48 STIVIN
“Okpia Nọn Manman Mhọn Urẹọbhọ Bi Ẹlinmhin Nọn Khiale”
IẸNLẸN ọsi Stivin da ha ribhi okhẹnan. Ẹbho da bha ọle ohoghe. Bhiriọ, a da tie ọle ẹzọ bhi ikotu ọsi Sanhẹdrin. Ọnan hi ikotu nọn ke okhun nẹ ọsi ibhokhan Ju. Uki eso ne gbera ọkuẹsẹ ọne ẹghe nan, ọne ikotu nan a da bhuohiẹn gbe Jesu, yẹ yọle nan gbe ọle a. Stivin lẹnmhin ghe a dẹ yẹ sabọ lu iriọ da ọle, ọrẹyiriọ, ọle bha zẹwẹ ha kpokpo egbe. Baibo da yọle: “Ẹlo nọnsọle [da] diabe ọsi ẹhi.” Bezẹle nin Stivin bha da ha kpokpo egbe arẹmiẹn ọria bii mhan ọle khin? Izebhudu nin ọle ha mhọnlẹn zẹle.
Baibo ji mhan lẹn ghe, “okpia nọn manman mhọn urẹọbhọ bi ẹlinmhin nọn khiale” Stivin ha khin. Ene edibo ne ribhi Jerusalẹm wo gba ẹkẹ ọle rẹ sẹbhọ ghe, ele da mun iwẹnna kpataki nanlẹn bhi ẹkẹ agbotu. Ẹghe ọkpa ribhọ nin ibhokhan Ju rẹ ha khọẹkẹ Stivin, rẹ sẹbhọ ghe ele da nanlẹn ha gbegbe. Ọkpakinọn, Stivin da noo Ebenọnkhiale rẹ ne ele zilo nọnsẹn, ranmhude ọnan, ele bha yẹ miẹn ebi ele ha rẹ mun ọlẹn mhọn. Ọnan da wo manman re ẹkẹ khọ ele, bhiriọ ele da mun Stivin ha khian ikotu ọsi Sanhẹdrin. Enin a ki da tare si a dẹ gbe Stivin a, la si a dẹ zẹ ọle obọ.
Asabọmiẹn Stivin lẹn ọta nin Jesu taman edibo nesọle, nin ọle rẹ mun ele egbe ọbhi otọ khẹ ebe ha sunu ji ele bhi ẹghe odalo. Jesu da yọle: “Ibha hẹi ha kpokpo egbe ba ẹmhọn ebi ibha ha ta; ebi a ha re nin ibha bhi ọne ẹghe nin, ọle ibha ha ta. Ranmhude, ọ iyi ibha da ha talọ. Ẹlinmhin nọn khiale da ha noo ibha rẹ talọ.” (Mak 13:11) Edandan i ribhọ ghe, ene ọta nin Jesu tale wo rẹkpa Stivin rẹ ha mhọn izebhudu. Ẹlinmhin nọn khiale nọnsi Jehova da wo gene rẹkpa Stivin rẹ de ọkhọle re. Ranmhude ọnan, ẹbho da ha yọle ghe, ọle diabe ẹhi, beji ọle mundia bhi ikotu ọsi Sanhẹdrin.
Itue 71, ele bhuohiẹn bhi ọne ikotu nan. Ikpia nan manman hẹnmhọnlẹn ele khin. Ele hi ene yẹ ha mun ọkalo bhi oga ọsi ibhokhan Ju. Udede ugha ele dia ha guẹzọ ọsi Stivin. Ele da fi aga nẹga, yẹ re Stivin mundia bhi odalo ele. Ikpia eva ne man emhin da yẹ wo ha ribhi enin, ele da wo ha gbẹn emhin rebhe nin ele ta ọbhi otọ. Ele da bha Stivin ohoghe ghe, ọle ta ọta ne bha gba rẹji Uhi ọsi Mozis, bi uwa oga nọnsi Osẹnobulua. Ahamiẹn ọria gene lu emhin nọn sẹriọ, uu ọle ha miẹn bhọ. Bhiriọ, Keafas nin ojohẹn da ki nọọn Stivin si ẹmhọanta ene ẹbho gene ta.
