Ene Emhin Nin Uwẹ Ka Luẹ Bhi Baibo Dẹ Yẹ Sabọ Rẹkpa Uwẹ Ẹlẹnan?

1. Be ẹmhọanta nin uwẹ luẹ bhi Baibo bhi ẹghe ọhẹnhẹn rẹ rẹso uwẹ yẹ?

ENE ikuẹkuẹ iman-emhin nin mhan ka luẹ bhi Baibo rẹkpa mhan rẹ fi iẹnlẹn nọnsẹmhan denọ. Bhi ọsi ijiẹmhin, bhi ẹghe nin mhan rẹ luẹ ghe Jehova hi elin nọnsi Osẹnobulua, mhan da wo dọnmhegbe rẹ kiẹn ọmọẹ ọle. (Isa. 42:8) Bhi ẹghe nin mhan rẹ luẹ ẹmhọanta rẹji ene yu, mhan bha yẹ ha kpokpo egbe si ene imhan hoẹmhọnlẹn ne yu sẹyẹ loya. (Eccl. 9:10) Ẹghe nin mhan rẹ luẹ ẹmhọn ive ọsi agbọn ọsọgbọn nin Osẹnobulua vele rẹji ọne otọ nan, mhan bha yẹ ha kpokpo egbe ba ebi emhin ha diayẹ bhi ẹghe odalo. Mhan da dọ ha mhọn ọne iruduba ghe, mhan dẹ wo nyẹnlẹn rẹ sẹbhi ighegheghe, ghe ọ i yi ikpe 70 la 80 ọkpa mhan ha ki ha gbe bhi agbọn.—Ps. 37:29; 90:10.

2. Be 2 Pita 1:​12, 13 rẹ rẹman yẹ ghe, Kristiẹn ne deziẹn bhi oga dẹ sẹyẹ miẹn elele bhi ikuẹ-kuẹ iman-emhin ne ele ka luẹ khẹ?

² Ene ikuẹkuẹ iman-emhin nin mhan luẹ bhi Baibo gene lu uhọnmhọn-emhin, bhiriọ, ọ bha khẹke nin mhan re ẹlo gbe ele a. Bhi ilẹta nọnzi eva nin Pọl nin odibo gbẹn, ene Kristiẹn ne “manman rẹọ bhi ọne ẹmhọanta” ọle gbẹn ọlẹn je. (Tie 2 Pita 1:​12, 13.) Bhi ọne ẹghe nin, eria ọbe ne bha hoẹmhọn ẹmhọanta da ha man iman-emhin ohoghe bhi ẹkẹ agbotu. (2 Pita 2:​1-3) Pita nin odibo da ha ho nin ọle ziẹn ibhio ọle nin ele ko ga udu, beji ele ha da sabọ gbega egbe ele bhi okhẹnan nọn ribhi ẹkẹ agbotu. Nin ọle rẹ sabọ lu ọnan, ọle da rẹkpa ele rẹ ye iman-emhin eso nin ele ka luẹ re. Ene iman-emhin nan dẹ rẹkpa ele rẹ ha sun rẹkhan Jehova.

3. Re ijiẹmhin man nọn rẹman ebezẹle nin Kristiẹn rebhe ha da yẹ sabọ miẹn emhin luẹ bhi ikuẹ-kuẹ iman-emhin ne ribhi Baibo.

³ Aharẹmiẹn ọ buele nin mhan mọn da ga Jehova, mhan dẹ yẹ sabọ luẹ emhin bhi ikuẹkuẹ iman-emhin ne ribhi Baibo. Bhi ọsi ijiẹmhin, ji a man yọle ghe, a ne agba emhin ọkpa kẹkẹ nan rẹ nyẹn ebale nin ọnọn guẹ rẹ nyẹn ebale, bi ọnọn luẹ ebi a rẹ nyẹn egbale yẹ. Ọkpakinọn, beji ẹghe rẹ khian, ọne guẹ rẹ nyẹn ebale sabọ rẹ noo ene emhin nin rẹ nyẹn unan ebale kẹkẹ ne ha sẹyẹ ha mhẹn bhi unun, ranmhude, ọ rele nin ọle mọn da ha nyẹn ebale. Iriọ yẹ nọn, ọnọn rele nọn mọn da ha ga Jehova bi ọnọn wo la munhẹn ha luẹ Baibo, sabọ rẹ noo ene ikuẹkuẹ iman-emhin nan bhi uwedẹ kẹkẹ. Idia nọnsẹmhan, bi isẹhoa nin mhan mhọn bhi oga nọnsi Jehova sabọ rẹ fidenọ rẹ na bhi ẹghe nin mhan rẹ mianmẹn. Mhan ha ria eria nyan ẹmhọanta nin mhan ka luẹ bhi Baibo bhi ẹghe nọn gbera, mhan dẹ daghe ebi ọ ha rẹ rẹkpa mhan yẹ bhi uwedẹ ebhebhe. Bha ji mhan fẹ emhin ea ghe nin Kristiẹn ne deziẹn bhi oga ha sabọ miẹn luẹ bhi ikuẹkuẹ iman-emhin ne ribhi Baibo.

