Jehova Da Khọnlẹn Nin Jehoshafat

Jehoshafat nin ojie ọsi Juda da dunmhun ukhuo-izọese ọsi Bel a bi ene ẹbọ ne ribhọ. Ọle da ha guanọ nin ene ẹbho lẹn uhi nesi Jehova. Bhiriọ, ọle da je ene ekhaẹmhọn bi ene Livai ha khian ijerebhe bhi otọ Juda, beji ele ha da ha man ene ẹbho ẹmhọn uhi nesi Jehova.

Ene agbaẹbho ne nẹga Juda da ha mun ofẹn rẹ mun okhọnlẹn bu agbaẹbho ọsi Juda, ranmhude ele lẹnmhin ghe Jehova nin ibhokhan Juda dia. Ele bhọ da ha muno emhin ji Jehoshafat nin Ojie. Ọkpakinọn, ibhokhan Moab, Amọn, bi ene ribhi otọ ọsi Siya da mun okhọnlẹn bu Juda. Jehoshafat wo lẹnmhin ghe, Jehova ọkpa ha sabọ rẹkpa ọle. Bhiriọ, ọle da si ene ikpea, ikhuo bi ibhokhan koko bhi Jerusalẹm. Bhi isira ele rebhe, ọle da nan erọnmhọn yọle: ‘Jehova, ahamiẹn uwẹ bha rẹkpa mhan, mhan i da sabọ khọn ọne okhọn nan miotọ. Huẹan, taman mhan ebi mhan ha lu yẹ.’

Jehova da wanniẹn ọne erọnmhọn. Ọle da yọle: ‘Hẹi ji ofẹn mun uwẹ. Mẹn dẹ rẹkpa uwẹ. Mundia bhi ihe nọnsẹ, hẹi beghe, uwẹ dẹ daghe ebi mẹn ha rẹ khọn nin uwẹ yẹ.’ Be Jehova rẹ hinmhin ele yẹ?

Bhi ọsewewiẹ nọn rẹkhan ọlẹn, Jehoshafat da hanọn ene so illo, yẹ taman ele nin ele ke odalo nin ene eyokhọnlẹn. Ele da na bhi Jerusalẹm ha khian eji a tiọle Tẹkoa, nọn yi eji ele ha da khọn ọne okhọnlẹn.

Beji ene so illo ki rẹ si uru okhun ha re ogẹn ji Jehova, Jehova da khọn nin ẹbho nesọle. Ọle da lu ọle nin ozughu ha ribhi ẹwẹ ibhokhan Amọn bi ibhokhan Moab, rẹ sẹbhọ ghe, ele da ha gbono egbe ele a. Ọria soso bhi ẹwẹ ele nọn miuhọnmhọn i ribhọ. Jehova da wo gbega ibhokhan Juda, ene eyokhọnlẹn, bi ene ohẹn. Ọrebhe ne ha nyẹnlẹn sikẹ ọne agbaẹbho da họn ebe sunu. Ele da lẹn ghe Jehova sẹyẹ wo ha khọn nin ẹbho nesọle. Uwedẹ nela Jehova rẹ hinmhin ẹbho nesọle? Uwedẹ kẹkẹ ọle noo. Ọle i guanọ urẹkpa ọsi eria ọkuẹsẹ ọle sabọ lu iriọ.