UNYẸNMHIN NỌN KHẸKE ENE RẸKHAN IJESU
‘Ahu Da Do Ọle Bhọ’
Ẹghe nin agbotu nọn ribhi Rome rẹ họn ghe iPaul vade, ele da je ẹbho eso bhi agbotu nin ele dọ dia khẹ iPaul bhi uwedẹ. Ene ẹbho nan da khian ọkhian ọsi ikpọwala 64, ele kuẹ sẹbhi eji ele da miẹn iPaul. Be oyẹẹ nin ele rẹman rẹ rẹso iPaul yẹ? Baibo yọle ghe “Paul ki daghe ele, ọle da khuẹnmhẹn Osẹnobulua. Ahu da yẹ do ọle bhọ.” (Ac 28:15) Ẹghe nin Paul rẹ ha re ẹnẹ ji ene agbotu nan, ọle ha re izebhudu nin ele. Ejayenan nian, onighan ọle khin. Ele ki re izebhudu nanlẹn.—2Co 13:10.
Ẹlẹnan nian yẹ, efẹotughe re ẹnẹ ji agbotu kẹkẹ dọ ha re izebhudu nin ele. Eria bii mhan ele yẹ khin. Ranmhude ọnan, egbe sabọ lọ ele ẹgheso, ele sabọ ha mhọn emhin nọn kpokpo ele bhi ọkhọle, la emhin sabọ sunu ji ele nọn ha gbe ele ahu sotọ. Ọfẹotughe bi okhuo ọle ha re ẹnẹ ji agbotu bha, be uwẹ ha lu nin uwẹ rẹ re izebhudu nin ele?—Ro 1:11, 12.
Dagbare bhi iwẹnna itẹmhọn Osẹnobulua. Ọ manman wo yẹẹ ọfẹotughe sade mhan dọnmhegbe nin mhan rẹ deba ele bhi iwẹnna itẹmhọn Osẹnobulua bhi ọne uzana nin ele rẹ re ẹnẹ ji agbotu nọnsẹmhan. (1Th 1:2, 3; 2:20) Uwẹ sabọ lu iwẹnna ọkanẹfan bhi ọne uki nin ọle ha vae. Uwẹ sabọ deba ọle la okhuo ọle wẹnna, la uwẹ taman ọlẹn, la okhuo ọle nọn rẹkhan uwẹ dọ man ọria iBaibo. Ọ wo yẹẹ ele rẹ deba eria kẹkẹ wẹnna, rẹ sẹbhi ẹbho ne la munhẹn ha deba agbotu lu iwẹnna itẹmhọn Osẹnobulua, bi ẹbho ne riale ghe ele bha manman guẹ ebi a rẹ lu iwẹnna itẹmhọn Osẹnobulua yẹ.
Miẹn ele ọbhi egbe. Uwẹ sabọ re uwa nin ele dia, la uwẹ nyẹn ebale nin ele. Ọnan dẹ rẹman ọne ọfẹotughe bi okhuo ọle ghe uwẹ hoẹmhọn ele. Ọ ha rẹ ha yi obhi ebale khere, ọ dẹ ti ele bhọ.—Lu 10:38-42.
Re obọ rẹkhan adia ọsi ọne ọfẹotughe. Ọfẹotughe ha daghe eji mhan ida lu nọnsẹn, ọle ki re oyẹẹ rẹ taman mhan, nin mhan da sabọ ga iJehova nọnsẹn. Ẹgheso, asabọmiẹn adia nin ọle re mhan bha rẹ mhan ghọnghọn. (1Co 5:1-5) Ọ ha rẹ dia iriọ, ọ dẹ manman re eghọnghọn ji ọle sade mhan hẹnmhọn nanlẹn yẹ re idegbere re obọ rẹkhan adia nin ọle re nin mhan.—Heb 13:17.
Khuẹnmhẹn ele bhi ẹsọn nin ele miẹn. Taman ọne ọfẹotughe bi okhuo ọle ebi iwẹnna nọnsele rẹ rẹkpa uwẹ yẹ. Uwẹ sabọ re unun taman ele, la uwẹ gbẹn obhi ebe rẹ taman ele.—Col 3:15.