JEHOVA HI AMAN NỌN MAN EMHIN

4. Be ọ sẹ rẹ rẹso mhan yẹ nin mhan rẹ lẹn ghe Jehova hi Aman nọn man emhin?

⁴ “Osẹnobulua hi ọnọn man emhin rebhe.” (Hib. 3:4) Mhan lẹnmhin ghe Aman nọn wan nẹ, nọn yẹ mhọn ahu nẹ, ọle man ọne otọ nan bi emhin rebhe ne nyẹnlẹn bhọ. Osẹnobulua man mhan. Bhi ọsi ẹmhọanta, ọle wo gene lẹn mhan nọnsẹn. Rẹ deba ọnin, ọle wo ji ẹmhọn mhan da rẹtẹ ọle. Ọle lẹn emhin nọn ha mhẹn mhan bhi egbe. Nin mhan rẹ lẹn ọne ẹmhọanta nan, ghe Jehova hi Aman nọn man emhin, wo rẹkpa mhan rẹ fi iẹnlẹn nọnsẹmhan denọ, yẹ re iẹnlẹn nọn mhẹn nin mhan.

5. Ẹmhọanta nela ha rẹkpa mhan rẹ ha mhọn idegbere? (Isaiah 45:​9-12)

⁵ Nin mhan rẹ dọ lẹn ọne ẹmhọanta ghe Jehova hi Aman nọn man emhin, ọ dẹ sabọ rẹkpa mhan rẹ lẹn ebezẹle nọn da khẹke nin mhan ha mhọn idegbere. Ẹghe nin Jobu rẹ ha riale ghe ọle lẹn nẹ, yẹ ha ta ọta nọn bha gba rẹji Jehova, Jehova da rẹkpa ọle rẹ lẹn ghe, Ọle hi Aman nọn ke okhun nẹ. (Job 38:​1-4) Ọnan da rẹkpa Jobu rẹ lẹn ghe, emhin rebhe nin Jehova lu gbamhin. Rẹ deba ọnin, Ẹzaya nin akhasẹ da yẹ gbẹn yọle: “Ekẹn dẹ be sabọ taman ọnọn re ọle man emhin yọle: “Be uwẹ man?’”—Tie Isaiah 45:​9-12.

6. Ẹghela ọ rẹ khẹke nin mhan rẹ ria eria nyan ebi Aman nọnsẹmhan mhọn ahu bi ẹwanlẹn sẹ yẹ? (Yẹ fẹ ene ifoto ghe.)

⁶ Ahamiẹn ọ rele nin ọria mọn da ga Jehova, ọle sabọ rẹ dọ ha mun udu nyan iria-eria nọnsọle, gbera nin ọle rẹ dọ guanọ adia nọn na obọ Jehova bi Ọta nọnsọle vae. (Job 37:​23, 24) Ọkpakinọn, be ọ ha rẹ rẹkpa ọria yẹ sade ọle ria eria nyan ẹmhọn Jehova, nin Aman nọn man ọle, bi ahu bi ewanlẹn Nọnsọle? (Isa. 40:22; 55:​8, 9) Ọnan dẹ rekpa ọle rẹ ha mhọn idegbere, ghe uwedẹ nin ọle rẹ ghe emhin bha sẹ emhin soso bhi eji Jehova ye.

