Jekọp Da Le Ọne Uku

Ikpe 40 Aizik ha ye bhi ẹghe nin ọle rẹ re Rebeka bhi amhẹn. Ọle wo manman hoẹmhọn ọlẹn. Akizẹbue, ele da biẹ imọn eva. Abieva ele ha khin.

A da ha tie ọdiọn nọn ribhọ Isọ, a da ha tie akhere nọn ribhọ Jekọp. Ọ wo ha yẹẹ Isọ rẹ ha dagbare bhi uwa, sẹyẹ, ọle manman guẹ ebi a rẹ gbe elanmhẹn yẹ. Ọkpakinọn, ọ wo yẹẹ Jekọp rẹ ha debhi uwa a. 

Bhi ọne ẹghenin, aba ha yu, a ki mun otọ nọnsọle nọn kpọnọ nẹ bi igho nọnsọle nọn kpọnọ nẹ nin ọmọndiọn nọnsọle. Ọnin a tiọle alebhuku. Bhi azagba-uwa ọsi Aizik, ive nin Jehova ve nin Ebraham deba ọne alebhuku nan. Isọ bha ha ghe ọne ive nin Jehova vele bii emhin nọn ghanlẹn. Ọkpakinọn, Jekọp wo ha ghe ọle bii emhin nọn ghanlẹn.

Ẹdọkpa, beji Isọ na bhi eji ọle da gbe elanmhẹn bhi ẹwẹ vae, egbe da wo lọ ọle. Jekọp da ha nyẹn ebale bhi ọne ẹghe. Ọne ebale da wo manman ha viohin. Isọ da ki taman Jekọp yọle: ‘Ohanmhẹn la gbe mẹn an! Sa mẹn bhi owo nọn gian nọnsẹ!’ Jekọp da yọle: ‘Mẹn dẹ sa nin uwẹ, ọkpakinọn, ka ve ghe alebhuku nọnsẹ dẹ kiẹn ọsẹmẹn.’ Isọ da ki wanniẹn ọlẹn yọle: ‘Mẹn i mhọn ebi mẹn re ọne alebhuku lu! Mẹn mun nin uwẹ. Ebale rẹtẹ mẹn nian.’ Uwẹ be riale emhin ẹwanlẹn Isọ lu riọ? Eye, ọ i yi emhin ẹwanlẹn. Isọ da mun emhin kpataki fia ranmhude ebale.

Ẹghe nin Aizik ki rẹ manman wo dọmanlẹn, ọne ẹghe da sẹ nin ọle ha rẹ nan erọnmhọn nin ọmọndiọn nọnsọle. Ọkpakinọn, Rebeka da rẹkpa Jekọp nin akhere rẹ miẹn ọne erọnmhọn. Ẹghe nin Isọ ki rẹ lẹn ebe sunu, ẹkẹ da wo manman ha khọ ọle. Bhiriọ, ọle da ha guanọ nin ọle gbe ọbhio ọle a. Aizik bi Rebeka da ha guanọ nin ele gbega Jekọp. Bhiriọ, ele da taman ọlẹn yọle: ‘Ha khian isi Leban nin obhio inẹn, uwẹ ha debhi enin an rẹ sẹbhi ẹghe nin ẹkẹ ha rẹ fu Isọ re.’ Jekọp da lu beji ene biẹ ọle taman ọlẹn, ọle da nẹgbe nan hẹi gbe ọle a.