọle yẹ rẹ daghe emhin nọn mhẹn bhi egbe nọnsẹ nian. Ọle guanọ nin uwẹ fikie bu ọle re.

16. Be ha rẹkpa eria ne i yẹ vae bhi ikolo oga ha rẹ sabọ fikie bu Jehova re? (Yẹ fẹ ifoto ghe.)

¹⁶ Dọnmhegbe ria eria nyan ene ọta ikoudure nan ne ribhi obọ ọkpa bhi ọne ebe natiọle Return to Jehovah. Enin yọle: “Ha mhọnlẹn bhi ọkhọle ghe Jehova dẹ rẹkpa uwẹ beji uwẹ rẹ dọnmhegbe rẹ fikie bu ọle re. Ọle dẹ rẹkpa uwẹ rẹ sabọ ha khọn emhin ne re uwe kpokpo egbe. Ọ dẹ rẹkpa uwẹ rẹ de ọkhọle re beji a ha da miẹn ghe, emhin nin obhio mhan lu uwẹ le bhi ẹghe nọn gbera bha yẹ ha re ẹkẹ khọ uwẹ. Sẹyẹ, ọle dẹ rẹhunmhan uwẹ yẹ rẹkpa uwẹ rẹ kie sabọ ha mhọn ọkhọle nọn khia. Ọnan ki re ọle lẹkhẹ nin uwẹ rẹ kie sabọ deba ibhio uwẹ ha ga Jehova.” Rẹ deba ọnan, yere ghe ene ewanlẹn muegbe nin ele rẹ rẹkpa uwẹ. Inian ele “diabe eji a da nẹko sade ahoho na, Eji a da nẹhe sade amẹn rọlọ.” (Isa. 32:2) Nin uwẹ rẹ rẹman ghe izọese nọnsi Jesu ti uwẹ bhọ, uwẹ sabọ rẹ nọọn egbe ẹ ọne inọnta nan, ‘Be mẹn ha lu nian beji mẹn ha da sabọ kie deba Jehova ha mhọn ikolu nọn mhẹn?’ (Isa. 1:18; 1 Pita 2:25) Bhi ọsi ijiẹmhin, uwẹ dẹ be sabọ diọbhi ikolo oga dọ deba ibhio uwẹ ga bhi enin? Uwẹ dẹ sabọ bu ene ewanlẹn dọ taman ele ghe uwẹ guanọ urẹkpa nin uwẹ rẹ sabọ fikie bu Jehova re? Uwẹ ha lu iriọ, ele sabọ rẹ mhanmhanlẹn nin ọria rẹ ha man uwẹ Baibo bhi ẹkẹ ẹgheso. Uwẹ dẹ sabọ ha mhọnlẹn bhi ọkhọle ghe, Jehova dẹ nan erọnmhọn nin uwẹ bhi emhin rebhe nin uwẹ lu rẹ sabọ fikie bu ọle re, yẹ rẹ rẹman ghe izọese nọnsi Jesu ti uwẹ bhọ.

BE UWẸ MUEGBE NIN UWẸ RẸ LU?

17-18. Be mhan ha rẹ sabọ noo ẹghe nọnsẹmhan nọnsẹn yẹ beji mhan rẹ muegbe iluemhin Ọsi Ayere Ọsi Jesu bhi ọne ukpe nan?

¹⁷ Jesu da yọle ghe “beji a ha da miẹn ghe, ọrebhe ne mhọn urẹọbhọ da ọle ki ha mhọn iẹnlẹn ọsi ighegheghe,” ọle zẹle nin Jehova da je ọle re nin ọle dọ yu nin eria. (Jọni 3:16) Izọese nọnsi Jesu, ọle hi ebi Jehova rẹ hinmhin mhan bhi obọ emhin ebe bi uu. Ọ bha khẹke nin mhan ye ọnan a ghẹdẹ. (Rom 3:​23, 24; 2 Kọr. 6:1) Beji Ayere Ọsi Uyumhin Nọnsi Jesu ha rẹ ha sire, re ẹghe ọbhi otọ rẹ ria eria nyan oyẹẹ nin Jehova bi Jesu mhọn da uwẹ. Uwẹ ha yẹ rẹman ele ghe emhin nin ele lu nin uwẹ ti uwẹ bhọ.

¹⁸ Be uwẹ ha lu nin uwẹ rẹ rẹman ghe izọese nọnsi Jesu ti uwẹ bhọ? Ewanniẹn nọnsẹ rẹji ọne inọnta nan sabọ rẹ dikẹ bhi ọsi ọria ọbhebhe. Ọkpakinọn, uwẹ dẹ sabọ ha mhọnlẹn bhi ọkhọle ghe, Jehova dẹ nan erọnmhọn nin uwẹ bi ibhio mhan bhi ọne otọ agbọn nan rebhe bhi uwedẹ nin bha rẹ dọnmhegbe, ranmhude, ibha i yẹ nyẹnlẹn nin egbe bha, Jesu Kristi nọn yu nin bha ibha ki nyẹnlẹn nan.—2 Kọr. 5:15.