Ojie Ọhẹnhẹn Nọn Gbẹloghe Bhi Otọ Izrẹl

Jehova da ne ebhuohiẹn nin ibhokhan Izrẹl ne ha sun ele, sokpan, ele da ha guanọ ojie. Ele da taman Samuẹl yọle: ‘Agbaẹbho rebhe ne nẹga mhan mhọn ojie. Bhiriọ, mhan yẹ guanọ ojie nọnsẹmhan.’ Samuẹl da ha riale ghe ebi ele guanọ bha gba, bhiriọ, ọle da ta ọne ẹmhọn man Jehova bhi erọnmhọn. Jehova da taman ọlẹn yọle: ‘Ọ i yi uwẹ ene ẹbho hele, sokpan, imẹn ele hele. Ji ele lẹn ghe ele dẹ sabọ ha mhọn ojie, sokpan, ọne ojie dẹ ha guanọ emhin ne bunbun bhi obọ ele.’ Ọrẹyiriọ, ene ẹbho da yọle: ‘Ẹmhọn i ribhọ. Mhan guanọ ojie!’

Jehova da taman Samuẹl ghe okpea natiọle Sọl, ọle da ha yi ojie nin ọhẹnhẹn nọn ha gbẹloghe bhi otọ Izrẹl. Ẹghe nin Sọl ki rẹ rẹnẹ ji Samuẹl bhi Rema, Samuẹl da biri abhii Sọl bhi uhọnmhọn, rẹ zẹ ọle nin ọle ha yi ojie.

Akizẹbue, Samuẹl da si ibhokhan Izrẹl koko, yẹ rẹman ele ọria nan zẹle nọn ha yi ojie nọnsele. Ọkpakinọn, ele rẹ guanọ ijerebhe, ele bha miẹn Sọl. Uwẹ be lẹn ebezẹle nin ele bha da miẹn ọlẹn? Ranmhude, ọle da dọ nẹhe bhi eji a hẹ emhin ọi. Ẹghe nin ele ki rẹ miẹn Sọl, ele da re ọle dagbare yẹ re ọle mundia bhi adesẹ ene ẹbho rebhe. Sọl tan nẹ ọrebhe ne mundia, sẹyẹ, ọle wo manman mhọn-ose. Samuẹl da yọle: ‘Ghe ọne Jehova zẹle nọn ha yi ojie nọnsẹbha.’ Ene ẹbho da reso yọle: ‘Uwẹ dẹ tọ mhan ga ọnojie!’

Bhi ẹghe ọhẹnhẹn, Sọl nin Ojie da wo ha ka Samuẹl ehọ, yẹ hẹnmhọn nin Jehova. Akizẹbue, ọle da fidenọ. Bhi ọsi ijiẹmhin, ọ i yi ẹsọn ọsi ojie nin ọle rẹ zọese. Sokpan, bhi ẹghe ọkpa, nin Sọl rẹ mundia khẹ Samuẹl beji Samuẹl taman ọlẹn, Sọl da tobọle dọ zọese nọn rẹ khẹke nin Samuẹl lu, ranmhude Samuẹl bha kẹ vae. Be Samuẹl ki lu yẹ? Ọle da taman ọlẹn yọle: ‘Uwẹ bha lu nọnsẹn nin uwẹ rẹ gbobọra uhi nọnsi Jehova.’ Sọl be luẹ emhin bhi idobọ nọnsọle?

Akizẹbue, bhi ẹghe nin Sọl rẹ dọ ne ibhokhan Amalẹk khọnlẹn, Samuẹl da taman ọlẹn ghe nin ọle gbono ele rebhe a, nin ọle hẹi zẹ ọsoso obọ. Sokpan, Sọl da zẹ nin ọle rẹ ze Egag nin Ojie obọ. Jehova da taman Samuẹl yọle: ‘Sọl zẹ mẹn obọ, sẹyẹ, ọle i yẹ ka mẹn ehọ.’ Ọ da wo ba Samuẹl bhi egbe, bhiriọ, ọle da taman Sọl yọle: ‘Ranmhude uwẹ i yẹ hẹnmhọn nin Jehova, Jehova dẹ zẹ ojie ọbhebhe.’ Ẹghe nin Samuẹl ki rẹ ha ho nin ọle kpanọ, Sọl da si ọle ukpọn mhọn, ehehe-ukpọn ọsi Samuẹl da sọ ọle bhi obọ. Bhiriọ, Samuẹl da taman Sọl yọle: ‘Jehova miẹn uwẹ ọne ejele.’ Jehova dẹ mun ọne ejele nin ọria nọn hoẹmhọn ọlẹn, nọn yẹ hẹnmhọn nanlẹn.