Ọne Okhuo Nọn Dọ Sa Amẹn Bhi Omin

Ẹghe nan ki rẹ lu Iluemhin Ọsi Anagbera fo, Jesu bi edibo nesọle da rẹkhan Sameria fikie ha khian Galili. Ele ki sikẹ agbaẹbho ọsi Saika, Jesu da mundia bhi ijanlẹn ọkpa natiọle omin ọsi Jekọp. Beji ọle ki rẹ ha hẹan bhi enin, edibo nesọle da nabhi ẹkẹ ọne agbaẹbho dọ dẹ ebale.

Okhuo ọkpa da vae bhi ọne omin dọ sa amẹn. Jesu da taman ọlẹn yọle: “Sa amẹn nin mẹn wọn.” Ọne okhuo da yọle: ‘Bezẹle nin uwẹ da ne mẹn talọ? Obhi Sameria mẹn khin. Ibhokhan Ju i ne ibhokhan Sameria talọ.’ Jesu da taman ọne okhuo yọle: ‘Ahamiẹn uwẹ gene lẹn ọria nin mẹn khin, uwẹ ki taman mẹn nin mẹn sa amẹn nin uwẹ, bhiriọ, mẹn ki sa amẹn ọsi iẹnlẹn nin uwẹ.’ Ọne okhuo ki da nọọn ọlẹn yọle: ‘Be uwẹ re ọnin ta? Uwẹ bhọ i mhọn ebi a rẹ sa amẹn.’ Jesu da yọle: ‘Ọria nọn hi ki rẹ khin nọn wọn bhi amẹn nin mẹn ha sa nanlẹn, ohanmhan-amẹn i da yẹ gbe ọle ghee.’ Ọne okhuo da yọle: “Ọwanlẹn, sa ọne amẹn nan nin mẹn.”

Jesu ki da taman ọne okhuo yọle: ‘Dọ datie ọdọ ẹ re.’ Ọne okhuo da yọle: ‘Mẹn i mhọn ọdọ.’ Jesu da taman ọne okhuo yọle: ‘Uwẹ bha bha ohoghe. Igba isẹn uwẹ sẹ bọ ọdọ, sẹyẹ, okpea nin uwẹ deba nyẹnlẹn nian i yi ọdọ ẹ.’ Ọne okhuo ki da yọle: ‘Mẹn daghe ọle ghe akhasẹ uwẹ khin. Ibhokhan mhan rẹọbhọ ghe mhan dẹ sabọ ha ga Osẹnobulua bhi ọne uki oke nan, ọkpakinọn, ibhokhan Ju yọle ghe Jerusalẹm ọkpa mhan ha da ha ga Osẹnobulua. Mẹn rẹọbhọ ghe Mezaya ha vae, ọle dẹ man mhan uwedẹ nin mhan ha rẹ ha ga.’ Jesu ki da ta emhin nin ọle bha sẹ ka taman ọria soso khẹ man ọlẹn. Ọle da yọle: ‘Imẹn hi ọne Mezaya.’

Ọne okhuo da runẹ nabhi ọne agbaẹbho, yẹ taman ibhokhan Sameria yọle: ‘Mẹn miẹn ọne Mezaya. Ọle wo lẹn emhin rebhe rẹji mẹn. Bha vae dọ re ẹlo bha daghe ọle!’ Ele da rẹkhan ọne okhuo ha khian isi ọne omin. Ele da wo ka Jesu ehọ beji ọle rẹ ha man ele emhin.

Ibhokhan Sameria da taman Jesu nin ọle gbe obhi ẹghe khere bhi agbaẹbho nọnsele. Bhiriọ, Jesu da gbe ikpẹdẹ eva bhi ọne agbaẹbho. Ọle da wo ha man ene ẹbho emhin. Ẹbho ne bunbun da ha mhọn urẹọbhọ da ọle. Ibhokhan Sameria da taman ọne okhuo yọle: ‘Beji mhan ki ka ọne okpea nan ehọ fo, mhan wo dọ rẹọbhọ ghe ọle hi ọnọn ha miẹn ọne agbọn nan fan.’