Epre

Nin mhan rẹ sabọ miẹn elele bhi efun bi aranlẹn nọnsi Jesu nin ọle rẹ zọese nin mhan ọkhẹke nin mhan ha mhọn urẹọbhọ. (Ẹfẹ. 1:7) Ẹbho nin Jesu tiọle “ihuan ebhebhe” i le bhi ọne ibrẹd yẹ wọn bhi ọne anyọn,sade a lu iluemhin ọsi Ebale Emuan Ọsi Ebealẹn Mhan. (Jọni 10:16) Ọkpakinọn, ele yẹ wo le bhi ọne “ibrẹd ọsi iẹnlẹn.” Uwedẹ nin ele rẹ lu ọnan hi, nin ele rẹ mhọn urẹọbhọ da izọese nọnsi Jesu, bi emhin ọhan-ilo kẹkẹ nin ọle ha lu. (Jọni 6:53) Eria ne mhọn ọne ikhuaẹloghe nin ele rẹ deba gbẹloghe bhi Agbejele nọnsi Osẹnobulua, ne yẹ ribhi ọne akovẹn ọsọgbọn, ele ọkpa le bhi ọne ibrẹd yẹ wọn bhi ọne anyọn bhi iluemhin ọsi Ebale Emuan Ọsi Ebealẹn Mhan. Bhiriọ, aharẹmiẹn ibo ọsi enanzẹle, la ibo ọsi ihuan nekẹle mhan yẹ, ọkhẹke nin mhan ha mhọn urẹọbhọ nọn ziẹnlẹn da izọese nọnsi Jesu, nin mhan da sabọ miẹn iẹnlẹn ọsi ighegheghe. w24.12 13 ¶14, 16

Bhi ẹghe iluemhin ọsi Ebale Emuan Ọsi Ebealẹn Mhan, Jesu da gha ibrẹd nọn i huẹ nin etuegbe nesọle, yẹ taman ele ghe ọ mundia nin egbe nọnsọle. Ọle da yẹ gha anyọn nin ele, yẹ taman ele ghe ọ mundia nin “aranlẹn ọsi ọne akovẹn.” (Mak 14:​22-25; Luk 22:20; 1 Kọr. 11:24) “Izrẹl [ọsi oriọn]” ne ha deba gbẹloghe bhi Agbejele nọnsi Osẹnobulua Jehova deba ve ọne akovẹn ọsọgbọn nan. (Hib. 8:​6, 10; 9:15) “Usun ihuan ne bha bun”, ọle Jesu ha talọ je bhi iluemhin ọsi Ebale Emuan Ọsi Ebealẹn Mhan. Etuegbe nesọle ne deba ọle ha ribhi ọne ugha bhi ọne ẹghe nin, ele hi ẹbho ne ka deba bhi ọne usun nan. Enan hi ẹbho ne ha deba Jesu gbẹloghe bhi okhun. w24.12 11 ¶9-10

Ọkpa bhi edibo nesi Jesu da khiẹn ọlẹn nin eghian ọlẹn. A da mun ọlẹn, re ọle lu ọle a, bha ọle ohoghe, yẹ gbe ọle ugbemhin oya. Ene eyokhọnlẹn da mun ọlẹn diọbhi eji a ha da khan ọlẹn bhi oran yẹ gbe ọle a. Jesu da wo ziẹngbe ọne ọbalọ nan rebhe. Ọkpakinọn, Jehova ene emhin nan nin Jesu loya ọle ba ọle bhi egbe nẹ. Jehova mhọn ọne ahu nin ọle rẹ lu ọle nin ene ẹbho hẹi yẹ re oya nin Jesu, ọkpakinọn ọle bha lu iriọ. Oyẹẹ nin ọle mhọn da mhan zẹle. Izọese nọnsi Jesu, ọle hi uwedẹ nọn kokhun nẹ nin Jehova rẹ rẹman ghe, ọle wo manman hoẹmhọn uwẹ. Emhin nọn lu uhọnmhọn emhin nẹ rẹji ọle, ọle noo rẹ zọese beji ọle ha da sabọ miẹn uwẹ fan bhi obọ olukhọ bi uu, sẹyẹ, ọbalọ nin ọle ziẹngbe ọle ranmhude uwẹ i yi obhiọ khere. (1 Jọni 4:​9, 10) Bhi ọsi ẹmhọanta, ọle guanọ nọn rẹkpa ọdeọde bhi ẹwẹ mhan rẹ sabọ ha ga ọle arẹmiẹn ọ bha gba nin mhan, sẹyẹ ọle muegbe nin ọle rẹ re olukhọ kie bhi ẹghe odalo sẹsẹsẹ! w24.08 6 ¶13-14

Mhan dẹ sabọ lẹn otọ ebi Jehova hoẹmhọn mhan sẹ yẹ sade mhan lẹn ebi izọese nọnsi Jesu re ọle le. Esu yọle ghe, ọria soso i ribhọ nọn ha sẹyẹ ha sun rẹkhan Jehova sade emhin nyọn mun ọlẹn. Ranmhude ọnan, Jehova da re otọ nin Jesu rẹ loya ọkuẹsẹ ọle yu, nin Ọle rẹ rẹman ghe, ohoghe Esu bhale. (Job 2:​1-5) Jehova wo ha daghe ọle ẹghe nin ẹbho rẹ ha zuọzuọ Jesu, ẹghe nin eyokhọnlẹn rẹ ha re asan gbe ọle, bi ẹghe nin ele rẹ khan ọlẹn mun eran. Sẹyẹ, Jehova wo daghe ọle ẹghe nin Ọmọn nọnsọle rẹ yu uyumhin oya bhi ọne okhun eran nan khan ọlẹn ọi. (Mat. 27:​28-31, 39) Jehova mhọn ọne ahu rẹ lu ọle nin Ọmọn nọnsọle hẹi le ọne oya nan, sokpan, ọle bha lu iriọ. (Mat. 27:​42, 43) Sokpan, sade Osẹnobulua lu iriọ nọn, Jesu i rẹ yu nin mhan. Mhan ha rẹ kiẹn eria ne i mhọn ikhuaẹloghe. Beji a ha da miẹn ọnan bha sunu, ọle zẹle nin Jehova da re otọ nin Ọmọn nọnsọle rẹ le oya rẹ sẹbhi ẹghe nin ọle rẹ gbẹtin sotọ. w25.01 22 ¶7

