52 MAK
“Ọle Dẹ Sabọ Rẹkpa Mẹn”
RẸ NA bhi egbe obhokhan, ọle Mak nan yẹ tiọle Jọni rẹ munhẹn ha re izebhudu man. Ẹghe nin egbanegbe rẹ dọ mun Jesu, etuegbe nesọle da nẹgbe. Ọkpakinọn, Baibo da tẹmhọn “usẹn obhokhan ọkpa” nọn re izebhudu rẹkhan Jesu. Eso bhi ene ẹbho ne dọ mun Jesu da daghe ọle. Bhiriọ, ele da ha ho nin ele mun ọlẹn. Ọkpakinọn, ukpọn linẹn nọnsọle ọkpa ele sabọ fiobọ mun. Bhiriọ, ukpọn nin ọle yọ kotọ ọkpa ọle ki rẹ sabọ nẹgbe. Bhi ene ebe Baibo ne tẹmhọn iẹnlẹn nọnsi Jesu, ebe ọsi Mak ọkpa tẹmhọn ọne okha nan. Bhiriọ, ẹbho ne bunbun rẹọbhọ ghe Mak bhọ hi ọne usẹn okpia.
Jerusalẹm Mak da ha nyẹnlẹn. Asabọmiẹn ọle bi inẹn ọlẹn ko ha nyẹnlẹn, sẹyẹ, ọ diabe ghe inẹn ọlẹn manman fe. Beji Jesu yu fo, uwa nọnsele ene Kristiẹn da ha si egbe koko rẹ re oga ji Osẹnobulua. Ọnin zẹle nin Pita da diọbhi enin bhi ọne ukpasọn nin ẹhi fan ọlẹn fia bhi ighan. Edandan i ribhọ ghe Mak wo lẹn etuegbe nesi Jesu bi ene bunbun bhi edibo nesọle. Asabọmiẹn ọle wo luẹ ẹmhọn izebhudu bhi obọ ele.
Bhi egbe ukpe 46 C.E., Banabas nin obhio Mak, bi Pọl nin odibo da vae bhi Jerusalẹm. Ọ da wo ha re ele bhi ọkhọle rẹ man Mak emhin. Bhiriọ, ele ki ha ho nin ele ha khian Antiọk, ele da re ọle rẹkhan egbe. Ebe sẹbhi ukpe ọkpa ki gbera, Pọl bi Banabas da tie Mak nin ọle dọ deba ele ha tẹmhọn Osẹnobulua bhi ije kẹkẹ. Mak da ka nin ọle rẹ rẹkhan ele, yẹ ha rẹkpa ele. Ọnan rẹman ghe ọle dẹ ha nin Pọl bi Banabas miẹn ikuẹkuẹ ẹsọn eso, beji ele rẹ tẹmhọn Osẹnobulua khian.
Ọ bha lẹkhẹ hiehie nan rẹ ha yo okhian ẹghenin. Bhi ilẹta ọkpa nin Pọl gbẹn, ọle da yọle ghe, bhi okhian ne bunbun nin ọle yo, ọle wo miẹn “okhẹnan bhi ẹkẹ ẹdẹ, bhi obọ oyi, . . . bhi ẹkẹ agbaẹbho, . . . bhi ẹkẹ ojẹgbo, [bi] bhi ẹkẹ okpẹdẹ.” (2 Kọr. 11:26) Mak lẹnmhin ghe Pọl bi Banabas dẹ wo ha guanọ urẹkpa nọnsọle. Bhiriọ, ọle da wo muegbe rẹ lu emhin nọn hi ki rẹ khin nin ele yọle nin ọle lu. Ọne ẹsọn be re egbe lọ ọle? Baibo bha taman mhan. Ọkpakinọn, Baibo yọle ghe, beji ele sẹbhi Pamfilia, ọle da zẹ Pọl bi Banabas obọ fikie ha khian uwa nọnsọle bhi Jerusalẹm. Ọ wo manman ba ene ikpia nan bhi egbe nin Mak rẹ kpanọ zẹ ele obọ. Bhi ọsi ẹmhọanta, Pọl ọ ba ọle bhi egbe nẹ.
Ẹghe eso ki gbera, Pọl bi Banabas da muegbe nin ele rẹ gbo dọ tẹmhọn Osẹnobulua bhi ije ebhebhe. Banabas da sẹyẹ ha guanọ nin Mak rẹkhan ele. Ọkpakinọn, ọ bha zẹwẹ ha re Pọl bhi ọkhọle. Asabọmiẹn ọle da ha riale ghe, Mak i yi ọria nan sabọ mun udu nyan. Ọnan da wo si ovan re bhi ẹwẹ ele. Bhiriọ, ele da van egbe obọ. Banabas da re Mak rẹkhan egbe ha khian Saiprọs dọ ha tẹmhọn Osẹnobulua bhi enin. Ọkpakinọn, Pọl da re ọria ọbhebhe rẹkhan egbe dọ ha tẹmhọn Osẹnobulua bhi ije ebhebhe.
Edandan i ribhọ ghe, ọne emhin nan nọn sunu dẹ wo re egbe lọ Mak. Ọle lẹnmhin ghe emhin nin ọle lu ba Pọl bhi egbe, sẹyẹ, ranmhude ọle, imọẹ eva ne manman sikẹ egbe van egbe obọ. Mak be ha riale ghe Pọl lu ọle khọ? Ọle be ha khọẹkẹ Pọl? Ọle be ji ebe sunu re egbe lọ ọle, rẹ sẹbhọ ghe, ọle zobọ bhọ rẹ ha ga Jehova? Hiehie!