7. Be Rahela lu nin ọle rẹ sabọ re obọ rẹkhan emhin nin agbotu fidenọ?

⁷ Rahela nọn nyẹnlẹn bhi Slovenia dọ kere ghe, nin ọle rẹ ria ẹmhọn ebi Jehova rẹ yi Aman nọn man emhin yẹ, wo rẹkpa ọle rẹ sabọ re obọ rẹkhan emhin nin agbotu fidenọ. Ọle da yọle: “Ẹgheso, ọ i wo lẹkhẹ nin mẹn rẹ re obọ rẹkhan emhin nin Otu Nọn Sun Oga fidenọ bhi ẹkẹ agbotu. Bhi ọsi ijiẹmhin, arẹmiẹn mẹn ghe ọne ividio ọsi Ebi Otu Nọn Sun Oga Ji Mhan Lẹn Bhi Ukpe 2023 #8, ọ da wo mhọn ebi ọ dia mhẹn yẹ bhi egbe, bhi ẹghe ọhẹnhẹn nin mẹn rẹ daghe obhio mhan nin okpea nọn mun eto-agban re ọta man. Bhiriọ mẹn da bhii Jehova nọn rẹkpa mẹn rẹ re obọ rẹkhan ọne ufidenọ nan.” Rahela rẹọbhọ ghe, beji a miẹn ghe Jehova hi Aman nọn man emhin rebhe, ọle dẹ wo ha re uwedẹ nọn mhẹn nẹ rẹ dia agbotu nọnsọle. Ahamiẹn ọ nọghọ uwẹ rẹ re obọ rẹkhan emhin nin agbotu fidenọ, ọ dẹ ha mhẹn sade uwẹ re ẹghe ọbhi otọ rẹ ria eria nyan ebi Aman nọn man emhin mhọn ẹwanlẹn bi ahu sẹ yẹ.—Rom 11:​33-36.

EBEZẸLE NIN OSẸNOBULUA DA JI ILOYA DA HA RIBHỌ

8. Elele nela mhan miẹn bhọ, nin mhan rẹ dọ luẹ ebezẹle nin Jehova da ji iloya da ha ribhọ?

⁸ Bezẹle nin Osẹnobulua da ji iloya da ha ribhọ? Ẹbho eso wo khọẹkẹ Osẹnobulua ranmhude nin ele bha rẹ sabọ miẹn ewanniẹn rẹji ọne inọnta nan. Eso bhọ rẹọbhọ ghe Osẹnobulua i zẹwẹ ribhọ hiehie! (Prov. 19:3) Ọkpakinọn, uwẹ dọ luẹ kere ghe, ọ i yi Jehova si iloya ji mhan, ghe ranmhude ọ bha gba nin mhan fo, bi olukhọ nin mhan le bhi uku zẹle nin mhan da loya. Sẹyẹ, uwẹ dọ luẹ ghe, ranmhude iziẹngbe nin Jehova mhọn da eria, ọle zẹle nin ẹbho ne bunbun da sabọ vae dọ lẹn ọlẹn, yẹ dọ sabọ luẹ ebi Jehova ha rẹ re ọkpẹnlẹn ọbhi iloya nọnsẹmhan yẹ sẹsẹsẹ. (2 Pita 3:​9, 15) Ene ẹmhọanta nan nin uwẹ luẹle da wo ko uwẹ udu re, yẹ re uwẹ manman sikẹ Osẹnobulua.

9. Idia nela ọ da khẹke nin mhan ria eria nyan ebezẹle nin Jehova da ji iloya da ha ribhọ?

⁹ Mhan lẹnmhin ghe ọkhẹke nin mhan ha mhọn iziẹngbe, beji mhan rẹ khẹ Jehova nin ọle dọ re ọkpẹnlẹn ọbhi iloya rebhe. Ọrẹyiriọ, ahamiẹn imhan la ẹbho nin mhan hoẹmhọnlẹn kuẹlo da ọkakale nọn hi ki rẹ khin, mhan ki ha riale ebezẹle nin Jehova bha da re ẹjẹje re ọne iloya kie. (Hab. 1:​2, 3) Bhi ẹghe nọn sẹnian, ọ dẹ ha yi emhin ẹwanlẹn sade mhan dọ ria eria nyan, ebezẹle nin Jehova da ji ẹbho ne ga ọle da ha kuẹlo da ọkakale.a (Ps. 34:19) Ọ dẹ ha mhẹn sade mhan dọ ria eria nyan emhanmhan nin ọle mhọn rẹ re ọkpẹnlẹn ọbhi iloya rebhe sẹsẹsẹ.

