Emhin Soso Bha Sabọ De Ele Idobolo

Okpea ọkpa ribhọ nọn yi akhun. Ẹghe rebhe ọle rẹ dọ ha bhii emhin bhi egbe geti nọn ribhi uwa oga. Bhi ọsodamhẹn ọkpa, ọne okpea da daghe Pita bi Jọni khian uwa oga. Ọle da taman ele yọle: ‘Huẹan, bha re igho mẹn.’ Pita da taman ọlẹn yọle: ‘Mẹn mhọn emhin nọn mhẹn gbera igho nin mẹn ha re nin uwẹ. Bhi elin nọnsi Jesu, kpanọ mundia ha khian!’ Pita da ki rẹkpa ọne okpea rẹ sabọ kpanọ mundia. Iriọ ọne okpea ki rẹ ha khian! Ọne emhin ọhan-ilo nan da wo re ene usun ẹbho ha ghọnghọn rẹ sẹbhọ ghe, ene bunbun bhi ẹwẹ ele da kiẹn Kristiẹn.

Ọkpakinọn, ẹkẹ da wo ha khọ ene ohẹn bi ibhokhan Sadusi. Ele da mun Pita bi Jọni ha khian ikotu, yẹ nọọn ele yọle: ‘Họbhọ re ọne ahu nin bha rẹ re egbe daan ọne ọkpea nan?’ Pita da wanniẹn ele yọle: ‘Jesu Kristi nin bha gbe a, ọle re ọne ahu nin mhan.’ Ene mun ọkalo bhi oga da reso yọle: ‘Bha hẹi yẹ tẹmhọn Jesu!’ Ọkpakinọn, ene etuegbe da taman ele yọle: ‘Mhan dẹ wo ha tẹmhọn ọlẹn. Emhin soso i ribhọ nọn ha mun mhan mhọnlẹn.’

Beji ele ki fan Pita bi Jọni fia, ele da bu edibo nekẹle yẹ taman ele ebe sunu. Ele da kugbe nan erọnmhọn ji Jehova yọle: ‘Huẹan, re izebhudu nin mhan rẹ sabọ ha tẹmhọn ẹn.’ Jehova da re ẹlinmhin nọn khiale nin ele. Bhiriọ, ele da wo sabọ ha tẹmhọn Osẹnobulua khian yẹ re egbe daan ẹbho. Sẹyẹ, ẹbho ne bunbun da dọ kiẹn Kristiẹn. Ọnan da wo re ẹkẹ ha khọ ibhokhan Sadusi rẹ sẹbhọ ghe ele da mun Pita bi Jọni ọbhi ighan. Sokpan bhi ọne asọn nin, Jehova da je ẹhi nọnsọle bu ele. Ọne ẹhi da tuje odẹ ọsi ọne ighan an, yẹ taman ene etuegbe yọle: ‘Bha ha khian uwa oga dọ ha man emhin bhi enin.’

Ẹdẹ ki we, ene unakpa da dọ taman ene mun ọkalo bhi Sanhẹdrin ebe sunu. Ele da yọle: ‘Ene ikpea nin bha mun khue i yẹ ribhi ighan! Sokpan, a sẹyẹ khue ọne ighan. Uwa oga ele ki ye; ele man ẹbho emhin bhi enin!’ Bhiriọ, ele da gbo kie muno ene etuegbe diọbhi Sanhẹdrin. Ọne ojohẹn da nọọn ele yọle: ‘Imhan bha be gbuhi nin bha, nin bha hẹi kie tẹmhọn Jesu?’ Pita da wanniẹn ọlẹn yọle: “Osẹnobulua hi ojie nin mhan ha hẹnmhọn nan, ọ iyi eria.”

Ẹkẹ da wo manman ha khọ ene ikpea ne mun ọkalo bhi oga, rẹ sẹbhọ ghe ele da ha ho nin ele gbe Pita bi Jọni an. Ọkpakinọn, obhokhan Farisi ọkpa natiọle Gameliẹ da kpanọ mundia. Ọle da yọle: ‘Bha mhọn ẹwanlẹn! Nin bha hẹi dọ ha nin Osẹnobulua ha suan. Ranmhude asabọmiẹn Osẹnobulua ne ene ikpea nan dia.’ Ele da gene re ehọ ọbhi ebi ọne okpea tale. Bhiriọ, ele da re asan gbe ene etuegbe, yẹ gbuhi nin ele nin ele hẹi yẹ tẹmhọn Osẹnobulua. Ele ki lu ọnin fo, ele da fan ele fia. Ọkpakinọn, ọnin bha mun ene etuegbe mhọn nin ele hẹi yẹ tẹmhọn Jesu. Ele da wo yẹ re izebhudu ha ta ọne ọta nọn mhẹn bhi uwa oga, bi rẹ na bhi uwa rẹ sẹbhi uwa.