ILUẸMHIN 4
Bezẹle Nin Mhan Da Gbẹn IBaibo Natiọle New World Translation?
Congo (Kinshasa)
Rwanda
Ukhiọmhin ebe Symmachus nan gbẹn elin nọnsi Osẹnobulua bhi ebe Psalm 69:31, bhi ore nọnzi ea la nọnzi enẹn .
Bhi ikpe ne bun bun Esali Jehova noo iBaibo ikikẹ yẹ gha ele nin ẹbho. Mhan da dọ kere ghe, ọkhẹke nin mhan rẹ kie gbẹn iBaibo nọn ha rẹkpa eria rẹ luẹ ẹmhọn-ata nọn ribhi Baibo. Ọnan iho nọnsi Osẹnobulua rẹji ọrebhe. (1 Timothy 2:3, 4) Bhi ukpe 1950, mhan da muhẹn ha gha obọ ọkpa ọsi Baibo nan ri urolo nan zẹ ẹlẹnan gbẹn natiọle New World Translation. Awọ gbẹlokotọ rẹ zedu ọnin Baibo nan bhi urolo nọn gbera 120.
Baibo nọn lẹkhẹ nan rẹ lẹn otọ ọle mhan guanọ. Ẹghe rebhe urolo rẹ fi denọ. Bhiriọ, urolo nan iyẹ noo, nan bha lẹn otọ ọle ọle ribhi Baibo ne bunbun. Iriọ, mhan da dọ miẹn ebe nanrẹ gbẹn iBaibo nọn gbale nọn sike ọnan ka gbẹn khẹ. Ọnan rẹkpa mhan rẹ lẹn otọ urolo Hibru, Aramaik bi Griki.
Baibo nọn ri ẹmhọn-ata dagbare mhan guanọ. Nan heị fi ẹmhọn-ata nọn ribhi Baibo egbe denọ, ọkhẹke nin ene zedu iBaibo rẹ gbẹn ọle ọbhi otọ beji akarẹ gbẹn ọlẹn tee. Ukpẹdẹ nin ẹlẹnan nian, elin Osẹnobulua nin Jehova iyẹ ribhi Baibo ne bunbun.
Baibo nọn ri ogẹn ji Osẹnobulua mhan guanọ. (2 Samuel 23:2) Akie ri elin nọnsi Osẹnobulua nin Jehova dagbare bhi Baibo natiọle New World Translation, bhi ijain 7,000 beji ọye bhi Baibo nan ka gbẹn. Fẹ adudu nọn ri ọnan man bhi otọ ọnin apapa ebe nan. (Psalm 83:18) Nanrẹ ri ẹghe ọbhi otọ rẹ gbẹn ọnin Baibo nan, ọ sọnyẹnmhẹn nan rẹ tie, ranmhude, ọri ọkhọ nọnsi Osẹnobulua maan. Arẹ miẹn uwẹi mhọn New World Translation bhi urolo nọnsẹ, mhan bhii ẹ nuwẹ a tie ọnin uwẹ irẹ ha mhọn ẹdẹdẹ.—Joshua 1:8; Psalm 1:2, 3.
Bezẹle nin mhan da guanọ iBaibo nọn lẹkhẹ?
Be khẹke nin mhan ha alu ẹdẹdẹ nin mhan rẹ lẹn iho nọnsi Osẹnobulua?