Naisan 16, 33 C.E. ọne ukpẹdẹ ha khin. Ofẹn da ha mun edibo nesi Jesu, sẹyẹ ele da ha lu akhiẹ. Eva bhi ẹwẹ ele da na bhi Jerusalẹm ha khian Ẹmeyọs. Okpea ọkpa da bu ele re, yẹ deba ele ha khian. Ene edibo da ha taman ọne okpea emhin ọhanabẹ nọn sunu ji Jesu. Ẹghenin, ọne okpea da munhẹn ha taman ele emhin nin ele i da yelea ghẹdẹ. “Ọle da noo emhin nin Mozis gbẹn bi emhin nin ene akhasẹ rebhe gbẹn” rẹ re otọle man ebezẹle nọn da khẹke nin ọne Mezaya loya yẹ yu. Ele ki sẹbhi Ẹmeyọs, ọne okpea da ji ele lẹn ghe ọle hi Jesu, ghe ọle riọ kpanọ. (Luk 24:​13-35) Jesu wo zegbere man edibo nọnsọle igba ne bunbun bhi ene ikpẹdẹ 40 nin ọle gbe kike bhi ọne otọ nan. Ọle da re ene ẹghe nan rẹ re izebhudu nin edibo nesọle nin ofẹn rẹ ha mun, ne yẹ ha lu akhiẹ. Ọnan da re ele ha ghọnghọn, yẹ miẹn ọne izebhudu rẹ ha wewe ẹmhọn Agbejele, yẹ man ẹbho emhin. w24.10 12 ¶1-3

Beji ẹghe ha rẹ ha gbera, obhokhan ki dọ wanre kiẹn ọwanlẹn, ọkpakinọn, ọ i wo re inian sunu nin ọria rẹ dọ kiẹn Kristiẹn nọn deziẹn bhi oga. Bhi ọsi ijiẹmhin, ibhio mhan nin ikpea bi ikhuo ne ha ribhi agbotu nọn ribhi Kọrint miẹn ọne ọta nọn mhẹn ọbhi egbe, ele da mianmẹn, ele da miẹn elinmhin nọn khiale yẹ manman luẹ emhin bhi emhin nin Pọl nin odibo ha man ele le. (Iwẹn. 18:​8-11) Ikpe ne bunbun rẹ gbera beji ele mianmẹn fo, ene bunbun bhi ẹwẹ ele bha sẹyẹ deziẹn bhi oga. (1 Kọr. 3:2) Emhin ọhẹnhẹn nọn khẹke nin mhan lu rẹ sabọ kiẹn Kristiẹn nọn deziẹn hi, nin mhan rẹ ji ọ ha hu mhan bhi udu rẹ ha lu re alo. Ẹghe i ribhọ nin ẹbho ne “hoẹmhọn emhin nin ẹwanlẹn iye,” ne bha ho nin ele lu re alo ha rẹ sabọ kiẹn Kristiẹn nọn deziẹn. (Prov. 1:22) Mhan bha ho nin mhan diabe eria ne wanre ne sẹyẹ ho nin ene biẹ ele ha taman ele ebi ele ha lu. Ọkpakinọn, mhan ho nin mhan tobọmhan ha zẹ ebi mhan ha lu, yẹ dọnmhegbe ha ziẹn ikolu nin mhan bi Jehova ko mhọn. Ahamiẹn uwẹ sẹyẹ dọnmhegbe nin uwẹ rẹ kiẹn Kristiẹn nọn deziẹn, bhii Jehova nin ọle re ọne “ọhubhudu bi ahu nin [uwẹ] rẹ ha lu ọle.”—Fil. 2:13. w24.04 4 ¶9-10

Jehova ji mhan lẹn ebi emhin dia ọle yẹ bhi egbe rẹji uwedẹ nin ọle rẹ bhu ẹbho ohiẹn. Jehova da re ẹlinmhin nọn khiale nọnsọle rẹ rẹkpa Pita nin odibo rẹ kie gbẹn ẹmhọn nin Ẹzikiẹ nin akhasẹ ka gbẹn. (Ezek. 33:11) Ọne ọta ikoudure nan rẹkpa mhan rẹ lẹn ghe, ọ i yi nin Jehova rẹ wo re ẹjẹje fuẹn ẹbho a emhin nin ọle mun kalo, sokpan, ọle manman mhọn itohan, yẹ rẹ ọle man sade ọkhẹke. Be imhan lẹnlẹn rẹji ẹbho nan i da riọkpanọ? Baibo da sounun bhi ikpeta ẹbho nan i da riọkpanọ. Jesu da yọle ghe Judas Iskarọt i da riọkpanọ. (Mak 14:21; yẹ fẹ Jọni 17:12 bi study note ghe.) Judas wo taan ẹlo a sọtẹ da Jehova bi Jesu. (Fẹ Mak 3:29 bi study note ne ribhọ ghe.) Jesu da yẹ yọle ghe, eso bhi ẹbho ne mun ọkalo bhi oga ne nanlẹn ha suan, i da ha mhọn irudaba ọsi ariọkpanọ. (Mat. 23:33; fẹ Jọni 19:11 bi study note nọn yọle “the man” ghe.) Pọl nin odibo da yẹ yọle ghe, ẹbho ne de sibhi oga re ne bha fidenọ i da riọkpanọ.—Hib. 6:​4-8; 10:29. w24.05 4 ¶10-11

Ahamiẹn mhan bha zobọ bhọ rẹ ha sikẹ Jehova, Esu i da sabọ lu mhan emhin nọn ha si ikuan-egbe ji mhan rẹ sẹbhi ighegheghe. (1 Jọni 3:8) Bhi agbọn ọsọgbọn, ọ i yi emhin ne ha sabọ si okhẹnan ji mhan bhi uwedẹ oriọn ọkpa Jehova ha da gbega mhan, ọle dẹ yẹ gbega mhan bhi obọ uu. (Arẹm. 21:4) Udede isẹhoa mhan mhọn rẹ ha ribhi uwa ibọkpọ nọnsi Jehova, nọn yi nin mhan rẹ deba ọle ha mhọn ikolu rẹ sẹbhi ighegheghe. (Ezek. 37:27) Be ọkhẹke nin mhan rẹ lu emhin yẹ sade mhan ho nin mhan ha yi erumhunyẹn nesọle rẹ wo ha khian? Ahamiẹn ọria tie uwẹ vae bhi uwa nọnsọle, uwẹ dẹ ha ho nin uwẹ lẹn ebi ọle guanọ nin uwẹ rẹ lu emhin yẹ. Iriọ yẹ nọn, mhan ho nin mhan lẹn ebi Jehova guanọ bhi obọ eria ne ho ne wo ha yi erumhunyẹn. Oyẹẹ nin mhan mhọn da Jehova re mhan lu emhin nin mhan ha sabọ lu rẹ “re ọle ha ghọnghọn.” (Kol. 1:10) Ọkhẹke nin mhan wo ha mun ekpẹn nanlẹn, yẹ wo ha ye unan ọria nin ọle khin re. Mhan ha lu iriọ, ọ ki rẹkpa mhan rẹ rẹban emhin nọn hi ki rẹ khin nọn ha sabọ re ohu re ọle. Mhan wo muegbe nin mhan rẹ ha “lu emhin ọbhi oleghe” beji mhan rẹ khian rẹkhan Osẹnobulua nọnsẹmhan.—Mic. 6:8. w24.06 4 ¶8-9