Stivin da ki wanniẹn ọlẹn. Ọle da tẹmhọn ebi Jehova sẹ rẹ ne ẹbho nesọle lu emhin yẹ. Ẹmhọn Ebraham ọle rẹ munhẹn. Ọle da yẹ tẹmhọn Josẹf, bi ebi ibhio ọle rẹ re oya nanlẹn yẹ. Stivin da re uwedẹ ekpẹn tẹmhọn emhin kẹkẹ nin Mozis lu, yẹ yọle ghe, ibhokhan Izrẹl bha ka Mozis ehọ. Ọle bhọ da tẹmhọn emhin ebhebhe nin Mozis lu nan bha gbẹn ọbhi obọ Baibo nan re urolo Hibru gbẹn.
Emhin rebhe nin Stivin ta wo rẹman ghe ọle re ẹlo nọn ghanlẹn rẹ ghe Uhi nin Jehova na obọ Mozis gbe, rẹ dọ sẹbhi ibọkpọ bi uwa oga nọnsi Jehova. Ọle da yẹ ji ele lẹn ghe, ẹghe-ẹghe ẹbho nesi Osẹnobulua rẹ ha mhọn akan-ehọ da ọria nọn hi ki rẹ khin nin Jehova zẹ nọn ha dia ele.
Stivin da gbotọ ebi ọle rẹọ i fanọn an man ikpia ne bha hoẹmhọn Kristiẹn, ne yẹ ha guanọ nin ele gbe ọle a
Stivin lẹnmhin ghe, ene ikpia nan nin ọle ha ne talọ i da mhọn itohan da ọle. Jehova da noo ẹlinmhin nọnsọle rẹ re izebhudu nin Stivin, beji ọle ha da sabọ taman ene ikpia nan ẹlo nin Jehova rẹ ghe ele. Stivin da ji ene ikpia lẹn ghe “eria ne wo bhi uhọnmhọn” ele khin. Sẹyẹ, ele “ilu rẹkhan adia ọsi ẹlinmhin nọn khiale,” beji aba ele nin ẹdẹlẹ bha rẹ lu rẹkhan ọlẹn. Ọnọn khọ nẹ bhọ hi, ele da gbe ọne akhasẹ a nin Mozis ka ta ọbhi otọ ghe ọ dẹ vae. Ọne akhasẹ nan khua okhun gbera Mozis. Ọne akhasẹ ki vae, ele “da khiẹn ọlẹn yẹ gbọle a.” Ọne akhasẹ nan hi, Jesu Kristi nọn yi ọne Mezaya.
Ẹkẹ da wo manman ha khọ ene ikpia ne ribhi ọne ikotu, rẹ sẹbhọ ghe, “ele da ha guanọ nin ele kuan” Stivin. Ọkpakinọn, Jehova da re imianlo man Stivin nọn re izebhudu nanlẹn. Stivin da ta ebi ọle miẹn bhi ọne imianlo, ọle da yọle: “Mẹn da daghe okhun tuje a, mẹn da yẹ daghe Ọmọn nọnsi okpia mundia bhi obera nọnsi Osẹnobulua.” Ẹghe nin Stivin ki rẹ ta ene ọta nan fo, ohu da wo kie manman re ele! Bezẹle? Asabọmiẹn ele ka họn ọta nọn sẹriọ khẹ. Ẹghe nan rẹ ha guẹzọ ọsi Jesu bhi uki eso ne gbera ọkuẹsẹ ọne ẹghe nan, Jesu ka taman ele yọle: “Ibha dẹ daghe Ọmọn nọnsi okpia dotua bhi obera ọsi ọnọn mhọn ahu.” (Mat. 26:64) Ọta nin Stivin ta wo rẹman ghe, ene ọta nin Jesu ta munsẹ. Bhi ejayenan nian, obera ọsi Jehova Jesu ki ye bhi okhun!
