Jesu Da Khu Ẹbho Ne Ha Do Ẹki Bhi Uwa Oga Fia

Bhi egbẹghe uki nọnzi enẹn bhi ukpe 30 C.E., Jesu da ha khian Jerusalẹm. Sẹyẹ, ẹbho ne bunbun da vae bhi Jerusalẹm nin ele dọ lu Iluemhin Ọsi Anagbera. Ele noo elanmhẹn rẹ zọese bhi uwa oga beji ele rẹ lu ọne iluemhin. Ẹbho eso da muno elanmhẹn rẹkhan egbe, ọkpakinọn, eso da dẹ ọsele bhi Jerusalẹm.

Beji Jesu sẹbhi uwa oga, ọle da kere ghe ẹbho khiẹn elanmhẹn bhi enin. Ele da ha do ẹki bhi ẹkẹ uwa oga nọnsi Jehova. Be Jesu ki lu yẹ? Ọle da re ukpiri lu asan rẹ vẹ ene ihuan bi ene ẹmena sibhi ọne uwa oga re. Ọle da biri igho ọsi ene hian igho kua, yẹ si tebu nọnsele ẹlo ru. Jesu da taman ene khiẹn idulu yọle: ‘Bha ne ene emhin nan sibhi enan re! Bha hẹi re uwa ọsi Aba mẹn kiẹn eji a da do ẹki!’

Ọne emhin nan nin Jesu lu da wo han ene ẹbho ilo. Sẹyẹ, ọ da ye edibo nesọle ọta akhasẹ nan tale rẹji ọne Mezaya re, nọn yọle: ‘Imẹn dẹ wo manman ha mhọn ọyaya da uwa oga nọnsi Jehova.’

Akizẹbue, bhi ukpe 33 C.E., Jesu da gbo kie ne emhin ne i mhẹn sibhi uwa oga re. Ọle bha re otọ ne ẹbho rẹ ha lu ebe ghọn ele bhi uwa oga nọnsi Aba ọle.