Ebi Jesu Man Ẹbho Le Bhi Uke Oke

Jesu ki zẹ etuegbe igbeva nesọle fo, ọle da huẹnre bhi ọne uke oke, yẹ diọbhi eji ẹbho ne bunbun da si koko. Galili, Judia, Taya, Saidọn, Siria, bi obọ nọnzi eva ọsi Jọdan, ọle ene ẹbho na vae. Ele da muno ẹbho ne khọnmhọn emianmhẹn kẹkẹ, bi ene ẹlinmhin-ebe kpokpo rẹkhan egbe vae. Jesu da re egbe daan ele rebhe. Ọle ki lu ọnin fo, ọle da dotua bhi oke yẹ munhẹn ha talọ. Ọle da gbotọle fanọn an ebi ọkhẹke nin mhan lu sade mhan guanọ nin mhan ha yi imọẹ Osẹnobulua. Ọle da yọle ghe, ọkhẹke nin mhan lẹn ghe mhan guanọ adia nọnsi Osẹnobulua bhi iẹnlẹn, sẹyẹ, nin mhan hoẹmhọn Osẹnobulua. Ọkpakinọn, mhan i da sabọ hoẹmhọn Osẹnobulua sade mhan bha hoẹmhọn ẹbho. Bhiriọ, ọkhẹke nin mhan ha lu ọrebhe nọnsẹn, yẹ re ifuẹkẹ nin ọrebhe lu emhin rẹ dọ sẹbhi eghian mhan.

Jesu da yọle: ‘Ọ bha sẹ nin mhan rẹ wo gheghe hoẹmhọn imọẹ mhan ọkpa. Sokpan, nin mhan hoẹmhọn eghian mhan, yẹ re ọkhọ rebhe ha rẹhunmhan ẹbho. Ahamiẹn ọria khọẹkẹ uwẹ ranmhude emhin nin uwẹ lu, jẹje bu ọne ọria dọ bhii ọle. Ha ne ẹbho lu emhin bhi uwedẹ nin uwẹ guanọ nin ele rẹ ne uwẹ lu emhin.’

Jesu da yẹ re adia nin ene ẹbho rẹji ẹmhọn igho bi emhin ọsi ọne agbọn nan. Ọle da yọle: ‘Nin mhan rẹ ha yi imọẹ Jehova mhẹn gbera nin mhan rẹ manman ha mhọn igho. Oyi dẹ sabọ miẹn uwẹ igho nin uwẹ mhọn, ọkpakinọn, ọria i da sabọ miẹn uwẹ ikolu nin uwẹ bi Jehova ko mhọn.’ Sẹyẹ, ọle da yọle, ‘Bha hẹi yẹ ha kpokpo-egbe ba ẹmhọn ebi bha ha le, ebi bha ha da, la ukpọn nin bha ha yọ. Bha gbẹlokotọ bhi ene afianmhẹn, Osẹnobulua wo re ebale nin ele le. Ikpokpo-egbe i da sabọ re ukpẹdẹ ọkpa ba ẹdẹ iẹnlẹn nọnsẹ. Yere ghe Jehova lẹn ebi uwẹ guanọ.’

Ene usun ẹbho bha sẹ miẹn ọria nọn re inian man emhin khẹ beji Jesu rẹ man ele emhin. Ene man ele emhin bhi oga nọnsele, i man ele emhin ne sẹ inian. Bezẹle nin Jesu da manman guẹ rẹ re inian ha man emhin? Ranmhude emhin rebhe nin ọle man, obọ Jehova ọ na vae.