Igbọn Nọn Hẹnmhọn Nin Osẹnobulua

Ọkpa bhi ene kotọ bhi imọn nesi Jekọp, ọle Josẹf ha khin. Ibhio ọle ne mẹn ọlẹn da daghe ọle ghe, Josẹf aba ele hoẹmhọn ọlẹn nẹ bhi ẹwẹ ele. Be uwẹ riale ọnan dia ele yẹ bhi egbe? Ele da ha mhọn ikhu da Josẹf, yẹ ha khọẹkẹ ọle. Josẹf ki bhohiẹ, ọle da taman ibhio ọle ebi ọle bhohiẹ. Ọne ebhohiẹ da wo manman re ohu re ele, ranmhude ele riale ghe ebi ọne ebhohiẹ mundia nan hi, ẹdọkpa ele dẹ deuhọnmhọnre nin Josẹf. Ọnan da kie manman re ele he ọle!

Ẹdọkpa, beji ibhio Josẹf ha re ihuan kọn bhi egbe-egbe agbaẹbho natiọle Shikẹm, Jekọp da je Josẹf nọn dọ fẹ ele ghe. Ele ki na bhi eje ree daghe Josẹf vade, ele da ha taman egbe ele yọle: ‘Ghe ọne obhokhan nọn bhohiẹ ebhohiẹ vade. Bha ji mhan gbe ọle a!’ Ele da mun ọlẹn fi fiọbhi ẹkẹ uhio nọn dinmhin. Sokpan, ọkpa bhi obhio ọle natiọle Juda da yọle: ‘Bha hẹi gbe ọle a! Sokpan, bha ji mhan khiẹn ọlẹn nọn ha yi igbọn.’ Bhiriọ, ele da khiẹn ọlẹn nin ibhokhan Midian ne do ẹki, ne ha khian Ijipt. Isiliva 20 ele rẹ khiẹn ọlẹn.

Ibhio Josẹf da di ikpọn ọsi Josẹf ọbhi ẹkẹ aranlẹn ọsi ẹbhe, ele da re ọne ukpọn ji aba ele. Ele da nọọn aba ẹle yọle: ‘Ọnan be yi ukpọn ọsi ọmọn nọnsẹ?’ Jakọp da ha riale ghe elanmhẹn nọn tuakọn gbe Josẹf a. Ọ da wo manman ba ọle bhi egbe, rẹ sẹbhọ ghe ọria soso bha sabọ re ikoudure nanlẹn.

Ene ẹbho ki sẹ Ijipt, ele da khiẹn Josẹf nin Pọtifa, nin ọle ha yi igbọn nọnsọle. Ihe nọn khua Pọtifa ha ye bhi otọ Ijipt. Ọkpakinọn, Jehova da wo ne Josẹf dia i. Pọtifa da daghe ọle ghe Josẹf wo manman guẹ iwẹnna, sẹyẹ ọria nan sabọ gbaẹkẹ ọle nọn. Ọ bha buegbe, Pọtifa da mun emhin rebhe nesọle Josẹf bhi obọ nin ọle ha gbẹloghe ele.

Okhuo Pọtifa da daghe ọle ghe Josẹf wo manman mhọn-ose, sẹyẹ, ọle wo ziẹn. Bhiriọ, ọle da ha taman Josẹf ukpẹdẹ-ukpẹde ghe nọn nanlẹn nowẹ. Be Josẹf ha ki lu yẹ nian? Josẹf bha ka nanlẹn, ọle da taman ọne okhuo yọle: ‘Eye! Emhin ebe khọnan. Ebeanlẹn mẹn gbaẹkẹ mẹn, sẹyẹ, okhuo ọle uwẹ khin. Emhin ebe mẹn ha lu da Osẹnobulua sade mẹn ne uwẹ nowẹ!’

Ẹdọkpa, okhuo Pọtifa da ha guanọ nin ọle sua Josẹf ọbhọ rẹ nanlẹn nowẹ. Ọle da si ọle ukpọn mhọn, ọkpakinọn, Josẹf da nẹgbe. Ẹghe nin Pọtifa nin ọdọ ọle ki rẹ vae bhi uwa, ọle da taman ọlẹn ghe, Josẹf rẹ ha guanọ nọn nanlẹn nowẹ. Ohoghe ọle bhale. Ranmhude ọnan, ẹkẹ da wo manman khọ Pọtifa, bhiriọ, ọle da mun Josẹf ọbhi ighan. Ọkpakinọn, Jehova bha ye Josẹf a.