Ebi Imọn Rẹ Fi Iẹnlẹn Ọsi Ibọdọ Bi Iriokhuo Denọ Yẹ

Udede eghọnghọn bi ẹsọn, ọle ọmọn ọsọgbọn mun ji okhuo bi ọdọ. Ranmhude aba bi inẹn ọsọgbọn ele sẹ khin, asabọ miẹn okhuo bi ọdọ ne la biẹ ki kere ghe, ahu bi ẹghe nọnsele nọn kpọnọn nẹ, ukegbe ọmọn nọnsele ele ki da noo ọle. Abha wẹ sotọ, bi beji egbe dia ọria yẹ sade abiẹ ọmọn ọgbọn, dẹ sabọ di idobolo ọbhi ukolu nin ọdọ bi aamhẹn koko mhọnlẹn. Ọkhẹke nuwẹ bi okhuo ẹ la ọdọ ẹ fidenọ bhi emhin eso, nin bha sabọ ha gbẹloghe ọmọn nọnsẹ bha, sẹyẹ ha gbega ibọdọ bi iriokhuo nọnsẹ bha. Bi ibhude ne ribhi Baibo arẹ sabọ rẹkpa uwẹ yẹ, nuwẹ rẹ khọn min-otọ bhi enin ọnọghọ nan?

1 LẸN OTỌ EBI ỌMỌN RẸ FI IẸNLẸN ỌSI OKHUO BI ỌDỌ DENỌ YẸ

EBI BAIBO TALE: ‘Ihoẹmhọn-egbe mhọn iziengbe bi ifuẹkẹle.’ Ihoẹmhọn-egbe i ‘guanọ ọsi egbe ọle ọkpa, ukpo ohu ire ọle.’ (1 Corinthians 13:4, 5) Ranmhude inẹn ọsọgbọn uwẹ khin, ọbha han ilo ghe, uwẹ dene ẹlo bhi ọmọn nọnsẹ ẹghe rebhe. Ọnan dẹ sabọ ri ọdọ ẹ ha riale ghe uwẹ fi ọle ehọ a. Bhiriọ, yere ghe ọdọ ẹ yẹ guanọ ẹghe nọnsẹ. Uwẹ ha ri ifuẹkẹle bi iziengbe khian, uwẹ dẹ sabọ ji ọdọ ẹ lẹn ghe, uwẹ hoẹmhọn lẹn. Ọle ki yẹ rẹkpa ẹ gbẹloghe ọmọn.

‘Ibha nin ọdọ . . . bha ri ilẹnmhin rẹ ha nin okhuo bha nyẹnlẹn.’ (1 Peter 3:7) Ọkhẹke nuwẹ lẹn ghe, ọmọn nọnsẹ bha, ọle okhuo ẹ da ha noo ẹghe bi ahu nọnsọle nan nẹ. Ẹsọn ọsọgbọn khọnan rẹji okhuo ẹ. Ọnin iwẹnna nan dẹ ri egbe wọle. Ọki yẹ ha gbọle ahu. Asabọ miẹn ọbha ghọnghọn ẹgheso. Ọsabọ ha fibhẹlo mun uwẹ ẹgheso. Ahamiẹn ọnan sunu, uwẹ ha de ọkhọle re, ranmhude ‘ọria nin ẹkẹle ikẹ khọ, ọle mhẹn nẹ okpea nọn mhọn ahu.’ (Proverbs 16:32) Rẹman ghe, uwẹ mhọn ilẹn otọ emhin. Uwẹ a sẹyẹ ha ri iyobọ nin okhuo ẹ guanọ nanlẹn.—Proverbs 14:29.

EBI UWẸ HA LU:

• Aba: Ha rẹkpa okhuo ẹ gbẹloghe ọmọn arẹmiẹn ọsasọn nọn. Guanọ ẹghe bhi ẹkẹ ẹghe nuwẹ noo bhi emhin nekẹle, beji uwẹ ada miẹn ẹghe ha noo nin okhuo ẹ bi omọn nọnsẹ

• Inẹn: Ọdọ ẹ ha yọle nọnle rẹkpa ẹ lu ẹsọn ọmọn, uwẹ ha re ẹghe nanlẹn. Hẹi ri unun gbọle sade ọbha lu ọnin ẹsọn nọnsẹn, ri ifuẹkẹ manlẹn ebarẹ luọle yẹ

2 BHA JI IKOLU NỌNSẸ BHA DEZIẸN

EBI BAIBO TALE: ‘Ele ki kiẹn efun-egbe ọkpa.’ (Genesis 2:24) Aha rẹ miẹn ọmọn vae dọ deba azagba-uwa nọnsẹ bha, yere ghe, ‘efun-egbe ọkpa’ uwẹ bi ọdo ẹ la okhuo ẹ sẹyẹ khin. Lu ebi uwẹ a sabọ lu rebhe, nuwẹ rẹ ha mun ibọdọ bi iriokhuo nọnsẹ bha deziẹn.