Jehova da taman Ebraham nọn re Aiziki nin ọmọn nọnsọle rẹ zọese ji ọle. Ọnan i da zẹwẹ lẹkhẹ nin Ebraham rẹ lu. Ọrẹyiriọ, ọle da muegbe nin ọle rẹ lu ọle. Beji Ebraham ha ho nọn gbe ọne ọmọn an, Osẹnobulua da yọle nin ọle hẹi lu ọle. Ọne ijiẹmhin nan da rẹman ebi Jehova ha lu bhi ẹghe odalo. Ọle dẹ ka nin ọle rẹ re Ọmọn nọnsọle nin ọle manman hoẹmhọnlẹn rẹ zọese nin eria. Ọnan rẹman ghe Jehova wo manman hoẹmhọn eria. (Gen. 22:​1-18) Ẹghe nin Jehova ki rẹ gbe uhi nin ibhokhan Izrẹl beji ikpe ne bunbun gbera, ọle da yọle ghe nin ele ha noo elanmhẹn rẹ zọese ọbhi olukhọ nọnsele. (Lev. 4:​27-29; 17:11) Udede izọese nọn ha sabọ hinmhin eria bhi olukhọ sẹsẹsẹ, ọle a ha re ene izọese nin ibhokhan Izrẹl ha lu rẹ muegbe ọbhi otọ khẹ. Osẹnobulua da noo ene akhasẹ rẹ gbẹn ọlẹn ọbhi otọ ghe, ọne Ọmọn nan ve ive ọle nọn yi Ọmọn nọnsi Osẹnobulua, dẹ loya yẹ yu, nin ọle rẹ zọese nin eria rẹ dọ sẹbhi uwẹ, beji ọle ha da miẹn ọrebhe fan bhi obọ uu bi emhin ebe!—Isa. 53:​1-12. w24.08 4 ¶7-8

Ẹghe nọn hi ki rẹ khin nin uwẹ zẹ rẹ ha tie Baibo nọnsẹ, dọnmhegbe guanọ uwedẹ nin uwẹ ha rẹ ha re obọ rẹkhan ebi uwẹ tie. Beji uwẹ rẹ tie ulọnlẹn eso bhi Baibo, nọọn egbe ẹ, ‘Be mẹn ha rẹ sabọ re obọ rẹkhan ebi mẹn tie yẹ nian, la bhi ẹghe odalo?’ Nan rẹ re ijiẹmhin ọbhọ, nan man yọle ghe uwẹ wo la tie 1 Tẹsẹlonaika 5:​17, 18 fo. Bhiriọ, uwẹ sabọ rẹ mundia ria eria nyan eka igba nin uwẹ nan erọnmhọn ji Jehova bhi ukpẹdẹ, bi ebi uwẹ tan ọkhọle a man ọlẹn sẹ yẹ. Sẹyẹ, uwẹ sabọ rẹ re ọkhọle ria ẹmhọn emhin nin ọle lu nin uwẹ nọn ti uwẹ bhọ. Asabọmiẹn ọnan da re uwẹ mhanmhanlẹn nin uwẹ rẹ ha khuẹnmhẹn Jehova bhi emhin ea kpataki nin ọle lu nin uwẹ bhi ukpẹdẹ. Ahamiẹn uwẹ re inian ha noo obhi ẹghe khere rẹ ria eria nyan ebi uwẹ luẹ bhi Baibo, ọ dẹ rẹkpa uwẹ rẹ sabọ lẹn otọ Ọta nọnsi Osẹnobulua nọnsẹn, yẹ ha re obọ rẹkhan ọlẹn. Ria eria nyan ebi uwẹ ha rẹ manman miẹn elele bhọ yẹ sade uwẹ re inian ha ria eria nyan eji uwẹ tie bhi Baibo ukpẹdẹ-ukpẹdẹ. Uwẹ da ha lu iriọ, uwẹ ki sabọ ha re obọ rẹkhan ebi uwẹ luẹ bhi Baibo. w24.09 4-5 ¶9-10

Jehova man mhan bhi uwedẹ nin mhan ha rẹ sabọ ha zẹ emhin bhi obọ. Arẹmiẹn ọ ti mhan bhọ sade a lu ẹsele nin mhan, mhan ha lu ẹsele nin ẹbho mhan da ghọnghọn nẹ. Ọ re mhan ghọnghọn sade mhan lu ẹsele nin ibhio mhan nin mhan ko ga. Sẹyẹ, mhan wo ghọnghọn sade ele khuẹnmhẹn mhan bhi ebi mhan lu nin ele. Aharẹmiẹn ẹbho nin mhan lu ẹsele nan khuẹnmhẹn mhan la ele bha khuẹnmhẹn mhan, mhan dẹ sabọ ha ghọnghọn ranmhude mhan lẹn sẹ ghe emhin nọn gbale mhan lu. Emhin nọn hi ki rẹ khin nin uwẹ rẹ lu ẹsele, ha mhọnlẹn bhi ọkhọle ghe “Jehova mhọn ọne ahu rẹ re ebe gbera iriọ nin uwẹ.” (2 Chron. 25:9) Mhan i da sabọ lu ẹsele sẹ bii Jehova. Emhin i ribhọ nọn ha re mhan ghọnghọn nẹ ghe, Jehova tobọle re ihaosa nin mhan. Bhiriọ, bha ji mhan wo ha re egbe khọkhọ Aba mhan nọn zẹ emhin bhi obọ. w24.09 31 ¶20-21

Jehova mhọn itohan bi ẹkẹ-ẹjẹjẹ. (Ps. 103:13; Isa. 49:15) Ọ ba ọle bhi egbe sade mhan loya. (Zech. 2:8) Ọle re ọle lẹkhẹ nin mhan rẹ sabọ ha yi imọẹ ọle. (Ps. 25:14; Iwẹn. 17:27) Ọle mhọn idegbere; “ọle debhẹre ghe otọ bi okhun, yẹ si ene mhọn idegbere kpanọ bhi otọ re.” (Ps. 113:​6, 7) Họla i da ha ho nin ọle re uyi nin Osẹnobulua nọnsẹmhan nọn khua? Mhan re uyi ji Jehova ranmhude mhan guanọ nin ẹbho lẹn ọlẹn nọnsẹn. Ẹbho ne bunbun bha lẹn ẹmhọanta rẹji Jehova. Bezẹle? Ranmhude, Esu re ohoghe nin ọle bha Jehova le rẹ re ọkhọle ọsi ẹbho ne bunbun gbin. (2 Kọr. 4:4) Esu re ẹbho ne bunbun rẹọbhọ ghe, Jehova to gbe, ghe ẹmhọn mhan bha rẹtẹ ọle, sẹyẹ ghe, ọle hi ọnọn mhọn obọ bhi iloya ne bunbun ne ribhi ọne agbọn nan. Ọkpakinọn, mhan lẹnmhin ghe ọnan i yi ẹmhọanta. Mhan mhọn ọne isẹhoa rẹ ji ẹbho lẹn ẹmhọanta rẹji Osẹnobulua, yẹ re uyi ji ọle.—Isa. 43:10. w25.01 3 ¶6-7