10. Be rẹkpa Anne rẹ sabọ ziẹngbe uyumhin ọsi inẹn ọlẹn?

¹⁰ Ẹmhọanta nin mhan lẹn rẹji ebezẹle nin mhan da loya, dẹ sabọ rẹkpa mhan rẹ ha ziẹngbe. Anne nọn nyẹnlẹn bhi Mayotte, bhi obọ ọsi Indian Ocean da yọle: Ọ da manman ha ba mẹn bhi egbe bhi ẹghe nin inẹn mẹn rẹ yu bhi ikpe eso ne gbera. Ọkpakinọn, ẹghe-ẹghe mẹn rẹ ha ye egbe mẹn re ghe, ọ i yi Jehova si ọle nin mhan da loya. Jehova wo muegbe nin ọle rẹ re iloya rebhe kie, yẹ riọ ẹbho nin mhan hoẹmhọnlẹn kpanọ bhi uu. Uwedẹ nin ọkhọle nọnsẹmhẹn rẹ lọre, wo han mẹn ilo sade mẹn ria eria nyan ene ẹmhọanta nan.

11. Be ẹmhọanta nin mhan luẹ rẹji ebezẹle nin Jehova da ji iloya da ha ribhọ, ha rẹ rẹkpa mhan yẹ rẹ ha lu iwẹnna itẹmhọn Osẹnobulua?

¹¹ Ẹmhọanta nin mhan luẹle rẹji ebezẹle nin Jehova da ji iloya da ha ribhọ, dẹ sabọ re ọne ọhubhudu nin mhan rẹ ha lu iwẹnna itẹmhọn Osẹnobulua. Ẹghe nin Pita ki rẹ tale fo ghe, ranmhude Jehova ziẹngbe zẹle nin ene fidenọ ha da sabọ miẹn umiẹnfan, ọle da yọle: “Bha manman ha ria ẹmhọn unan ọria nọn khẹke nin bha ha khin. Bha ha yi eria ne nyẹn iẹnlẹn nọn khiale, bha ha yẹ ha lu emhin ne ha rẹman ghe, ọkhọle rebhe bha rẹ ga Osẹnobulua.” (2 Pita 3:11) Iwẹnna itẹmhọn Osẹnobulua hi uwedẹ ọkpa nin mhan ha rẹ rẹman ghe, ọkhọle rebhe mhan rẹ ga Jehova. Mhan hoẹmhọn ẹbho beji Jehova nin Aba mhan rẹ hoẹmhọn ẹbho. Mhan guanọ nin ele nyẹnlẹn bhi agbọn ọsọgbọn nin Osẹnobulua mun vade. Ranmhude iziẹngbe nọnsi Jehova, ẹbho ne ribhi idunmhun nin uwẹ ye mhọn ọne isẹhoa rẹ dọ ga ọle. Ekpẹn nọn khua nọn rẹji mhan rẹ deba Osẹnobulua ha wẹnna, yẹ rẹ sabọ rẹkpa ẹbho ne bunbun rẹ dọ lẹn ọlẹn ọkuẹsẹ ẹghe nin ọkpẹnlẹn ha rẹ vae!—1 Kọr. 3:9.

“ẸGHE ỌKIKE” MHAN DA NYẸNLẸN

12. Elele nela mhan sẹ miẹn nin mhan rẹ dọ lẹn ghe, ẹghe ọkike mhan da nyẹnlẹn?

¹² Baibo da wo tẹmhọn uwedẹ nin ẹbho ha rẹ ha lu emhin “bhi ẹghe ọkike.” (2 Tim. 3:​1-5) Mhan ha gbẹlokotọ fẹ uwedẹ nin ẹbho rẹ ha nyẹnlẹn ẹlẹnan, mhan wo dọ kere ghe, ebi Baibo tale wo ha munsẹ. Beji mhan rẹ daghe ọle ghe, uwedẹ nin ẹbho rẹ lu emhin ẹlẹnan wo ha khọ bhọ, ọ wo dọ rẹkpa mhan rẹ lẹn ghe ẹmhọanta Ọta nọnsi Osẹnobulua khin.—2 Tim. 3:​13-15.

