A Da Re Ẹlinmhin Nọn Khiale Nin Ene Edibo

Ọ ki ribhi ikpẹdẹ igbe nin Jesu fikie ha khian okhun, a da re ẹlinmhin nọn khiale nin ene edibo. Ọne ẹghe nan a rẹ ha lu iluemhin ọsi Pẹnticọst ọsi ukpe 33 C.E.. Ẹbho ne bunbun da na bhi ije kẹkẹ vae bhi Jerusalẹm dọ deba bhi ọne iluemhin. Edibo nesi Jesu ne siegbe koko bhi ugha nọn ribhi okhun-uwa ọkpa bhi Jerusalẹm da ha yi itue 120. Osukpa, emhin ọhan-ilo da sunu. Emhin nọn diabe eranlẹn da mundia bhi uke ẹhae ọsi ọdeọde bhi ene edibo, bhiriọ, ele da munhẹn ha zẹ urolo kẹkẹ. Ele da họn usomhin bhi okhun, bọsi ahoho nọn wo manman ha fi. Ọne ahoho da gba ije rebhe bhi ọne uwa nin ele ye.

Ene eria ne vae bhi Jerusalẹm da họn ọne usomhin, bhiriọ, ele da runẹ ha khian ọne uwa nin ele dọ fẹghe ebe sunu. Ọ da wo manman han ele ilo beji ele daghe ene edibo zẹ urolo kẹkẹ. Ele da yọle: ‘Ibhokhan Galili ene ẹbho nan khin. Be ele ki rẹ sabọ ha zẹ urolo nọnsẹmhan yẹ?’

Ẹghenin, Pita bi etuegbe nekẹle da mundia bhi odalo ene ẹbho. Pita da taman ele ebi a rẹ gbe Jesu a yẹ, bi ebi Jehova rẹ riọ ọle kpanọ bhi uu yẹ. Pita da yọle: ‘Bhi ejayenan nian, Jesu ribhi okhun, ọle dotua bhi obera nọnsi Osẹnobulua, sẹyẹ, ọle biri ẹlinmhin nọn khiale nyan mhan beji ọle vele. Ọnan zẹle nin ene emhin ọhan-ilo nan nin bha daghe da ha sunu.’

Ebi Pita taman ene ẹbho da manman wo rẹso ele, bhiriọ, ele da nọọn ọlẹn yọle: “Be ọkhẹke nin mhan lu?” Pita da taman ele yọle: ‘Bha kiọya ọbhi olukhọ nọnsẹbha, bha ha yẹ mianmẹn bhi elin nọnsi Jesu. Bha ha lu ọnan, Osẹnobulua ki re ẹsele ọsi ẹlinmhin nọn khiale nin bha.’ Bhi ọne ukpẹdẹ nin tee, ẹbho ne bun sẹbhi itue 3,000 da mianmẹn. Rẹ na bhi ọne ukpẹdẹ nin ha khian, edibo nesi Jesu da wo ha tuẹn okhun bhi Jerusalẹm. Ranmhude urẹkpa ọsi ẹlinmhin nọn khiale, ene etuegbe da sabọ mun agbotu ne bunbun gbọ, beji ele ha da sabọ man ene edibo emhin rebhe nin Jesu man ele le.