Arẹmiẹn ọ gba nin Jesu nin Ọmọn nọnsi Osẹnobulua, sẹyẹ ọle wo ha lu emhin ọhan-ilo kẹkẹ, Esu da noo ẹbho eso rẹ ha bha ọle ohoghe. Bhi ọsi ijiẹmhin, ene mun okalo bhi oga da taman ẹbho ghe, “ojie ọsi ene ẹlinmhin-ebe” re ahu nin Jesu rẹ sabọ ha khu ẹlinmhin ne i mhẹn si ẹbho bhi egbe re. (Mak 3:22) Ẹghe nan rẹ ha gui ẹzọ nọnsi Jesu, ene mun okalo bhi oga da yọle ghe, ọle re unun ji Osẹnobulua. Ele da yẹ sua ẹbho ọbhọ rẹ gbe Jesu a. (Mat. 27:20) Akizẹbue, beji ene rẹkhan Jesu ha wewe ọne ọta nọn mhẹn, ẹbho ne kpokpo ele “da sua ẹbho ne iyi ibhokhan Ju ọbhọ” rẹ ha kpokpo ele. (Iwẹn. 14:​2, 19) Watchtower ọsi Dizẹmba 1, 1998, da ta ọnan rẹji ẹmhọn nọn ribhi ebe ọsi Iwẹnna 14:2. Ọ da yọle: “Ọ i yi ọne ọta nọn mhẹn nin ene Kristiẹn ha wewe ọkpa ene ibhokhan Ju he, ọkpakinọn, ele da ha ta ọta ebe ele bhi egbe beji a ha da miẹn ene ẹbho bha yẹ ha ka ele ehọ, yẹ he ele.” Ẹlẹnan, Esu sẹyẹ wo “hiẹ ẹbho ne ribhi ọne otọ agbọn nan rebhe.” w24.04 11 ¶15-16

Ọ i yi ẹghe nin ọria rẹ yu ha rẹman si a dẹ riọ ọle kpanọ, la si a i da riọ ọle kpanọ. Ọbhuohiẹn nọn gbale Jehova khin, bhiriọ, ọle dẹ bhuohiẹn bhi uwedẹ nọn gbale. (Ps. 33:​4, 5) Mhan dẹ sabọ ha mhọnlẹn bhi ọkhọle ghe “Ọbhuohiẹn ọsi ọne otọ nan rebhe” dẹ wo lu emhin nọn gbale. Emhin ẹwanlẹn yẹ nọn nin mhan rẹ yọle ghe, ọ i yi eji ọria da nyẹnlẹn ha rẹman si ọle dẹ ha mhọn ọne ikhuaẹloghe nin ọle rẹ kie nyẹlẹn bhi ẹghe odalo. Ẹlẹnan nian, ẹbho ne bunbun nyẹnlẹn bhi agbaẹbho nan da mun idobolo ọbhi iwẹnna oga nọnsẹmhan. Ranmhude ọnan, ele bha miẹn ọne isẹhoa rẹ họn ẹmhọn Agbejele beji ele ha da dọ ha ga Jehova. Mhan lẹnmhin ghe Jehova i da bhu ẹbho ne sẹ iriọ ohiẹn bọsi ene “ẹbhe.” (Mat. 25:46) Jehova nin ọbhuohiẹn ọsi ọne otọ rebhe ẹmhọn ene ẹbho nan rẹtẹ gbera imhan nin eria. Mhan bha lẹn ebi Jehova ha rẹ lu emhin yẹ bhi ẹghe ekpokpo nọn khua. Asabọmiẹn ẹbho eso dẹ miẹn ọne isẹhoa rẹ luẹ ẹmhọn ọlẹn, dọ ha mhọn urẹọbhọ da ọle, yẹ wo sun rẹkhan ọlẹn bhi ẹghe nin ọle ha rẹ kpe elin nọnsọle khia bhi isira ọrebhe.—Ezek. 38:16. w24.05 12 ¶14-15

Ọ wo ti ẹbho nesi Osẹnobulua bhọ rẹ ha rẹkpa ibhio ele. (2 Kọr. 8:4) Nin ele rẹ sabọ lu ọnan ẹgheso, ọkhẹke nin ele ha mhọn izebhudu. Bhi ọsi ijiẹmhin, ahamiẹn okhọn zegbere, ene ewanlẹn lẹnmhin ghe, ibhio ele nin ele ko ga dẹ ha guanọ ikoudure, urẹkpa, emhin eso ne khẹke nin ele ha rẹ ha gbẹloghe egbe, bi emhin ne ha rẹkpa ele rẹ sabọ ha ziẹn urẹọbhọ nọnsele. Ranmhude ene ewanlẹn hoẹmhọn ibhio ele, ele muegbe rẹ ne emhin nin ele guanọ je ele, aharẹmiẹn ele dẹ mun iẹnlẹn nọnsele ọbhi okhẹnan rẹ sabọ lu iriọ. Bhi idia nọn sẹ inian, ọ manman lu uhọnmhọn emhin nin mhan rẹ re obọ rẹkhan adia beji okugbe ha da ha ribhi ẹwẹ mhan. Ọkhẹke nin mhan re obọ rẹkhan adia nin Bẹtẹ nọn ribhi eji mhan ye ha re nin mhan. (Hib. 13:17) Ọkhẹke nin ene ewanlẹn ha fẹ adia rẹji ebi a rẹ muegbe ọbhi otọ khẹ emhin idunmhunre yẹ ẹghe rebhe, bi ebi ọkhẹke nin ele lu sade emhin idunmhunre sunu. (1 Kọr. 14:​33, 40) Ha mhọn izebhudu, ọkpakinọn uwẹ ha noo ẹwanlẹn. (Prov. 22:3) Manman ria eria dinmhin ọkuẹsẹ uwẹ zẹ ebi uwẹ ha lu. Hẹi dọ ha lu emhin ne ha si uwẹ ọbhi okhẹnan. Mun udu nyan Jehova. Ọle dẹ rẹkpa uwẹ rẹ sabọ re ẹwan-ẹwan rẹ rẹkpa ibhio ẹ nin bha ko ga. w24.07 4 ¶8; 5 ¶11