Isẹhoa kpataki nin Mak ha mhọnlẹn da yu ọle, ọrẹyiriọ, ọle bha ji egbe lọ ọle
Mak da wo ha lu eka nin ọle ha sabọ lu rẹ ha rẹkpa ibhio ọle nin ele ko ga. Bhi egbe ukpe 60 rẹ sẹbhi 61 C.E., a da mun Pọl khue bhi uwa nin ọle ye bhi Rom. Bhi ilẹta nin ọle gbẹn bhi ọne ẹghe nin, ọle da yọle ghe Mak ribhi eji ọle ye. Ọle da yẹ yọle ghe, Mak wo manman ha re ikoudure nanlẹn. Pita nin odibo yẹ tẹmhọn Mak bhi ilẹta nin ọle gbẹn bhi egbe ukpe 62 bi 64 C.E. Ọ diabe ghe Mak diọbhi otọ Babilọn nọn bha zẹwẹ sire dọ re urẹkpa bi ikoudure nin Pita nọn ki ha dọmanlẹn. Pita da tie Mak, “ọmọn nọnsẹmhẹn.” Mak wo manman ko Pita udu re bhi ọne ẹghe nan. Edandan i ribhọ ghe, Pita wo tẹmhọn ene emhin ne sunu bhi ene ẹghe nin ọle deba Jesu gbe man Mak. Bhi ebe Baibo nin Mak gbẹn, ọle da wo tẹmhọn emhin ne bunbun ne sunu bhi iẹnlẹn ọsi Pita. Asabọmiẹn Pita hi ọnọn ta ene emhin man ọlẹn, sẹyẹ, asabọmiẹn Rom ọle da gbẹn ọlẹn.
Ẹghe ọkike nin Pọl rẹ tẹmhọn Mak, ọle hi ẹghe nin ọle rẹ gbẹn ilẹta ji Timoti. Bhi ọne ẹghe nan, a da gbo mun Pọl ọbhi ighan. Ọle da taman Timoti nin ọle vae dọ tuẹ ọle, sẹyẹ, nin ọle re Mak rẹkhan egbe. Bezẹle nin ọle da yọle nin Timoti re Mak rẹkhan egbe? Pọl da yọle: “Ọle dẹ sabọ rẹkpa mẹn bhi iwẹnna oga.” Mak bi Timoti wo ha ghọnghọn rẹ dọ re ikoudure nin Pọl bhi ene ẹghe nin ọle gbe kike ọkuẹsẹ ọle yu. Arẹmiẹn Mak wo kuẹlo da ọkakale kẹkẹ, ọle da sẹyẹ wo ha re iyobọ nin ibhio ọle nin ele ko ga. Jehova wo manman hoẹmhọn Mak ranmhude uwedẹ nin ọle rẹ re izebhudu man.
Tie ọne okha bhi Baibo:
Inọnta:
Uwedẹ nela Mak rẹ re izebhudu man?
Manman Guanọ Otọle
1. Emhin nela rẹman ghe azagba-uwa ọsi Mak wo manman fe? (w10 3/15 6 ¶6–7 ¶1)
2. Baibo yọle ghe Mak da ha rẹkpa Pọl bi Banabas. Ẹsọn nela ọle ha nin ele miẹn? (Iwẹn. 13:5; w10 3/15 7 ¶5)
3. Ije kẹkẹ nela iwẹnna oga re Mak yo? (w10 3/15 8 ¶6-8) 1
Ifoto 1: Ije kẹkẹ nan ha sabọ miẹn Mak yo
4. Sounun bhi emhin nin Mak gbẹn bhi Baibo, nan ha sabọ miẹn ghe Pita hi ọnọn taman ọlẹn. (w08 2/1 26 ¶1)
Ria Eria Nyan Emhin Nin Uwẹ Luẹle
A bha tie Mak ọkpa bhi ene etuegbe la akhasẹ, ọrẹyiriọ, ọle da wo re idegbere ha rẹkpa ẹbho. Be mhan ha rẹ sabọ rẹ egbe khọkhọ ọle yẹ ẹlẹnan?
Ẹghe ribhọ nin Mak bha yẹ rẹ ha mhọn ọne isẹhoa rẹ deba Pọl ha lu iwẹnna oga. Ọrẹyiriọ, ọle da sẹyẹ wo ha lu eka nin ọle ha sabọ lu. Be mhan ha rẹ sabọ re egbe khọkhọ ọle yẹ sade mhan i yẹ ga bhi ihe nin mhan da rẹ ka ha ga? 2
Ifoto 2
Uwedẹ ọbhebhe nela uwẹ ha rẹ sabọ re egbe khọkhọ Mak bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
A zẹ Mak nin ọle deba Jesu gbẹloghe bhi okhun. Bezẹle nin ọnan da ti uwẹ bhọ?
Sẹyẹ Fẹ Ene Emhin Nan Ghe
Be ebe ọsi Mak rẹ dikẹ yẹ bhi ene ebe Baibo nekẹle ne tẹmhọn iẹnlẹn ọsi Jesu?
Noo okha ọsi Mak rẹ rẹkpa imọn nesẹ rẹ lẹn ebezẹle nọn bha da khẹke nin mhan zobọ bhọ rẹ ha ga Jehova.