Ebi Uwẹ Arẹ Ha Man Ọmọn Emhin Yẹ

Ẹghe nin Jehova rẹ mun azagba-uwa gbọ, ene biẹ ọmọn ọle re mudia ne ha gbẹloghe ọmọn. (Colossians 3:20) Nin ọmọn rẹ wanre kin ọria nọn mhẹn bi nọn rẹ hoẹmhọn iJehova, ẹsọn nọnsi ene biẹ ọle nọn. (2 Timothy 1:5; 3:15) Ọkhẹke nin bha rẹ lẹn ebe ribhi ọkhọle nọnsi ọmọn nọnsẹ bha. Lẹn ghe ukpo oẹ nuwẹ zẹ rẹ nyẹn, emhin kpataki nọn. Uwẹ ha mhọn ẹmhọn nọnsi Jehova bhi ọkhọle, ọle uwẹ ada sabọ man ọmọn nọnsẹ ele.—Psalm 40:8.

1 JA MIẸN IMỌN NESẸ SABỌ HA NIN UWẸ TALỌ

EBI BAIBO TALE: ‘Kẹ aka ehọ, hẹi kẹ ha talo.’ (James 1:19) Ji imọn nesẹ lẹn ghe ele dẹ sabọ ha ta ọta rebhe man ẹn. Ji ele lẹn ghe uwẹ muegbe nuwẹ rẹ ka ehọ sade ele talọ. Ha ri unun ekpẹn talọ, beji ọa da lẹkhẹ nin ibhokhan nesẹ rẹ ha ta ebe ri ele bhi ọkhọ rebhe. (James 3:18) Ele ida taan ọkhọle rẹ nin uwẹ talọ sade ele riale ghe uwẹ dẹ ha fi ọsabhalo la ha nele gui. Ha mhọn iziengbe da ibhokhan nesẹ, yẹ ha taman ele ẹghe rebhe ghe uwẹ hoẹmhọn ele.—Matthew 3:17; 1 Corinthians 8:1.

EBI UWẸ HA LU:

• Ha re ẹghe nin imọn nesẹ sade ele ho ne nin uwẹ talọ

• Ha nin imọn nesẹ zilo ẹghe rebhe, ọiyi ẹghe nele rẹ mhọn ọnọghọ ọkpa

2 DỌNMHEGBE NUWẸ RẸ LẸN OTỌ EBI IMỌN NESẸ GENE TA

EBI BAIBO TALE: ‘Ọnọn ri ẹwanlẹn lẹn otọ ẹmhọn ole emhin do odẹ re nan.’ (Proverbs 16:20) Ẹghe eso, ọkhẹke nuwẹ ghe gbera ebi ọmọn nọnsẹ ri unun ta, nuwẹ da lẹn ebi emhin dia ọle yẹ. Ọiyi emhin nọn nọghọ nin elasẹre rẹ hian ba ọta la ta ebe ele imhọn bhi ọkhọle. ‘Ọria nọn ri ewaniẹn bhi ọta ọle kuẹ họn, emhin uhuki nọn rẹji ọle’ (Proverbs 18:13) Hẹi ji ẹkẹle kẹ ha khọ ẹ.—Proverbs 19:11.

EBI UWẸ HA LU:

• Taman egbe ẹ ghe, ebi imọn nesẹ irẹ taman ẹn, uwẹ ida gbe ọta ele bhi unun, la lu ebe bha khẹke

• Yere ebi egbe dia uwẹ yẹ ẹghe nuwẹ rẹ dia bii ele, bi ebe yi emhin kpataki rẹji ẹ ẹghe nin

3 BHA KO HA TA UNUN ỌKPA BHI SIRA IMỌN

EBI BAIBO TALE: ‘Ka ehọ adia nọnsi aba ẹ, ọmọn nọnsi mhẹn, hẹi ri ẹlo gbe uhi nọnsi inẹn an.’ (Proverbs 1:8) Nan rẹ ha gbẹloghe ọmọn, ẹsọn nin Jehova gha nin aba bi inẹn nọn. Ọkhẹke nin bha man imon nesẹ bha ebi ele arẹ ha muekpẹn nin bha yẹ, sẹyẹ ha ka bha ehọ. (Ephesians 6:1-3) Imọn dẹ lẹn, si aba bi inẹn ele bha ko ha ta unun ọkpa bi ọkhọ ọkpa. (1 Corinthians 1:10) Bha hẹi sira imon nesẹ bha ha gbugan si bha bha ko ta ọkpa, ranmhude, ọnan dẹ sabọ si ekpẹn nele mun nin bha kẹ otọ.

EBI UWẸ HA LU:

• Bha ko zilo yẹ gbale ukpẹ ebi bha rẹ ha dia ibhokhan nesẹ bha yẹ

• Sade uwẹ bi okhuo ẹ la ọdọ ẹ mhọn uwedẹ kikẹ nin bha ho nin bha rẹ ha man imọn nesẹ bha emhin, dọnmhegbe nuwẹ rẹ lẹn otọ ebi okhuo ẹ la ọdọ ẹ ghe ọle yẹ

4 BHA HA MHỌN EMHANMHAN

EBI BAIBO TALE: ‘Man ọmọn nọnsẹ uwedẹ nọnle a rẹkhan.’ (Proverbs 22:6) Ọkhẹke nuwẹ rẹ ha mhọn emhanmhan nuwẹ arẹ sabọ man imọn nesẹ emhin. Ọkpa bhi enin emhanmhan nan hi, nan rẹ ha dia imọn. (Psalm 127:4; Proverbs 29:17) Nan rẹ ha dia ọmọn, ọiyi nan rẹ ha ri oya nanlẹn. Ọkhẹke nuwẹ rẹ rẹkpa imọn nesẹ rẹ lẹn ebezẹle nọn da khẹke nele rẹ ha rẹkhan uhi nan gbe nele. (Proverbs 28:7) Sẹyẹ ha man ele ebi ele arẹ hoẹmhọn ẹmhọn nọnsi Jehova ne ribhi ẹkẹ iBaibo yẹ, bi nele rẹ lẹn uhi ne ribhi ẹkẹ ọle. (Psalm 1:2) Ọnan dẹ dọ ri ele ha mhọn ọkhọle nọn gbale.—Hebrews 5:14.

EBI UWẸ HA LU:

• Ja miẹn imọn nesẹ ghe Osẹnobulua bii ọria ẹjẹje nele asabọ mun udu nyan

• Rẹkpa imọn nesẹ rẹ lẹn ufi nọn ribhi usakaan, bi okhẹnan nọn ribhi itanẹti bi ikolu nan lu bhọ. Man ele ebi ele arẹ nẹ nin ene mun ibhokhan hoo yẹ