Devid nin ojie wo lẹn Jehova nọnsẹn, sẹyẹ ọle wo mun udu nyan ọlẹn. Ẹghe nin eghian ọlẹn rẹ ha khu ọle khian, rẹ dọ sẹbhi Sọl nin Ojie, Devid da bhii Jehova nọn rẹkpa ọle. Beji Osẹnobulua ki wanniẹn erọnmhọn nọnsọle fo, yẹ miẹn ọlẹn fan, ọle da gbẹn yọle: “Jehova nyẹnlẹnmhin!” (Ps. 18:46) Be Devid re ọnan ta? Ebe ọkpa da yọle ghe, izebhudu nin Devid ha mhọn da Jehova ọle ha rẹman, ghe Jehova hi, “osẹ nọn nyẹnlẹn, nọn wo rẹkpa eguọmhandia nesọle ẹghe rebhe.” Devid lẹnmhin ghe Jehova daghe emhin rebhe ne sunu ji ọle, sẹyẹ, ọle muegbe rẹ rẹkpa ọle. Ọnan da rẹkpa Devid rẹ wo ha ga Jehova, yẹ re ogẹn ji ọle. (Ps. 18:​28, 29, 49) Nin mhan rẹ dọ lẹn ghe Jehova hi Osẹ nọn nyẹnlẹn, ọ dẹ rẹkpa mhan rẹ wo re ọyaya ha ga ọle. Ọ dẹ re ahu nin mhan rẹ sabọ ziẹngbe ọkakale kẹkẹ, yẹ re ọhubhudu nin mhan rẹ wo ha miẹnsọn bhi oga nọnsi Osẹnobulua. Rẹ deba ọnin, ọ dẹ rẹkpa mhan rẹ wo ha sun rẹkhan Jehova khian. w24.06 20-21 ¶3-4

Be imhan ha sabọ miẹn luẹ bhi ene ẹmhọn nan nin Pọl gbẹn ji Kristiẹn ne ribhi Tẹsẹlonaika? Ahamiẹn mhan họn ọta ne bha diẹn mun ebi mhan luẹ bhi Baibo, la mhan họn ẹmhọn okha nọn han mhan ilo, ọkhẹke nin mhan noo ẹwan. Bhi ẹghe ọsi Soviet Union, ibhio mhan da miẹn ilẹta ọkpa bhi obọ eghian mhan. Ọne ilẹta da wo gene diabe ghe, Bẹtẹ nọn ke okhun nẹ gbẹn ọlẹn re. Ọne ilẹta da yọle ghe, ibhio mhan eso sabọ rẹ waegbea yẹ mun agbotu nọnsele gbọ. Ọne ilẹta da wo gene diabe ebe na bhi obọ ibhio mhan ne ribhi Bẹtẹ nọn ke okhun nẹ vae, ọkpakinọn, ele bha sabọ hiẹ ibhio mhan ne wo gene ha sun rẹkhan Jehova. Ele da daghe ọle ghe, ẹmhọn nọn ribhi ọne ilẹta bha diẹn mun ebi a ka man ele le khẹ. Ẹlẹnan nian, eghian mhan wo ha noo itanẹti rẹ wewe ẹmhọn ne i yi ẹmhọanta beji ele ha da re ọle si ozughu bi iwaegbea re bhi ẹwẹ mhan. Nin mhan rẹ wo “jẹje fikekegbe emhin nin [mhan] rẹọ i,” ọkhẹke nin mhan dọ fẹghe si ebi mhan họn, la si ebi mhan tie diẹn mun ẹmhọanta nin mhan ka luẹ khẹ. Mhan ha lu iriọ, mhan ki sabọ gbega egbe mhan.—2 Tẹsẹ. 2:2; 1 Jọni 4:1. w24.07 12 ¶14-15

Emhin nọn kokhun nẹ nin mhan ha sabọ zẹ rẹ lu hi, nin mhan rẹ re egbe guẹ nin Jehova, yẹ dọ deba ẹbho nesọle ha ga ọle. Jehova guanọ nin ọrebhe lu iriọ. Bezẹle? Ọle guanọ nin ele deba ọle ha mhọn ikolu, yẹ ha mhọn ọne isẹhoa rẹ nyẹnlẹn bhi ighegheghe. (Deut. 30:​19, 20; Gal. 6:​7, 8) Ọrẹyiriọ, Jehova i sua ọria soso ọbhọ rẹ dọ ha ga ọle. Ọle re otọ nin ọdeọde rẹ zẹ ebi ọle ha lu. Ọkpakinọn, be ene ewanlẹn ha lu yẹ sade ọria nọn mianmẹn dọ lu emhin ebe nọn manman kaka? Ahamiẹn ọle bha fidenọ, a ki re ọle sibhi agbotu re. (1 Kọr. 5:13) Ọrẹyiriọ, Jehova sẹyẹ wo re ẹlo ọbhọ ghe ọne ọria dẹ fikie bu ọle re. Ọnan bhọ zẹle nin ọle da je Ọmọn nọnsọle re nọn dọ yu nin mhan, beji ọle ha da sabọ ha re emhin ebe ọsi eria ne fidenọ rẹhunmhan ele. Jehova nin Osẹ ọsi oyẹẹ wo guanọ nin eria ne lu olukhọ fidenọ.—Zech. 1:3; Rom 2:4; Jem. 4:8. w24.08 14 ¶1-2

Bhi ẹghe nin Jọni rẹ gbẹn ilẹta nọnzi ea, eria eso da ha man iman-emhin oghoghe bhi agbotu, yẹ si ozughu. Ọrẹyiriọ, eso da yẹ wo ha “khian bhi uwedẹ ẹmhọanta.” Ele da wo ha hẹnmhọn nin Jehova, yẹ “re obọ rẹkhan uhi nin ọle gbe nin mhan.” (2 Jọni 4, 6) Ene Kristiẹn nan da re Jọni bi Jehova manman ha ghọnghọn. (Prov. 27:11) Be imhan miẹn luẹ bhi ọnan? Mhan dẹ miẹn eghọnghọn bhọ sade mhan wo ha sun rẹkhan Jehova. (1 Jọni 5:3) Bhi ọsi ijiẹmhin, ọ re imhan ghọnghọn nin mhan rẹ lẹn ghe emhin nin mhan lu re Jehova ghọnghọn. Ọ re Jehova ghọnghọn sade mhan rẹban ene emhin kẹkẹ ne i mhẹn nin ẹbho lu bhi ọne agbọn nan, bi sade mhan wo ha hẹnmhọn nanlẹn. Ọnan yẹ wo re ene ẹhi ne ribhi okhun ghọnghọn. (Luk 15:10) Mhan rebhe yẹ wo ghọnghọn sade mhan daghe ọle ghe, ibhio mhan sun rẹkhan Jehova. (2 Tẹsẹ. 1:4) Bhi ẹghe nan ha rẹ fuẹn ọne agbọn Esu nan an, ọ dẹ wo manman re mhan ha ghọnghọn nin mhan rẹ zẹ nin mhan rẹ sun rẹkhan Jehova. w24.11 12 ¶17-18

