“ Bha Wẹnna kaka nin bha rẹ gbega okugbe nin ẹlinmhin nọn khiale rẹkpa bha rẹ ha mhọnlẹn”
PỌL nin odibo da taman Kristiẹn ne ribhi Ẹfẹsọs yọle: “Bha ha gbekua nin ẹbho, bha ha yẹ ha rẹ oyẹẹ man egbe. Bha ha mhọn ọfure bhi ẹwẹ bha, bha wẹnna kaka nin bha rẹ gbega okugbe nin ẹlinmhin nọn khiale rẹkpa bha rẹ ha mhọnlẹn.”—Ẹfẹ. 4:2, 3.
Ranmhude ahu ẹlinmhin nọn khiale nọnsi Osẹnobulua, ọle zẹle nin okugbe da ribhi ẹwẹ mhan. Ọrẹyiriọ, ọkhẹke nan ha gbega ọne okugbe nan beji Pọl tale. Họla da ha gbega ọle? Bhi ọsi ẹmhọanta, ọkhẹke nin ọdeọde bhi ẹwẹ Kristiẹn lu eka nin ele ha sabọ lu rẹ “gbega okugbe nin ẹlinmhin nọn khiale rẹkpa [mhan] rẹ ha mhọnlẹn.”
Nan rẹ re ijiẹmhin ọbhọ, ji a man yọle ghe ọria dẹ moto mun nin uwẹ. Họla da ha gbẹloghe ọne moto? Mhan lẹn ọne ewanniẹn. Ahamiẹn ọne moto riia, mhan i da ha khọẹkẹ ọnọn dẹ ọne moto nin mhan, ranmhude, imhan hi ọnọn bha gbẹloghe ọle nọnsẹn.
Iriọ sẹyẹ nọn. Ẹsele nọn na bhi obọ Osẹnobulua vae, ọle okugbe nọn ribhi ẹwẹ mhan khin. Obọ ọdeọde bhi ẹwẹ mhan ọ ye nin mhan rẹ ha gbega ọle. Ahamiẹn imhan bi obhio mhan nọn hi ki rẹ khin ko gui, ọkhẹke nin mhan nọọn egbe mhan yọle, ‘Imẹn be lu eka nin mẹn ha sabọ lu rẹ deba obhio mẹn ha khu ọbhi ọfure, beji okugbe ha da ha ribhi ẹwẹ mhan?’
‘BHA WO WẸNNA KAKA’ RẸ GBEGA OKUGBE NỌN RIBHI ẸWẸ BHA
Beji Pọl tale, asabọmiẹn ọ dẹ khẹke nin mhan wẹnna kaka, beji mhan ha da sabọ gbega okugbe nin ẹlinmhin nọn khiale rẹkpa mhan rẹ ha mhọnlẹn. Ọ wo khẹke nin mhan manman lu iriọ sade obhio mhan nin okpea la nin okhuo lu emhin nọn re ẹkẹ khọ mhan. Ahamiẹn mhan bu ọne ọria dọ taman ọlẹn ebi emhin nin ọle lu mhan le dia mhan yẹ bhi egbe, ọle mhan ha be rẹ rẹman ghe mhan khu ọbhi ọfure? Eye. Nọọn egbe uwẹ yọle, ‘Ahamiẹn imẹn lu iriọ, ọ dẹ be rẹman ghe imẹn khu ọbhi ọfure, la ọ dẹ be re ọne ẹmhọn ha khọ ọbhọ?’ Ẹgheso, emhin nọn khẹke nin mhan lu hi, nin mhan rẹ mun ọne ẹmhọn fia, yẹ rẹhunmhan.—Prov. 19:11; Mak 11:25.
Nọọn egbe uwẹ yọle, ‘Ahamiẹn imẹn lu iriọ, ọ dẹ be rẹman ghe imẹn khu ọbhi ọfure, la ọ dẹ be re ọne ẹmhọn ha khọ ọbhọ?’
Beji Pọl nin odibo tale, bha ji mhan wo ha “gbekua nin ẹbho, [mhan] ha yẹ ha rẹ oyẹẹ man egbe.” (Ẹfẹ. 4:2) Ebe ọkpa da yọle ghe, a dẹ yẹ sabọ ta ene ẹmhọn nan bhi uwedẹ ọbhebhe yọle, “miẹn ele ọbhi egbe beji ele dia.” Ebi ọnan mundia nan hi, nin mhan ha mhọnlẹn bhi ọkhọle ghe, ọ bha gba nin ibhio mhan fo, beji ọ bha rẹ gba nin mhan fo. Bhi ọsi ẹmhọanta, imhan wo dọnmhegbe rẹ “mun akpa ọsọgbọn yọ.” (Ẹfẹ. 4:23, 24) Ọrẹyiriọ, mhan soso i da wo sabọ lu iriọ rẹ sẹbhọ ghe mhan bha dobọ. (Rom 3:23) Ahamiẹn mhan rẹọbhọ ghe ọ bha gba nin mhan fo, ọ ki lẹkhẹ nin mhan rẹ sabọ ha mhọn iziẹngbe yẹ rẹhunmhan egbe. Sẹyẹ, mhan ki sabọ ha “wẹnna kaka nin [mhan] rẹ gbega okugbe nin ẹlinmhin nọn khiale rẹkpa [mhan] rẹ ha mhọnlẹn.”
Ahamiẹn mhan dọnmhegbe rẹ ha rẹhunmhan, yẹ gbo emhin-ebe nin ọria lu mhan le sibhi ọkhọle re, ọ ki rẹkpa mhan rẹ sabọ ha mhọn ‘ọfure bi okugbe.’ Ọne ukpọta Grik nan zedu ọle diọbhi “okugbe” nan tẹmhọnlẹn bhi Ẹfẹsọs 4:3, a dẹ yẹ sabọ re ọle tẹmhọn emhin kẹkẹ bhi egbe ne rẹkpa uguẹ rẹ kugbe. Iriọ sẹyẹ nọn. Oyẹẹ nin mhan mhọn da ibhio mhan, bi ọfure nọn ribhi ẹwẹ mhan, ọle rẹkpa mhan rẹ yẹ deba ele ha ribhi okugbe, aharẹmiẹn ghe ele lu mhan emhin nọn ba mhan bhi egbe.
Bhiriọ, ahamiẹn obhio ẹ bhi agbotu lu emhin nọn re ẹkẹ khọ ẹ, dọnmhegbe re ẹkẹ-ẹjẹjẹ rẹhunmhan ọlẹn. Hẹi wo denọ ẹlo ọbhi emhin nọn i mhẹn nin ọle lu uwẹ le. (Kol. 3:12) Beji a miẹn ghe ọ bha gba nin ọrebhe fo, asabọmiẹn uwẹ bhọ sẹ ka lu emhin nọn re ẹkẹ khọ ọria khẹ. Ahamiẹn uwẹ mhọnlẹn bhi ọkhọle ghe, ọ bha gba nin ọrebhe, ọ ki rẹkpa uwẹ rẹ sabọ “wẹnna kaka nin [uwẹ] rẹ gbega okugbe nin ẹlinmhin nọn khiale rẹkpa [mhan] rẹ ha mhọnlẹn.”