2 NOA
Ọle Da Bhuohiẹn Gbe Ọne Agbọn Nan
ẸGHE nin Osẹnobulua ki rẹ re Enọk kpanọ fo, ẹhi eso ne ribhi okhun da sọtẹ da Osẹnobulua. Ene ẹhi nan da ji ikhuo ne ribhi ọne otọ nan sa ele bhi ẹlo. Ranmhude ọnan, ele da mun adudu ọsi eria yọ vae bhi ọne otọ nan dọ ne ene ikhuo bhi amhẹn. Imọn nin ele biẹ bha ha yi imọn khọnkhan. A da ha tie ene imọn nan Nẹfilim. Eguanlan ne khọn okhọn-okhọn yẹ lu emhin ebe, ọle ene imọn ha khin. Ranmhude ene ẹhi nan ne i mhẹn, uwedẹ nin ẹbho ne ribhi ọne otọ nan rẹ ha lu emhin, da khọ gbera ọnikhẹ. Eria nin Osẹnobulua man bhi ọne otọ nan da wo riia egbe ele a. Ihiẹnhiẹn ọsi Enọk natiọle Noa, ọle ọkpa dikẹ bhi ẹwẹ eria rebhe ne ha nyẹnlẹn bhi ọne otọ nan.
Noa da wo ha lu emhin esili beji Enọk lu. Baibo da yọle: “Noa da wo khian rẹkhan Osẹnobulua ọsi ẹmhọanta.” Akizẹbue, Noa da re okhuo, ele da biẹ imikpia ea. Ọle bi okhuo ọle da rẹkpa imọn nesele rẹ hoẹmhọn Jehova. Ọnan da wo re azagba-uwa nọnsele dikẹ bhi ẹwẹ ẹbho rebhe ne ha nyẹnlẹn bhi agbọn ẹghenin.
Ẹdọkpa, Jehova da taman Noa ghe ọle guanọ nin ọle re okpamẹn fuẹn ẹbho ne i mhẹn rebhe a. Ọkpakinọn, Jehova da yẹ taman Noa ebi ọle ha lu, beji a ha da miẹn ẹbho eso ki miuhọnmhọn. Ọle da taman Noa nin ọle kanọ udede okọ. Okpamẹn bha sẹ sira Noa rọ khẹ, sẹyẹ ọle bha sẹ ka bọn okọ nọn kpọnọ sẹnian khẹ. Ọrẹyiriọ, ọle da rẹọbhi ebi Jehova tale, yẹ munhẹn ha kanọ ọne okọ.
Noa bi azagba-uwa nọnsọle da kuẹlo da eria ne manman mhọn ahu, ne he uhọnmhunje nin ele ha wewe bi iwẹnna nin ele ha lu
Ọ da wo manman khẹke nin Noa bi azagba-uwa nọnsọle ha mhọn izebhudu nin ele rẹ sabọ miẹn ọne ẹsọn nan. Edandan i ribhọ ghe ẹbho ne bunbun wo ha zuọ-zuọ ele yẹ de ele idobolo. Ẹbho da manman ha mun ofẹn ene ẹhi ne i mhẹn ne vae bhi ọne otọ nan, ranmhude, ene ẹhi nan wo manman ha mhọn ahu. Sẹyẹ, eguanlan nin ele biẹ da yẹ wo ha denyẹnyẹn ẹbho. Ọrẹyiriọ, Noa bi azagba-uwa nọnsọle—okhuo ọle, imọn ea nesọle, bi ikhuo imọn nesele da sẹyẹ wo ha kanọ ọne okọ. Ebe sẹbhi ikpe 50 ele rẹ kanọ ọle.
Bhi ẹkẹ ene ikpe nan rebhe, Noa bha huẹan. Ọle da wo ha sekhae nin ẹbho yẹ taman ele ẹmhọn ugbekhuelo nọn vade. Ọnan zẹle nin Baibo da tiọle, ọria “nọn wo ha taman ẹbho uwedẹ nọn gbale nọnsi Osẹnobulua.” Arẹmiẹn Noa wewe ẹmhọn Osẹnobulua, ọria soso bha re ehọ ọle bhọ. Ibhio ọle ne bunbun bhọ bha re ehọ ọle bhọ. Ene ẹbho bha muegbe nin ele rẹ fidenọ. Noa wo manman dikẹ bhi ẹwẹ ẹbho ne nẹga ọle. Ọnan zẹle nin Baibo da yọle ghe, “Urẹọbhọ nọnsọle ọle rẹ bhuohiẹn gbe ọne agbọn nan.”
Noa bi azagba-uwa nọnsọle ki kanọ ọne okọ fo, ele da munhẹn ha muno ebale nabhọ, ebale nin ele bi elanmhẹn nin ele ha ne nabhi ọne okọ ha le. Be ele rẹ sabọ ne unan elanmhẹn rebhe nabhi ọne okọ yẹ? Baibo ji mhan lẹn ghe, unan elanmhẹn rebhe ọsi okpia bi ọsi amhẹn da tobele “re eva-eva nabhi ẹkẹ ọne okọ bu Noa.” Emhin ọhan-ilo khọnan.