Eka ẹghe ọ ha ree ọkuẹsẹ uwẹ dọ taman ọria ghe uwẹ hoẹmhọn ọlẹn? Uwẹ ha wo kẹ re ẹjẹje nanlẹn talọ, ọle sabọ rẹ ha riale ghe uwẹ bha ria eria nyan ọlẹn fo ọkuẹsẹ uwẹ dọ nanlẹn talọ. (Prov. 29:20) Bhi obọ nọnkẹle, ahamiẹn ọ bue gbe, ọne ọria sabọ rẹ ha riale ghe uwẹ bha lẹn ebi uwẹ guanọ, manman nọn ahamiẹn ọne ọria ki mọn lẹn sẹbhọ ghe ẹmhọn ọlẹn ri uwẹ bhi ọkhọle. (Eccl. 11:4) Ọkuẹsẹ uwẹ dọ ne ọria talọ, hẹi wo ha mhọn ọlẹn bhi ọkhọle ghe uwẹ bi ọne ọria dẹ wo bọ egbe. Ọkpakinọn, ji a miẹn ghe uwẹ muegbe nin uwẹ rẹ re okhuo, yẹ ha mhọn ọlẹn bhi ọkhọle ghe asabọmiẹn ọne ọria dẹ ha yi amhẹn esili rẹji uwẹ. Be ọkhẹke nin uwẹ lu sade uwẹ dọ kere ghe ẹmhọn uwẹ ti ọria bhọ? Ahamiẹn uwẹ bha hoẹmhọn ọne ọria, re uwedẹ nin uwẹ rẹ lu emhin rẹ rẹman ọne ọria ghe ẹmhọn ọlẹn i ri uwẹ bhi ọkhọle. Ọ i da ha yi emhin nọn mhẹn nin uwẹ rẹ re ọria ha riale ghe, ibha dẹ sabọ zẹ egbe ọshọ, sokpan ẹmhọn ọlẹn i ri uwẹ bhi ọkhọle.—Ẹfẹ. 4:25. w24.05 22-23 ¶9-10

Eria nin Jehova gene tobọle zẹ, ne yẹ wo ha sun rẹkhan ọlẹn Jesu da miẹn ọbhi egbe bhi ọne Ejele nọn ribhi okhun. Ọria nọn hi ki rẹ khin bhi ẹwẹ enanzẹle nọn bha ha babegbe, ihaosa nọnsọle i da sẹ ọle bhi obọ (Mat. 24:31) Ọkhẹke nin ẹbho nesi Jehova rebhe re obọ rẹkhan ene ẹmhọn nan nin Jesu tale, nin ele ha babegbe yẹ ha sun rẹkhan Jehova aharẹmiẹn ọne otọ nan ele ha da nyẹnlẹn la okhun nọn. Mhan wo manman lẹn unan ọria nin Jehova khin, bhiriọ mhan rẹọbhọ ghe ọle dẹ bhuohiẹn bhi uwedẹ nọn gbale. Mhan i dọ ha kpokpo egbe sade Jehova zẹ eria eso bhi ọne ẹghe nọnsẹmhan nan nin ele dọ nyẹnlẹn bhi okhun. Mhan yẹ wo yere ebi Jesu tale rẹji ene ikpea ne dọ wẹnna bhi egbe ẹghe ọsemuan bhi ọne arẹkhọkhọ ọsi ugbo ọsi ivain. (Mat. 20:​1-16) Igho nan re nin eria ne ka munhẹn ha wẹnna bhi ọne ugbo, ọle a yẹ re ne eria ne vae beji a ki zẹbue. Iriọ yẹ nọn, ẹghe nọn hi ki rẹ khin nin Jehova rẹ re Kristiẹn kiẹn ọkpa bhi enanzẹle, ihaosa nin enekẹle da miẹn ọle ha yẹ miẹn sade ele ga sotọ. w24.09 24 ¶15-17

Jesu wo re ijiẹmhin nọn gbale ọbhi otọ rẹji ebi ọkhẹke nin mhan rẹ lu emhin yẹ sade a lu mhan khọ. Bha ji mhan zilo nyan uwedẹ nọn bha gba nin ẹbho bhi azagba-uwa nọnsọle, bi ẹbho bhi olele rẹ ne ọle lu emhin. Ibhio ọle ne bha rẹọbhọ emhin nin ọle ha man da yọle ghe ẹwan bha yẹ gba nanlẹn. Ene mun ọkalo bhi oga da ha yọle ghe, ene ẹlinmhin ebe re ahu nanlẹn rẹ ha lu ene emhin ọhan-ilo nin ọle ha lu. Eyokhọnlẹn ọsi Romu da zuọzuọ ọle, gbe ọle ugbemhin oya, yẹ gbe ọle a. (Mak 3:​21, 22; 14:55; 15:​16-20, 35-37) Jesu da ziẹngbe ene oya nan rebhe bi emhin ebhebhe ne dia iriọ, sẹyẹ ọle bha lu haosa. Be imhan ha sabọ miẹn luẹ bhi ọne ijiẹmhin nan? (1 Pita 2:​21-23) Jesu wo re ijiẹmhin nọn gbale ọbhi otọ nin mhan rẹji ebi ọkhẹke nin mhan rẹ lu emhin yẹ sade a bha lu mhan nọnsẹn. Ọle lẹn ẹghe nọn khẹke nin ọle rẹ huẹan, bi ẹghe nọn khẹke nin ọle rẹ talọ. (Mat. 26:​62-64) Ọ i yi ọta ne bha gba rebhe nin ẹbho ta ọle bhi egbe ọle ha wanniẹn. (Mat. 11:19) Beji ọle zẹ nin ọle rẹ wanniẹn eria ne ha zuọzuọ ọle, ọle bha ha ghunmhun ele, la ha yan nin ele. w24.11 4-5 ¶9-10

Ji a man yọle ghe uwẹ re emhin nọn mhẹn an, nọn mhọn-ose rẹ lu ẹsele nin ọria nọnsẹ. Ọ dẹ wo manman ba uwẹ bhi egbe sade ọne ọria khue ọne emhin ọbhi ẹkpẹti, ọle bha noo ọle. Ọkpakinọn, ahamiẹn ọne ọria khuẹnmhẹn uwẹ, yẹ munhẹn ha noo ọne emhin nin uwẹ rẹ lu ẹsele nanlẹn, ọ dẹ wo re uwẹ ha ghọnghọn. Be bhọ mhan tẹmhọnlẹn? Jehova da re Ọmọn nọnsọle rẹ zọese nin mhan ranmhude ọle hoẹmhọn mhan. Ọ dẹ wo re ọle ha ghọnghọn sade mhan rẹman ghe, ẹsele nin ọle lu nin mhan bi oyẹẹ nin ọle mhọn da mhan ti mhan bhọ! (Jọni 3:16; Rom 5:​7, 8) Beji ẹghe ha rẹ ha gbera, asabọmiẹn ọne izọese i yẹ da ha ti mhan bhọ bii ọnikhẹ. Ọnan ha sunu, ọ ki diabe ghe mhan khue ọne ẹsele nọn mhẹn an nin Osẹnobulua re nin mhan ọbhi ẹkẹ ẹkpẹti, bọsi ghe mhan bha yẹ họ nin mhan daghe ọle, la ha ria ẹmhọnlẹn. Beji a ha da miẹn emhin nọn sẹ inian bha sunu, ọkhẹke nin mhan wo ha ria ẹmhọn ẹsele nin Osẹnobulua bi Jesu lu nin mhan. w25.01 26 ¶1-2

