Devid Bi Golayat

Jehova da taman Samuẹl yọle: ‘Ha khian uwa ọsi Jesi. Ọkpa bhi imikpea nesọle ha ki ha yi ojie ọsi Izrẹl.’ Bhiriọ, Samuẹl da ha khian uwa ọsi Jesi. Ẹghe nin ọle ki rẹ daghe ọmọndiọn nọnsọle, ọle da yọle: ‘Ọnan da ha yi ọne Jehova zẹle.’ Sokpan, Jehova da taman Samuẹl ghe, ọnan i yi ọnọn ọle zẹle. Jehova da yọle: ‘Ẹkẹ ọkhọle ọsi ọria mẹn ghe, ọ i yi ebe ọne ọria gheghe diayẹ bhi egbe.’

Jesi da ne imikpea ehan nesọle nekẹle bu Samuẹl. Ọkpakinọn, Samuẹl da yọle: ‘Jehova bha zẹ ọsoso bhi ẹwẹ ele. Uwẹ be mhọn ọmokpea ọbhebhe?’ Jesi da yọle: ‘Ọkpa sẹ yẹ ribhọ, ọle hi ọnọn kotọ. Devid hi elin ọlẹn. Ọle gbẹloghe ihuan nesẹmhẹn.’ Ẹghe nin Devid ki rẹ vae, Jehova da taman Samuẹl yọle: ‘Ọnan hi ọne mẹn zẹle!’ Samuẹl da biri abhii Devid bhi uhọnmhọn, rẹ zẹ ọle nọn ha yi ojie nọn ha gbẹloghe ibhokhan Izrẹl bhi ẹghe odalo.

Ẹgheso ki gbera, ibhokhan Filistia da ne ibhokhan Izrẹl ha khọn. Ibhokhan Filistia mhọn eguan ọkpa natiọle Golayat, nọn rẹkpa ele bhi okhọnlẹn. Ukpẹdẹ-ukpẹdẹ, Golayat ki ha zuọ-zuọ ibhokhan Izrẹl. Ọle ki ha so yọle: ‘Bha zẹ okpea nọn ha ne mẹn khọnlẹn. Ọle ha sabọ gbe mẹn an, mhan ki kiẹn igbọn nesẹbha. Sokpan, mẹn ha gbe ọle a, bha ki kiẹn igbọn nesẹmhan.’

A da je Devid nin ọle muno ebale ji ibhio ọle bhi eji eyokhọnlẹn ọsi ibhokhan Izrẹl da mun agọ. Ọle ki sẹ enin, ọle da họn ebi Golayat ha ta. Bhiriọ, ọle da yọle: ‘Mẹn dẹ nanlẹn khọnlẹn!’ Sọl nin Ojie da yọle: ‘Obhokhan khere uwẹ khin.’ Devid da wanniẹn ọlẹn yọle: ‘Jehova dẹ rẹkpa mẹn.’

Sọl da ki muno emhin nin ọle rẹ khọnlẹn nin Devid, sokpan, Devid da yọle: ‘Mẹn i da sabọ noo ene emhin nan rẹ khọnlẹn.’ Devid da re katapọti nọnsọle yẹ diọbhi ẹdẹ. Ọle da hanọn udo isẹn ne riẹriẹ a, yẹ ne ele ọbhi ẹkpa. Devid ki lu ọnan fo, ọle da runẹ bu Golayat. Ọne eguan da reso yọle: ‘Vae bhi enan, uwẹ nin obhokhan khere. Mẹn dẹ mun efun-egbe nọnsẹ nin afianmhẹn ne tin bhi okhun bi elanmhẹn ne ribhi ẹwẹ.’ Ofẹn bha ha mun Devid. Ọle da reso yọle: ‘Uwe re agbada bi opolo bu mẹn vade, ọkpakinọn, elin nọnsi Jehova mẹn rẹ bu uwẹ vade. Ọ i yi mhan uwẹ ne khọnlẹn, Osẹnobulua uwẹ ne khọnlẹn. Ọrebhe ne ribhi enan dẹ daghe ọle ghe, Jehova mhọn ahu gbera agbada bi opolo. Ọle dẹ ne bha rebhe mhan bhi obọ.’

Devid da re ukpudo ọbhi katapọti nọnsọle yẹ re ahu rebhe fi ọle. Bhi ahu nọnsi Jehova, ọne udo da degbe Golayat bhi uki ẹhae. Ọne eguan da de ọbhi otọ yẹ yu. Ene ibhokhan Filistia da nẹgbe. Uwẹ be mun udu nyan Jehova bii Devid?