Ibha nin ikhuo, bha ji iyobọ nin ọdọ bha re bha ha ti bha bhọ. Ọta ekhuẹmhẹn nọnsẹ dẹ sabọ kiẹn ‘emhin nọn re egbe daan.’ (Proverbs 12:18) Ọdọ, taman okhuo ẹ ghe, uwẹ manman hoẹmhọnlẹn, ghe ẹmhọnlẹn daan ẹn. Ha khuẹmhẹn ọlẹn bhi uwedẹ nọnle rẹ gbẹloghe azagba-uwa nọnsẹ bha.—Proverbs 31:10, 28.

‘Ji ọdeọde ha guanọ ọmhẹn nọnsi ọria nọnkẹle, ọiyi ọsi egbe ọle ọkpa.’ (1 Corinthians 10:24) Ha lu ebe mhẹn nẹ nin ọdọ ẹ la okhuo ẹ. Bha ha re eghe bhi otọ ko talọ, ka egbe ehọ, yẹ gẹn egbe. Ibha hẹi ri ine-egbe-nowẹ ha si egbe akhan. Bha ha ria ne egbe. IBaibo tale ghe: ‘Bha hẹi rọle ha si egbe akhan, sokpan, ibha veva ka ko tale.’ (1 Corinthians 7:3-5) Bhiriọ, bha veva taan ọkhọle a, kugbe zilo nyan ọnin ẹmhọn nan. Iziengbe bi ilẹn otọ emhin nọnsẹ bha dẹ sabọ ri ikolu nọn sẹbha zeze.

EBI UWẸ HA LU:

• Bha hẹi yelea rẹ ha mhọn ẹghe nin egbe

• Ha lu ukpobhi emhin khere-khere nuwẹ rẹ ji okhuo ẹ la ọdọ ẹ lẹn ghe uwe hoẹmhọnlẹn. Bhọsi ijiẹmhin, gbẹn obhi ebe khere re ji ọle. Uwẹ sabọ dẹ emhin rẹ lu ese nanlẹn

3 MAN ỌMỌN NỌNSẸ EMHIN

EBI BAIBO TALE: ‘Nanbhi ẹghe ọmọn-obọ rẹ ha vade, ọle uwẹ rẹ lẹn ebe nọn khiale, nọn ha sabọ re ẹwanlẹn niẹn rẹ miẹn amiẹnfan.’ (2 Timothy 3:15) Mhanmhan ebi uwẹ ha lu nuwẹ rẹ man ọmọn nọnsẹ emhin. Ọkuẹsẹ uwẹ biẹ ọle, ẹwanlẹn nan rẹ sabọ luẹ emhin ki nọnle fo. Beji ọle ribhi ẹkẹle, ọdẹ sabọ lẹn urulu nọnsẹ. Ọsẹyẹ lẹn ebi emhin dia uwẹ bhi egbe yẹ. Ọrẹ yi ọmon-obo, ha tie ebe manlẹn. Aha rẹ mien ọbha lẹn ebi uwẹ tie manlẹn nian, ọdẹ rẹkpa ọle rẹ ha mhọn ọyẹẹ nanrẹ tie ebe sọle ki wanre.

Ọmọn nọnsẹ bha, ọbha khere gbe nin ọle rẹ họn uwẹ tẹmhọn Osẹnobulua. Ji ọle a họn ghe uwẹ nan erọnmhọn ji Jehova. (Deuteronomy 11:19) Bha ko ha khiẹnlẹn, ha taman lẹn ẹmhọn emhin nin Osẹnobulua manlẹn. (Psalm 78:3, 4) Ọmọn nọnsẹ aki ha wanre, ọki dọ daghe ghe, uwẹ hoẹmhọn iJehova. Ọle ki yẹ hoẹmhọn iJehova.

EBI UWẸ HA LU:

• Ha bhii Osẹnobulua nọn ri ẹwanlẹn niẹn nurẹ man ọmọn nọnsẹ emhin

• Ha ta ọta kpataki man ọmọn nọnsẹ ẹghe-ẹghe beji ọle ada sabọ kẹ muhẹn ha luẹ emhin