13. Ranmhude ijiẹmhin nin Jesu rẹman bhi ebe ọsi Luk 12:​15-21, inọnta nela ọkhẹke nin mhan ha nọọn egbe mhan le?

¹³ Ahamiẹn mhan lẹn ọne ẹmhọanta ghe ẹghe ọkike mhan da nyẹnlẹn, ọ dẹ rẹkpa mhan rẹ denọ ẹlo ọbhi ebe lu uhọnmhọn-emhin nẹ. Mhan dẹ sabọ luẹ ebi mhan ha rẹ lu iriọ yẹ bhi ebi Jesu tẹmhọnlẹn bhi ebe ọsi Luk 12:​15-21. (Tie ọle.) Bezẹle nin a da tie ọne okpea nọn fele, ọria “nọn i wanlan”? Ọ i yi ranmhude ọne okpea fele zẹle, ọkpakinọn ranmhude ọle bha mun emhin nọn khẹke kalo bhi iẹnlẹn. Ọne okpea da khuan “afe bi ua nin egbe ọle. Ọkpakinọn, ọ bha fe bhi ẹlo nọnsi Osẹnobulua.” Bezẹle nọn da rẹ khẹke nin ọne okpea mun emhin ne lu uhọnmhọn-emhin nẹ kalo bhi iẹnlẹn? Osẹnobulua da taman ọne okpea yọle: “A dẹ miẹn uwẹ iẹnlẹn nọnsẹ bhi ọne asọn nan.” Beji mhan rẹ bu ọkpẹnlẹn ọsi ọne agbọn nan, ọkhẹke nin mhan nọọn egbe mhan ene inọnta nan: ‘Imẹn be mhọn emhanmhan nọn rẹman ghe, emhin nọn lu uhọnmhọn-emhin nẹ mẹn mun kalo bhi iẹnlẹn? Emhanmhan nela mẹn rẹkpa imọn nesẹmhẹn rẹ ha mhọnlẹn? Mẹn be noo ahu, ẹghe nọnsẹmhẹn, bi emhin nin mẹn mhọn rẹ khuan nin egbe mẹn ọkpa, la mẹn be re ọle khu ọbhi ẹmhọn Osẹnobulua?’

14. Beji okha ọsi Miki rẹman, bezẹle nọn da yi emhin ẹwanlẹn nin mhan rẹ ha nyẹnlẹn rẹkhan, ebi Baibo tale rẹji ẹghe ọkike nin mhan da nyẹnlẹn?

¹⁴ Ahamiẹn ghe mhan wo ha mhọnlẹn bhi ọkhọle ghe ẹghe ọkike mhan da nyẹnlẹn, ọ dẹ rẹkpa mhan rẹ denọ ẹlo ọbhi ebe lu uhọnmhọn-emhin nẹ. Ọnan hi emhin nọn sunu ji obhio mhan natiọle Miki. Ọle da yọle: “Bhi ẹghe nin mẹn rẹ yo isiku fo, ọ da kie wo ha ghọn mẹn rẹ kie yo isiku nan da luẹ ẹmhọn elanmhẹn. Mẹn da yẹ ha mhọn ọne emhanmhan rẹ ha lu iwẹnna ọsi ọkanẹfan ọsi ẹghe rebhe, yẹ dọ ha ga bhi eji a da manman guanọ urẹkpa. Imọẹ mẹn ne deziẹn bhi oga da taman mẹn nin mẹn ria ọne ẹmhọn nọnsẹn, ghe, si mẹn dẹ sabọ ha yo ọnẹ isiku, yẹ mun emhanmhan nin mẹn mhọn bhi oga sẹ. Ele da ye mẹn re ghe ọne agbọn nan dẹ kẹ kpẹn, ghe, bhi agbọn ọsọgbọn nọn vade, mẹn dẹ miẹn ọne isẹhoa rẹ luẹ ẹmhọn elanmhẹn nọn hi ki rẹ khin. Bhiriọ mẹn da zẹ rẹ luẹ emhin nọn i da gbe mẹn ẹghe. Ọnan da rẹkpa mẹn rẹ miẹn iwẹnna nọn rẹkpa mẹn rẹ ha lu iwẹnna ọkanẹfan. Akizẹbue, mẹn da diọbhi Ecuador bhi eji a da guanọ urẹkpa.” Ecuador Miki bi ọdọ ọle da lu iwẹnna ọfẹotughe nian.

