Jesu Da Zẹ Etuegbe Igbeva Nesọle

Jesu ki sẹ tẹmhọn Osẹnobulua bhi ebe sẹbhi ukpe ọkpa bi ukhiọnmhẹn, ọle da ha mhọn emhin kpataki nọn khẹke nin ọle zẹ rẹ lu. Eria nela ọle ha zẹ ne ha manman ha wẹnna rẹkhan ọlẹn? Eria nela ọle ha man ele emhin nin ele ha re agbotu khian? Nin ọle da sabọ zẹ ebi ọle ha lu, ọle da ha guanọ nin Jehova dia ọle. Bhiriọ, ọle da diọbhi oke beji ọle ọkpa ha da ha ribhi ọsọle. Bhi enin, ọle da re asọn rebhe nan erọnmhọn. Ẹdẹ ki we, Jesu da tie eso bhi edibo nesọle koko, yẹ zẹ etuegbe igbeva nesọle bhi ẹwẹ ele. Elin ọsi ọnela bhi ẹwẹ ele uwẹ yẹ yere? Elin nọnsele hi, Pita, Andru, Jemis, Jọni, Filip, Batolomio, Tọmọs, Matiu, Jemis nin ọmọn nọnsi Afiọs, Tadiọs, Saimọn, bi Judas Iskarọt.

Ene itue igbeva nan da ha rẹkhan ọlẹn beji ọle rẹ diọbhi ije kẹkẹ. Ọle ki man ele emhin fo, ọle da je ele dagbare nin ele dọ ha tẹmhọn Osẹnobulua. Jehova da re ahu nin ele rẹ sabọ ha khu ẹlinmhin ne i mhẹn si eria bhi egbe re, yẹ re egbe daan ene khọnmhọn.

Jesu da tie ene itue igbeva nan imọẹ ọle, sẹyẹ, ọle wo gbaẹkẹ ele. Ene Farisi da ha riale ghe ene ituegbe nan bha lẹn emhin soso, sẹyẹ, eria ọkhọnkhan ele khin. Ọkpakinọn, Jesu man ele emhin beji ele ha da sabọ ha lu iwẹnna nin ọle mun nin ele. Ene ikpea nan wo deba Jesu dia i bhi ẹghe nọn manman lu uhọnmhọn-emhin nẹ bhi iẹnlẹn nọnsọle. Bọsi ọne ẹghe ọkuẹsẹ a gbe ọle a, bi beji a riọ ọle kpanọ fo bhi uu. Bii Jesu, ibhokhan Galili ene bun nẹ bhi etuegbe nesọle ha khin. Eso bhi ẹwẹ ele mhọn amhẹn.

Ọ bha gba nin ene etuegbe fo, sẹyẹ, ele dobọ. Ẹgheso, ele i ria eria fo ọkuẹsẹ ele talọ. Iriọ ele yẹ rẹ lu emhin nọn bha gba ẹgheso. Sẹyẹ, ele i re iziẹngbe man ẹgheso. Ẹghe bhọ ribhọ nin ele rẹ ha gbugan rẹji ọnọn khua okhun nẹ bhi ẹwẹ ele. Ọrẹyiriọ, eria esili ele khin, sẹyẹ, ele hoẹmhọn Jehova. Ele hi ene mun agbotu ọsi Kristiẹn mhọn beji Jesu kpanọ ha khian okhun fo.