Barẹ Kikie Miẹn Ọnin Ẹmhọn-ata Nọn Ribhi Ẹkẹ IBaibo Yẹ?

IBaibo tale ghe Jesu ha yu fo, eman-emhin ohoghe ki fa ẹmhọn-ata nọn ribhi ẹkẹ iBaibo a. (Acts 20:​29, 30) Ebi Jesu tale da gene ha sunu bhi ẹghe nọn bha re gbe. Eda man iman-emhin ọsi Jesu bi ọsi ohoghe kugbe. Ranmhude ọnin, oga ohoghe da zi egbe dagbare. (2 Timothy 4:​3, 4) Bi mhan arẹ lẹn yẹ ghe mhan mhọn ilẹnmhin nọn gbale nin Baibo gene maan?

Ọnin ẹghe da vae nin Jehova rẹ zi ẹmhọn-ata egbe dagbare. Ọle da tale ghe, bhi ẹghe ọkpẹnlẹn ọsi ọnin agbọn nan, ilẹnmhin nọn gbale ki gba otọ agbọn rebhe.’ (Daniel 12:⁠4) Bhi ukpe 1870, eria eso ne ha guanọ ẹmhọn-ata da dọ kere ghe otuẹ ne bun bun imhọn ẹmhọn-ata. Ranmhude ọnin, eda muhẹn ha guanọ otọ ẹmhọn-ata nọn ribhi Baibo. Bhiriọ, Jehova da nan erọnmhọn nele rẹ min otọ ẹmhọn-ata nọn ribhi Baibo.

Eria esili da gbẹlokotọ rẹ luẹ iBaibo. Oẹ nin ene kalo zẹle bhi iluẹmhin nọnsi Baibo mhan yẹ rẹkhan. Uhọnmhọn-ọta rẹsi uhọnmhọn-ọta ele rẹ ha zilo ọbhi Baibo. Eha luẹ sẹbhi emhin nọn nọghọ nan rẹ lẹn otọle bhi obọ ọkpa, eki guanọ otọle bhi ije ebhebhe. Eha miẹn eje diẹn mun eje ele ka tie bhi ẹkẹ Baibo, eki gbẹn ọle ọbhi otọ. Nin Baibo rẹ ha tẹmhọn egbe ọle dagbare, eda dọ kie lẹn ẹmhọn-ata ọsi elin Osẹnobulua, Agbejele, iho nọnsi Osẹnobulua rẹji mhan nin eria bi ọnin otọ nan, ebe sunu ji ene yu bi ariọ kpanọ ọsi ene yu. Nele rẹ lẹn otọ ẹmhọn-ata, eda dọ sibhi oga ohoghe re.​—⁠John 8:​31, 32.

Bhi ukpe 1879, ene luẹ iBaibo da dọ daghe ghe, ẹghe sẹle nele arẹ ri ọnin emhọn-ata man bhi otọ agbọn rebhe. Bhi ọnin ukpe nin, eda muhẹn a gbẹn ebẹ natiọle, The Watchtower Announcing Jehovah’s Kingdom. Ẹlẹnan nian, mhan man ẹbho emhọn-ata nọn ribhi Baibo bhi agba ẹbho nọn gbera 239 bi urolo nọn gbera 700. Ilẹnmhin ọsi ẹmhọn-ata bha sẹ dinian kpọ ghee!

• Be sunu ji ẹmhọn-ata nọn ribhi Baibo bhi ẹghe nin Jesu rẹ yu fo?

• Be rẹkpa mhan rẹ kikie miẹn ẹmhọn-ata nọn ribhi ẹkẹ iBaibo?