Ebe Ha Sabọ Rẹkpa Ikhuo Nan Lu Khọlọ

Iriọ ebe natiọle Ebe Ha Sabọ Rẹkpa Ikhuo Nan Lu Khọlọ—Ebi Baibo Tale (“Women’s Safety—The Bible’s Perspective”), nọn ribhi jw.org rẹ munhẹn. Linki ọkpa ribhi eje kike bhi ọne ebe nin uwẹ ha rẹ sabọ danlod ọle. Uwẹ ha danlod ọle fo, uwẹ dẹ sabọ print ọle yẹ khi ọle bhi ijanlẹn enẹn bọsi itrati. Rẹji ọne ebe nan, obhio mhan nin okhuo ọkpa natiọle Stacy, nọn ribhi United States da yọle: “Imẹn da printi eso bhi ọne ebe nan. Imẹn ki lu iriọ fo, imẹn bi obhio mhan nin okhuo ọkpa da ne ọne ebe ha khian eji a da gbẹloghe ikhuo nan lu khọlọ bhi agọ nin mhan da tẹmhọn Osẹnobulua.”

Ọria ọkpa nọn wẹnna bhi enin da yọle nan ne eso bhi ọne trati nin ọle nin ọle miẹn ne nin ikhuo nekẹle ne ribhi ọne uwa nan da gbẹloghe ikhuo nan lu khọlọ. Ranmhude ọnan, ọne ebe nan kie gha nin ẹbho da bun sẹbhi 40, sẹyẹ, a da gha kadi ọsi jw.org nọn bun sẹbhi 30 nin ele. Bhi eghe ebhebhe nin ibhio mhan rẹ rẹnẹ sẹbhi eji a da gbẹloghe ene ikhuo nan, ọwanlẹn nọn gbẹloghe ele da yọle nin Esali Jehova vae dọ ha man ene ikhuo ebi ele ha rẹ tobele ha luẹ Baibo yẹ.

Bhi ije ebhebhe nan da gbẹloghe ikhuo nan lu khọlọ, nin obhio mhan nin Stacy bi ibhio mhan nin ikhuo ebhebhe yo, ele da yẹ wo gha ọne itrati nan nọn bun sẹbhi isẹn bhi enin rẹ sẹbhọ ghe, ene ẹbho da yọle nan dọ ne ebhebhe bhi ọne itrati ji ele. Okhuo ọkpa nọn wẹnna bhi enin da yọle: “Ọne ebe nan dẹ rẹkpa ikhuo ne ribhi enan.” Ọle da yẹ yọle: “Ebi mhan guanọ wo khọnan.” Bhi ẹghe ọbhebhe nin ele ki rẹ rẹnẹ sẹbhi eji a da gbẹloghe ene ikhuo, ene bunbun bhi ẹwẹ ele da sikoko ne ele luẹ Baibo. Eva bhi ẹwẹ ele da yọle ghe ele dẹ vae bhi ikolo nan ha do bhi ẹkẹ uzana nọn rẹkhanlẹn.

Obhio mhan nin Stacy da yọle: “Uwedẹ nin ẹbho rẹ miẹn ọne ebe nan ọbhi egbe da wo manman ti mhan bhọ. Ahamiẹn a printi ọne ebe nan yẹ khi ọle bọsi itrati, ọ wo lẹkhẹ nan rẹ noo ọle rẹ tẹmhọn Agbejele man ikhuo ne sẹriọ nan lu khọlọ. Uwedẹ nin ene ikhuo nan rẹ wo miẹn mhan ọbhi egbe wo manman rẹso mhan. Ọ wo re mhan ghọnghọn rẹ daghe ebi Jehova ha rẹ kie ne erọnmhọn ọbhi iwẹnna nọn sẹnian yẹ, sade mhan dọ re ọne itrati tẹmhọn Osẹnobulua man ẹbho ebhebhe ne sẹnian.”