15. Be ẹmhọn Osẹnobulua nin mhan taman ẹbho ha rẹ rẹso ele yẹ bhi ẹghe odalo? Re ijiẹmhin ọbhọ. (Yẹ fẹ ene ifoto ghe.)

¹⁵ Ọ bha khẹke nin mhan ji egbe lọ mhan sade ẹbho bha re ehọ ọbhi ọta nọn mhẹn nin mhan wewe man ele. Ẹbho sabọ fidenọ. Ọnan hi emhin nọn sunu ji Jemis nin obhio Jesu. Ọle wo daghe ebi Jesu rẹ wanre yẹ, dọ kiẹn Mezaya, yẹ ha man emhin bhi uwedẹ nin ọria soso bha sẹ rẹ man emhin khẹ. Ọrẹyiriọ, bhi ẹkẹ ikpe eso, Jemis bha ka rẹkhan Jesu. Jesu bhọ riọkpanọ fo bhi uu ọkuẹsẹ Jemis dọ kiẹn odibo nọnsọle. Bhi ọsi ẹmhọanta, Jemis da wo re ọhubhudu rẹ ha ga!b (Jọni 7:5; Gal. 2:9) Ọ bha khẹke nin mhan zobọ bhọ rẹ ha tẹmhọn Osẹnobulua man ẹbho bhi azagba-uwa nọnsẹmhan. Sẹyẹ, ọ bha khẹke nin mhan zobọ bhọ rẹ kie dọ tẹmhọn Osẹnobulua man eria nin mhan ka tẹmhọn Osẹnobulua man, ne bha ka re ehọ ọbhi ebi mhan taman ele. Yere ghe ẹghe ọkike mhan da nyẹnlẹn, bhiriọ, ọkhẹke nin mhan mun iwẹnna itẹmhọn Osẹnobulua kalo bhi iẹnlẹn. Ẹmhọn Osẹnobulua nin mhan taman ele ẹlẹnan dẹ sabọ fi iẹnlẹn nọnsele denọ bhi ẹghe odalo, la sade ekpokpo nọn khua munhẹn fo.c

JI EMHIN NIN AGBOTU NỌNSI JEHOVA NE DAGBARE HA TI UWẸ BHỌ

16. Be mhan sẹ rẹ miẹn elele yẹ bhi emhin kẹkẹ nin agbotu nọnsi Jehova zẹ ele egbe dagbare? (Yẹ fẹ ọne ẹkpẹti ghe nọn yọle “Noo Ẹmhọanta Ne Ribhi Baibo Rẹ Rẹkpa Ẹbho.”)

¹⁶ Ebale oriọn eso nin mhan miẹn ẹlẹnan, ẹbho nan miẹn ghe ele bha sẹ ka hẹnmhọn ẹmhọanta ne ribhi Baibo khẹ a lu ele nan. Bhi ọsi ijiẹmhin, ọta ogbakha nan rẹman uzana-uzana, uhọnmhọn-ọta eso bi ividio eso ne ribhi jw.org, bi ebe nin mhan gha nin ẹbho, ẹbho ne i yi Esali Jehova a manman lu ele nan. Ọrẹyiriọ, mhan sẹyẹ wo miẹn elele bhi ene emhin nan. Ele rẹkpa mhan rẹ ha ziẹn oyẹẹ nin mhan mhọn da Jehova, urẹọbhọ nin mhan mhọn da ọta nọnsọle, yẹ rẹkpa mhan rẹ manman guẹ ebi a rẹ man ẹbho ẹmhọanta ne ribhi Baibo nọnsẹn yẹ.—Ps. 19:7.

17. Idia nela ọ da khẹke nin uwẹ ria eria nyan ikuẹ-kuẹ iman-emhin nin uwẹ ka luẹ bhi Baibo?

¹⁷ Ọ manman ti mhan nin Esali Jehova bhọ, rẹ daghe ebi agbotu nọnsẹmhan rẹ kie gbotọ ẹmhọanta ne ribhi Baibo fanọn an yẹ. Ẹmhọanta nin mhan luẹ bhi Baibo, nọn rẹkpa mhan rẹ dọ ha ga Jehova, yẹ wo manman ti mhan bhọ. Ahamiẹn ghe agbotu nọnsi Jehova re adia ọsọgbọn re, nan da miẹn ghe ọnọn ri mhan bhi ọkhọle mhan riale ghe ọ mhẹn nẹ, ọkhẹke nin mhan yere ghe Jehova nin Aman nọn mhọn ahu nẹ, nọn yẹ mhọn ẹwanlẹn nẹ re agbotu khian. Mhan dẹ sabọ lu ọnan sade mhan mhọn idegbere. Ahamiẹn imhan la ọria nin mhan hoẹmhọnlẹn kuẹlo da ọkakale, ọkhẹke nin mhan ha mhọn iziẹngbe, yẹ ria eria nyan ebezẹle nin Jehova da ji iloya da ha ribhọ. Ahamiẹn mhan ria ẹmhọn ebi mhan ha re ẹghe bi emhin nọnsẹmhan rẹ lu, ọkhẹke nin mhan yere ghe ẹghe ọkike mhan da nyẹnlẹn nian. Mhan bhii ghe nin emhin nin Jehova noo agbotu nọnsọle rẹ ne nin mhan, ha ziẹn mhan udu, ha re ọhubhudu nin mhan, yẹ rẹ mhan wanlan.