Ọne obhio mhan i da ha yi ọria nọn la na bhi oga. Arẹmiẹn ọ i yi oko ghe ikpe ne bunbun dẹ gbera sade ọle mianmẹn fo ọkuẹsẹ a re ọle kiẹn ọwanlẹn, ọ dẹ khẹke nin ọle ka re ẹghe eso rẹ ha ziẹn ikolu nin ọle bi Jehova ko mhọn beji ọle ha da sabọ dọ kiẹn Kristiẹn nọn deziẹn. Ọkuẹsẹ a re ọle kiẹn ọwanlẹn, ọkhẹke nin ọle rẹman ghe ọle mhọn idegbere beji Jesu yẹ rẹ mhọnlẹn, sẹyẹ, ọle muegbe rẹ mundia khẹ ẹghe nọn hi ki rẹ khin nan ha rẹ mun ẹsọn nanlẹn bhi agbotu. (Mat. 20:23; Fil. 2:​5-8) Uwẹ dẹ rẹman ghe “ọria nọn mhọn asun-rẹkhan” uwẹ khin sade uwẹ wo ha sun rẹkhan Jehova, ha re obọ rẹkhan uhi ne gbale nesọle, yẹ ha re obọ rẹkhan adia nin ọle noo agbotu nọnsọle rẹ re nin mhan. Baibo wo yọle ghe, ọkhẹke nin ene ewanlẹn ha yi ọria nọn guẹ rẹ man emhin. Ọnin ki rẹman ghe ele rebhe dẹ wo guẹ ebi a rẹ re ọta man yẹ rẹrẹrẹ? Eye. Arẹmiẹn ewanlẹn eso i sabọ rẹ inian guẹ rẹ man emhin, ele wo sabọ man emhin nọnsẹn bhi iwẹnna itẹmhọn Osẹnobulua, yẹ guẹ rẹ re Baibo re ikoudure nin ibhio mhan. w24.11 23-24 ¶14-15

Ahamiẹn emhin ribhi eji uwẹ tiele bhi Baibo nọn bha mun uwẹ ẹlo kore, dọ gua otọ ọle fẹghe! Bhi ọne ukpẹdẹ nin rebhe, ria eria nyan ebi uwẹ gua otọ ọle kere, ebi ọ man uwẹ le rẹji Jehova bi Jesu, bi oyẹẹ nin ele mhọn da uwẹ. (Ps. 119:97) Hẹi ji egbe lọ uwẹ sade uwẹ bha miẹn emhin ọgbọn luẹ bhi ẹghe nọn hi ki rẹ khin nin uwẹ rẹ tie Baibo, la ha gua otọ emhin fẹghe. Beji uwẹ rẹ gua otọ uhọnmhọn-ọta ne ribhi Baibo, inian uwẹ diabe ọria nọn guanọ igolu. Ọria nọn guanọ igolu wo mhọn iziẹngbe, ọle re uri-agogo eso la ikpẹdẹ eso rẹ guanọ ọlẹn ọkuẹsẹ ọle bhọ miẹn obhiọ khere. Ọrẹyiriọ, ọle i ji egbe da lọ ọle, ranmhude obhiọ khere nin ọle miẹn lu uhọnmhọn-emhin rẹji ọle. Emhin ne ghanlẹn ne ribhi Baibo bhọ ghan gbera igolu! (Prov. 8:10) Bhiriọ, hẹi ji egbe lọ uwẹ, wo ha re obọ rẹkhan emhanmhan nin uwẹ re ọbhi otọ rẹ ha tie Baibo.—Ps. 1:2. w25.01 25 ¶14-15

Jehova guanọ nin mhan rẹhunmhan ẹbho ne lu mhan emhin nọn ba mhan bhi egbe. (Ps. 86:5; Luk 17:4; Ẹfẹ. 4:32) Emhin nin ọria lu, la ọta nin ọria ta sabọ rẹ wo ba mhan bhi egbe, manman nọn sade ọmọẹ mhan la ọria bhi azagba-uwa nọnsẹmhan ta ọne ọta, la lu ọne emhin. (Ps. 55:​12-14) Ẹgheso, emhin nin ọria lu mhan le sabọ rẹ ba mhan bhi egbe sẹbhọ ghe, ọ ki dia mhan ghe a di ọghale mhan bhi egbe. (Prov. 12:18) Mhan sabọ rẹ ha lu bọsi ghe emhin soso bha zẹwẹ sunu. Ọkpakinọn mhan ha lu iriọ, ọ ki diabe ghe mhan zẹ ọne ọghale obọ bhi eji ọne ọria di ọle i. Iriọ yẹ nọn, mhan i da wo sabọ re ẹlo ọbhọ ghe, emhin nin ọria lu mhan le dẹ tobọle siegbe kie sade mhan bha lu emhin soso ọbhọ. Emhin nọn kẹ wo sunu sade ọria lu ebe khọ mhan bhi ẹkẹ hi, nin mhan rẹ miẹn ohu. Baibo yọle ghe, ohu sabọ rẹ re mhan, ọkpakinọn, ọ yẹ sekha nin mhan ghe nin mhan hẹi wo ha miẹn ohu khian. (Ps. 4:4; Ẹfẹ. 4:26) Bezẹle? Ranmhude emhin nọn mhẹn i kẹ na bhi ohu re. (Jem. 1:20) Yere ghe, emhin nọn kẹ wo sunu nọn nin mhan rẹ miẹn ohu sade ọria rẹ ẹkẹ khọ mhan, ọkpakinọn mhan ha tobọmhan zẹ si mhan dẹ wo ha miẹn ọne ohu khian. w25.02 15 ¶4-6

