Leviticus

6 Bhiriọ, Moses da tie Aaron bi imọn nesọle re yẹ re amẹn kpe ele a. 7 Ọnin ki fo, ọle da re ukpọn yọ Aaron, ọle da re ugbakun nan re ukpọn lu gba ọle, ọle da re ukpọn nọn taan nọn imhọn obọ yọ ọle, ọle da yẹ mun ọne ephod nyan ọlẹn, yẹ re ugbakun nan do ọsi ọne ephod rẹ gba ọle akun nọnsẹn. 8 Ọle da sẹyẹ mun emhin yọ ọle bhi udu, ọle da ne Uʹrim bi Thumʹmim ọbhọ. 9 Ọle da mun ugbaneto ọbhi uhọnmhọn nọnsọle, yẹ re emhin nọn dia para nọn fi wanlan-wanlan nan re igolu lu fi ọbhi odalo ọne ugbaneto, ọne iyaman nọn khiale ọsi iregbeguẹ, beji Jehova taman iMoses nin ọle lu. 12 Bhi ọkike ọle, ọle da biri abhii nan rẹ zẹ ọria ọbhi uhọnmhọn ọsi Aarọn rẹ zẹ ọle beji ọle a da kpe ọle khia. 14 Ọle da yẹ mun ọne ogho-ẹmena nan ha rẹ lu izọese ọsi olukhọ re, sẹyẹ, Aaron bi imọn nesọle da yẹ ne obọ nọnsele ọbhi uhọnmhọn ọsi ọne ogho-ẹmena nan ha rẹ lu izọese ọsi olukhọ. 15 Moses da hian ọle uru a yẹ re ikpian-obọ nọnsọle rẹ sa ọne aranlẹn yẹ nọnọn ọlẹn ọbhi ukhaẹn rebhe ne ribhi ọne ukhuo-izọese. Ọle da kpe ọne ukhuo-izọese khia bhi olukhọ. Ọkpakinọn, ọle da biri ọne aranlẹn nekẹle ọbhi otọ ọne ukhuo-izọese, nin ọle rẹ kpe ọle khia yẹ zọese bhi uke ọle. 16 Ọnin ki fo, Moses da ne ene abhii rebhe ne ribhi ene ibiẹ, ene efun ne yo dagbare bhi ọne ibẹn, bi ene ikpakiẹn eva bi abhii ọle yẹ tuẹ ele a bhi uke ọne ukhuo-izọese. 17 Bhiriọ ọle da ne emhin ne kẹre bhi ọne ogho-ẹmena, egbe ọle, efun ọlẹn, bi isọn nọnsọle. Ọle da ne ele dagbare bhi ọne agọ yẹ re eranlẹn tuẹ ele a, beji Jehova taman iMoses nin ọle lu.