Jekọp Bi Isọ Da Ko Re Ẹmhọn Ọi Nọnsẹn

Jehova da taman Jekọp ghe ọle dẹ gbega ọle beji ọle rẹ gbega Ebraham bi Aiziki. Jekọp da dọ ha nyẹnlẹn bhi Heran. Ọle da re okhuo bhi enin, ha mhọn azagba-uwa nọn kpọnọ, yẹ manman fe.

Akizẹbue, Jehova da taman Jekọp yole: ‘Ha khian agbaẹbho nonsẹ.’ Bhiriọ, Jekọp bi azagba-uwa nọnsọle da mun ọne okhian hẹn rẹ fikie ha khian uwa. Ọne okhian wo manman ree. Beji ele rẹ khian bhi odẹ, ẹbho eso da bue Jekọp re yẹ taman ọlẹn yọle: ‘Obhio ẹ nin Isọ vade, ọle ne ikpea ne bun sẹbhi 400 rẹkhan egbe!’ Ofẹn da ha mun Jekọp ghe Isọ dẹ kuan ọlẹn bi azagba-uwa nọnsọle. Bhiriọ, ọle da nan erọnmhọn ji Jehova yọle: ‘Huẹan hinmhin mẹn bhi obọ obhio mẹn.’ Ẹdẹ ki we, Jekọp da muno ihuan, ẹbhe, ẹmena, kẹtẹkẹtẹ, bi jaki ne bunbun nin eguọmandia nesọle, nin ele ne ji Isọ.

Bhi ọsasọn bhi ọne ukpẹdẹ nin beji Jekọp ọkpa ha ribhọ ọsọle, ọle da daghe ẹhi ọkpa. Ọle bi ọne ẹhi da ko ha dan. Ele da ne egbe dan rẹ sẹbhi ọsewewiẹ. Arẹmiẹn ọne ẹhi kuan Jekọp, Jekọp bha ka zẹ ọle obọ. Ọne ẹhi da yọle: ‘Zẹ mẹn obọ.’ Ọkpakinọn, Jekọp da yọle: ‘Eye, uwẹ dẹ nan erọnmhọn nin mẹn fo mẹn kuẹ zẹ uwẹ obọ.’

Bhi ọkike ọle, ọne ẹhi da nan erọnmhọn nin Jekọp. Jekọp da ki lẹn ghe Jehova i da re otọ nin Isọ rẹ kuan ọlen.

Bhi ọne ọsewewiẹ nin, Jekọp da daghe ọle ghe Isọ bi ene ikpea 400 vade. Jekọp da ke odalo nin azagba-uwa nọnsọle yẹ deuhọnmhọnre nin obhio ọle igba ihinlọn. Isọ da runẹ bu Jekọp yẹ mun ọlẹn dede. Ele veva da gbe eviẹ a, yẹ mun ẹmhọn fia. Be uwẹ riale uwedẹ nin Jekọp rẹ nin Isọ lu emhin dia Jehova yẹ bhi egbe?

Akizẹbue, Isọ bi Jekọp da ha khian uwa nọnsẹle kẹkẹ. Imikpea 12 Jekọp ha mhọnlen. Elin nọnsẹle hi, Rubẹn, Simiọn, Livai, Juda, Dan, Naftalai, Gad, Asha, Isaka, Zẹbulọn, Josẹf, bi Bẹnjamin. Ọkpa bhi ọmọn nọnsọle natiọle Josẹf, ọle Jehova noo rẹ hinmhin ẹbho nesọle. Uwe be lẹn uwedẹ nin ọle rẹ lu ọle? Bha ji mhan fẹ ọle ghe.