Jesu da noo arẹkhọkhọ rẹ rẹman ghe emhin uhuki nọn nin ọria rẹ khu rẹkhan igho rẹ sẹbhọ ghe ọle ki ye Osẹnobulua a. (Luk 12:​16-21) Ọria soso bha lẹn ebe ha sunu ewiẹ. (Prov. 23:​4, 5; Jem. 4:​13-15) Sẹyẹ, Jesu da yọle ghe ọrebhe ne guanọ nin ele ha yi edibo nesọle dẹ muegbe rẹ fikekegbe emhin rebhe nin ele mhọnlẹn. (Luk 14:33) Kristiẹn ne ha ribhi Judia bhi ore nin ọhẹnhẹn, da re eghọnghọn ha lu ọne emhin nan nin Jesu tale. (Hib. 10:34) Ẹlẹnan nian, ibhio mhan ne bunbun sẹ wo zobọ bhi iwẹnna nin ele lu ranmhude ele bha ho nin ele re obọ ọbhi ilọnmhọn ahinmhin-ibo. (Arẹm. 13:​16, 17) Be rẹkpa ele rẹ sabọ lu iriọ? Ranmhude ele wo rẹọbhi ọne ive nin Jehova vele nọn yọle: “Mẹn ida zẹ ibha obọ ghẹdẹ, sẹyẹ, a bha miẹn ebe ha re imẹn fikekegbe ibha.” (Hib. 13:5) Bhiriọ, ọkhẹke nin mhan dọnmhegbe ha re igho ya, nin mhan ha sabọ miẹn rẹ gbẹloghe egbe sade mhan ki dọmanlẹn. Ọkpakinọn, ahamiẹn emhin nin mhan bha re ẹlo ọi sunu ji mhan, mhan wo rẹọbhọ ghe Jehova dẹ rẹkpa mhan. w25.03 29 ¶13-14

Jehova bha yọle nin mhan tobọmhan lu ọle rẹ dọ kiẹn Kristiẹn nọn deziẹn. Ọle noo ene ewanlẹn ne sun mhan, ne yẹ man mhan emhin bhi agbotu rẹ rẹkpa mhan rẹ sabọ dọ kiẹn Kristiẹn ne deziẹn bhi oga. Ele rẹkpa mhan rẹ sabọ “dọ kiẹn okpea-ọba, nọn wo gba nan fo bhi uwedẹ rebhe, beji ọ rẹ gba nin Kristi.” (Ẹfẹ. 4:​11-13) Jehova yẹ wo re ẹlinmhin nọn khiale nọnsọle nin mhan beji mhan ha da sabọ “lẹn uwedẹ nin Kristi rẹ ria eria.” (1 Kọr. 2:​14-16) Rẹ deba ọnan, Osẹnobulua da je nan gbẹn ebe ọsi Matiu, Mak, Luk bi Jọni beji mhan ha da sabọ lẹn uwedẹ nin Jesu rẹ ha ria eria, uwedẹ nin ọle rẹ ha talọ, bi uwedẹ nin ọle rẹ ha lu emhin bhi ẹghe nin ọle rẹ ha lu iwẹnna oga bhi ọne otọ nan. Uwẹ da ha re egbe khọkhọ Jesu bhi uwedẹ nin ọle rẹ ria eria bi uwedẹ nin ọle rẹ lu emhin, uwẹ ki sabọ dọ kiẹn Kristiẹn nọn deziẹn. Ọkpakinọn, nin mhan rẹ sabọ dọ kiẹn Kristiẹn nọn deziẹn bhi oga, ọ i yi ene iman-emhin ọhẹnhẹn rẹji Kristi ọkpa ọkhẹke nin mhan lẹn, ne yi ene ikuẹ-kuẹ iman-emhin ne ribhi Baibo. w24.04 4-5 ¶11-12

Ukpẹdẹ-ukpẹdẹ mhan rẹ zẹ ebi mhan ha lu. Emhin eso wo lẹkhẹ nin mhan rẹ zẹ, emhin bii, ebale nin mhan ha le, bi ẹghe nin mhan ha rẹ dọ nowẹ. Sokpan, eso i lẹkhẹ nin mhan rẹ zẹ. Eso bhi emhin nin mhan zẹ rẹ lu sabọ rẹ rẹso oga nin mhan re ji Jehova, ẹbho nesẹmhan, eghọnghọn nọnsẹmhan. Ọ dẹ yẹ rẹman si mhan dẹ ha mhọn egbe nọn danlẹn. Mhan ho nin mhan zẹ emhin nọn ha re imhan bi azagba-uwa nọnsẹmhan ha ghọnghọn. Ọnọn ke okhun nẹ hi, nin mhan rẹ zẹ emhin nọn ha re Jehova ha ghọnghọn. (Rom 12:​1, 2) Emhin kpataki nọn ha rẹkpa uwẹ rẹ zẹ emhin nọn gbale hi, nin uwẹ rẹ gua otọ ọne ẹmhọn nọnsẹn. Bezẹle nọn da khẹke nin mhan lu ọnan? Bha ji mhan fẹ ọne ijiẹmhin nan ghe. Nan man yọle ghe ọria bu dọkitọ dọ taman ọlẹn ghe egbe bha dan ọlẹn. Ọne idọkitọ dẹ be wo munhẹn ha gbẹloghe ọle? Eye! Ọle dẹ ka nọọn ọlẹn inọnta eso yẹ fẹ ọle egbe ghe beji ọle ha da lẹn ebi ọle ha rẹ gbẹloghe ọle yẹ. Iriọ yẹ nọn, mhan dẹ yẹ sabọ zẹ emhin nọn gbale rẹ lu sade mhan ka fẹ otọ ọne ẹmhọn ghe nọnsẹn. w25.01 14 ¶1-3

Ọrẹyiriọ, be bhọ mhan lẹn rẹji uwedẹ nin Jehova rẹ re itohan man? Be bhọ ọle sẹ rẹ rẹman yẹ ghe, “ọle bha guanọ nin ọria soso miẹn ugbekhuelo?” (2 Pita 3:9) Bha ji mhan fẹ ebi ọle rẹ re itohan man ẹbho ne lu olukhọ nọn manman kaka yẹ. Devid nin Ojie wo lu emhin ebe ne manman kaka. Bhi ọsi ijiẹmhin, ọle da gboghẹ yẹ gbugbe, sokpan, ọle ki fidenọ, Jehova da mhọn itohan da ọle yẹ rẹhunmhan ọlẹn. (2 Sam. 12:​1-12) Manasẹ nin Ojie yẹ wo lu emhin ebe ne kaka. Arẹmiẹn ọle wo gbi bhi ọkhọle, Jehova da sẹyẹ rẹhunmhan ọlẹn yẹ mhọn itohan da ọle beji ọle ki fidenọ. (2 Chron. 33:​9-16) Ene ijiẹmhin nan rẹkpa mhan rẹ lẹn ghe, Jehova dẹ sabọ mhọn itohan da ọria sade ọle daghe emhin nọn ha re ọle lu iriọ. Ọle dẹ riọ ene eria nan kpanọ bhi ẹghe odalo ranmhude ele rẹ lu emhin ebe ne kaka, ele da fidenọ. w24.05 4 ¶12