Devid Bi Sọl

Ẹghe nin Devid rẹ gbe Golayat a fo, Sọl nin ojie da zẹ ọle nin ọle ha sun eyokhọnlẹn nesọle. Devid da wo khọn miotọ bhi okhọnlẹn ne bunbun nin ọle yo, sẹyẹ, a da manman wo ha họn ẹmhọn ọlẹn. Ẹghe nọn hi ki rẹ khin nin Devid rẹ na bhi okhọnlẹn vae, ene ikhuo ki dagbare ha gbikhiẹn yẹ so illo yọle: ‘Sọl gbono uli ne bunbun an, sokpan, Devid da gbono uli bhi ijanlẹn igbe ne bunbun an!’ Sọl da ha mhọn ikhu da Devid, bhiriọ, ọle da ha ho nin ọle gbe Devid a.

Devid wo guẹ ebi a rẹ khue emhin illo natiọle afan yẹ. Ẹdọkpa, beji Devid ha khue afan nin Sọl, Sọl da rẹ ha ho nin ọle re opolo ha ọle. Devid da jẹje siegbe kie, bhiriọ, ọne opolo da ha egbuwa. Ọnan ki sunu fo, Sọl da yẹ dọnmhegbe igba ne bunbun nin ọle rẹ gbe Devid a. Akizẹbue, Devid da nẹgbe. Ọle da dọ nẹhe bhi otọ ugbẹnẹbubu.

Sọl da ne eyokhọnlẹn nesọle ne bun sẹbhi 3,000 rẹ ha guanọ David khian nin ọle gbe a. Ọle da nabhi ẹkẹ uhio nin Devid bi ikpea nesọle da nẹhe. Ikpea nesi Devid da fẹkẹ taman Devid yọle: ‘Isẹhoa khọnan nin uwẹ rẹ gbe Sọl a.’ Devid da fẹkẹ khian bu Sọl yẹ hian ehehe-ukpọn nin ọle yọ ke okhun an. Sọl bha lẹn. Ọnin ki gbera, ọ da wo ha ba Devid bhi egbe ghe, ọle bha mun ekpẹn nin ọria nin Jehova zẹle. Ọle bha ka nin ikpea nesọle da gbe Sọl a. Ọle bhọ da sotie Sọl yẹ taman ọlẹn ghe, ọle ha rẹ gbe ọle a beji ọle miẹn ọne isẹhoa. Ọnan dẹ be re Sọl fi ọkhọle denọ yẹ zẹ Devid obọ?

Eye. Sọl da yẹ wo ha guanọ Devid khian. Bhi ọsemuan ọkpa, Devid bi ọmọn ọsi obhio ọle natiọle Abishai da do nabhi agọ nin Sọl ye. Abna nọn gbega Sọl bhọ da ha wẹ bhi ọne ẹghe nan. Abishai da yọle: ‘Isẹhoa wo khọnan! Ji mẹn gbe ọle a.’ Devid da wanniẹn ọlẹn yọle: ‘Jehova dẹ tobọle re oya nin Sọl. Ji mhan re opolo nọnsọle bi ukoko nin ọle rẹ sa amẹn, sẹyẹ nin mhan kpanọ.’

Devid da hẹn okhun oke nọn sikẹ eji Sọl ye, beji ọle ha da sabọ na bhi enin ha ghe Sọl bi eyokhọnlẹn nesọle. Ọle da reso yọle: ‘Abna, bezẹle nin uwẹ bha da gbega ojie nọnsẹ? Opolo nọnsi Sọl bi ukoko nin ọle rẹ sa amẹn ki bho?’ Sọl da lẹn ghe Devid hi ọnọn talọ, bhiriọ, ọle da yọle: ‘Uwẹ ha rẹ gbe mẹn a, sokpan, uwẹ bha lu iriọ. Mẹn lẹnmhin ghe, uwẹ hi ojie nọn ki da ha gbẹloghe Izrẹl.’ Sọl da fikie diọbhi ẹguale nọnsọle. Sokpan, ọ i yi ọrebhe bhi azagba-uwa nọnsi Sọl he Devid.