Ene ikpia nan ne ha khọẹkẹ Stivin da runẹ bu ọle yẹ mun ọlẹn ha khian ole ọsi ọne agbaẹbho. Enin ele da re udo-udo gbe ọle a. Asabọmiẹn Stivin sẹyẹ ha daghe Jesu bhi ọne imianlo ẹghe nin ele rẹ ha re udo gbe ọle. Ọle da yọle: “Jesu nin Ebeanlẹn imẹn, mẹn zẹ iẹnlẹn nọnsẹmhẹn obọ nin uwẹ.” Stivin da bhii Jehova nọn lu emhin ọkpa nanlẹn. Ọle da yọle: “Jehova, hẹi ka ọne olukhọ nan ele bhi obọ.” Ọle ki ta ọnan fo, ọle da yu. Ọle wo sun rẹkhan Jesu dọ sẹbhi ẹghe nin ọle rẹ yu. Ọle hi Kristiẹn nin ọhẹnhẹn nan gbe a ranmhude urẹọbhọ nọnsọle. Ọkpakinọn, okpia ọkpa ribhọ nọn ha ribhi enin ẹghe nan rẹ gbe Stivin a, nọn yẹ re obọ bhọ nan gbe ọle a. Ọle bha ye ọta nin Stivin ta kike a ọkuẹsẹ Stivin yu. Mhan dẹ tẹmhọn ọne okpia nan bhi uhọnmhọn-ọta nọnzi 50, 51, bi 53.
Tie ọne okha bhi Baibo:
Inọnta:
Uwedẹ nela Stivin rẹ re izebhudu man?
Manman Guanọ Otọle
1. Bezẹle nin ene edibo da zẹ Stivin bi ikpia ebhebhe ne “manman mhọn urẹọbhọ bi ẹlinmhin nọn khiale” nin ele ha gha ebale nin ibhioguele bhi ẹkẹ agbotu? (Iwẹn. 6:3-5; bt 41-42 ¶17-18) 1
Ifoto 1
2. Emhin nela Stivin tale rẹji Mozis nan bha gbẹn ọbhi Baibo? (bt 48 ¶13, ftn.)
3. Be rẹkpa Stivin rẹ de ọkhọle re ẹghe nan rẹ ha kpokpo ọle? (w18.10 32)
4. Iwẹnna 7:59 be rẹman ghe Jesu Stivin nan erọnmhọn je? (w05 1/1 31)
Ria Eria Nyan Emhin Nin Uwẹ Luẹle
“Okpea nọn manman mhọn urẹọbhọ bi ẹlinmhin nọn khiale” Stivin khin, sẹyẹ, “Osẹnobulua nanlẹn dia, yẹ re ahu nanlẹn.” Ọrẹyiriọ, ọle da ka nin ọle rẹ deba ha gha ebale nin ene ibhioguele ne ribhi ẹkẹ agbotu. (Iwẹn. 6:2, 5, 8) Be ibhio mhan ne manman lẹn emhin, ne yẹ ribhi ihe bhi agbotu ha rẹ sabọ re egbe khọkhọ Stivin yẹ? 2
Ifoto 2
Stivin da nan erọnmhọn nin ene ha kpokpo ọle. Be mhan ha rẹ sabọ re oyẹẹ man ene kpokpo mhan yẹ ẹlẹnan? (Mat. 5:44-48)
Uwedẹ nela uwẹ ha rẹ sabọ re egbe khọkhọ Stivin bhi izebhudu nin ọle rẹman?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
A zẹ Stivin nin ọle deba Jesu gbẹloghe bhi okhun. Bezẹle nin ọnan da ti uwẹ bhọ?
Sẹyẹ Fẹ Ene Emhin Nan Ghe
Luẹ ebi uwẹ ha rẹ sabọ re izebhudu bi ekpẹn gbotọ ebi uwẹ rẹọ i fanọn an man ẹbho yẹ beji Stivin lu.
“Stivin—‘Osẹnobulua Da Nanlẹn Dia, Yẹ Re Ahu Nanlẹn’” (bt 47-50 ¶9-19)
Ahamiẹn a kpokpo ẹbho nesi Jehova ẹlẹnan, be ele ha rẹ sabọ re izebhudu man yẹ bii Stivin?
Ebi Ibhio Mhan Rẹ Re Izebhudu Man Yẹ Arẹmiẹn A kpokpo Ele (6:27)