Osẹnobulua da ki taman Noa nin ọle ne azagba-uwa nọnsọle nabhi ẹkẹ ọne okọ, ranmhude ikpẹdẹ ihinlọn ki kẹre nin ọne amẹn rẹ munhẹn ha rọ. Noa bi azagba-uwa nọnsọle dẹ wo manman ha mhọn ẹsọn bhi obọ bhi ene ikpẹdẹ ihinlọn nan ne kẹre. Ele dẹ ha wẹnna kaka nin ele rẹ muno ene emhin ne kẹre nabhi ẹkẹ ọne okọ yẹ hẹnhẹn ene emhin. Edandan i ribhọ ghe ẹbho dẹ wo manman ha zuọ-zuọ ele bhi ọne ẹghe nan. Ọkpakinọn, beji ele muno emhin rebhe nabhi ẹkẹ ọne okọ fo, Jehova da tobọle khue ọne odẹ. Asabọmiẹn ọnan da re ẹbho eso ne rẹ ha zuọ-zuọ ele huẹan. Ejayẹnan nian, ọne amẹn da munhẹn ha rọ! Ọne amẹn da rọ nabhi ikpẹdẹ 40. Beji ọ rẹ rọ, iriọ ologho rẹ ha si okhun. Ọne ologho bhọ da si okhun gbera ene oke ne yoyo. Jehova da re ọne okpamẹn rẹ fuẹn eria rebhe ne i mhẹn an sibhi ọne otọ nan re.
Noa bi azagba-uwa nọnsọle da ha nyẹnlẹn bhi ọne okọ rẹ sebhi ebe gbera ukpe ọkpa. Bhi ọne ẹghe nan, ọne amẹn da fẹkẹ ha ka. Ọne okọ da dọ mundia bhi uke oke. Akizẹbue, Jehova da taman ele ghe, ele dẹ sabọ dagbare bhi ẹkẹ ọne okọ. Ẹghe nin Noa bi azagba-uwa nọnsọle ki rẹ dagbare, ele da zọese ji Jehova nin ọle rẹ miẹn ele fan. Jehova da ve ghe ọle i yẹ da kie ji okpamẹn nọn seriọ da rọ. Ọle da re ele rẹ re iyaman ọbhi ebi ọle tale, nin ọle rẹ rẹman eria ghe ebi ọle tale ẹmhọanta nọn.
Eria rebhe ne nyẹnlẹn bhi ọne otọ nan ẹlẹnan nian, azagba-uwa nọnsi Noa ele na vae. Ọ wo manman ti mhan bhọ nin ele rẹ re izebhudu man yẹ dikẹ bhi ẹwẹ eria ne i mhẹn ne ha nyẹnlẹn bhi ẹghe nọnsele!
Tie ọne okha bhi Baibo:
Genesis 6:1–8:22; 9:8-19
Inọnta:
Uwedẹ nela Noa rẹ re izebhudu man?
Manman Guanọ Otọle
1. Be ẹbho rẹ ha lu emhin yẹ bhi ẹghe ọsi Noa ọkuẹse ọne okpamẹn rọ? (w02 3/1 5 ¶3–6 ¶4)
2. Ẹghela Jehova rẹ taman Noa nin ọle kanọ okọ? Ẹghela Jehova rẹ taman Noa ẹdẹ nin ọne okpamẹn ha rẹ munhẹn ha rọ? (w12 4/15 23 ¶5-8)
3. Bezẹle nin mhan ha da sabọ rẹọbhọ ghe ọne okpamẹn gene rọ? (ijwbq uhọnmhọn-ọta 156 ¶2-5, ẹkpẹti) 1
Historic Collection/Alamy Stock Photo
Ifoto 1: Hindu ọkpa da gbokha ọsi okpia ọkpa nọn kanọ okọ, nọn rẹ sabọ miuhọnmhọn bhi okpamẹn nọn rọ bhi otọ agbọn rebhe. Ọne amẹn ki rọ fo, ọle da zọese yẹ do ha yi aba ọsi ẹbho ne ki dọ ha nyẹnlẹn
4. Ebe gbera ikpe iyisẹn gbera fo nin ọne okpamẹn rẹ rọ, emhin da sunu. Be bhọ hi ọne emhin? Be ọ rẹ rẹso Noa nọn ki dọmanlẹn yẹ? (it “Noa” Nin 1 ¶12) 2
Ifoto 2
Ria Eria Nyan Emhin Nin Uwẹ Luẹle
Be ẹghe nọnsẹmhan rẹ diabe ẹghe ọsi Noa yẹ? (Mat. 24:36-39)
Be ijiẹmhin ọsi Noa man uwẹ le rẹji ebi ọ lu uhọnmhọn emhin sẹ yẹ nan rẹ ha . . .
mhanmhan emhin nọnsẹn? 3
Ifoto 3
wẹnna kaka? 4
Ifoto 4
mhọn iziẹngbe? 5
Ifoto 5
Be uwẹ ha rẹ sabọ re egbe khọkhọ Noa yẹ bhi uwedẹ nin ọle rẹ re izebhudu man?
Ria Ẹmhọn Jehova Bi Iho Nọnsọle
Be ọne okha nan man mẹn le rẹji Jehova?
Be ọne okha nan rẹ diẹn mun iho nọnsi Jehova yẹ?
Be mẹn ha nọọn Noa le sade a riọ ọle kpanọ bhi uu?
Sẹyẹ Fẹ Ene Emhin Nan Ghe
Fẹ ebi aba ọkpa rẹ wẹnna kaka yẹ nin ọle rẹ re egbe khọkhọ Noa.
Re Egbe Khọkhọ Ene Mhọn Urẹọbhọ, Ọ I Yi Ene I Mhọn Urẹọbhọ—Noa, Ọ I Yi Idiake Nesọle (2:57)
Rẹkpa imọn nesẹ rẹ luẹ emhin bhi obọ Noa
“Noa Da Ha Mhọn Urẹọbhọ Da Osẹnobulua” (ijwis uhọnmhọn-ọta 18)