Exodus
6 Jehova da taman iMoses yọle: “Uwẹ dẹ daghe ebi mẹn ha khian iPharʹaoh yẹ. Obọ nọn kaka dẹ re ọle fan ene ẹbho fia. Obọ nọn kaka dẹ re ọle khu ele sibhi ọne agbaẹbho nan re.” 2 Osẹnobulua da ki taman iMoses yọle: “Imẹn hi Jehova. 3 Mẹn ka zegbere man Abraham, Isaac, bi Jacob khẹ bọsi Osẹnobulua nọn Ke Okhun Nẹ, ọkpakinọn, rẹji elin nọnsẹmhẹn nin Jehova, mẹn bha re ọle re egbe man ele. 4 Imẹn da yẹ deba ele ve akovẹn ghe, mẹn dẹ mun otọ iCanaan nin ele, otọ nin ele da ka nyẹnlẹn bọsi eriọbhe. 5 Ejayenan nian, mẹn họn usomhin ọsi ibhokhan Izrẹl nin ibhokhan Egypt rẹ ha lu igbọn, mẹn da yẹ ye akovẹn nọnsẹmhẹn re. 6 “Bhirio, taman ibhokhan Izrẹl yọle: ‘Imẹn hi Jehova, mẹn dẹ ne bha sibhi odotọ ihẹ nin ibhokhan Egypt mun nyan bha, sẹyẹ ne ibha sibhi igbọn re. Mẹn ki re obọ nọn niẹn an bi ibhohiẹn nọn khua rẹ ne bha kiere. 7 Mẹn ki miẹn bha bhi egbe bọsi ẹbho nesẹmhẹn, mẹn ki ha yi Osẹnobulua nọnsẹbha, bha ki gene dọ lẹn ghe imẹn hi Jehova nin Osẹnobulua nọnsẹbha nọn dọ ne bha kie bhi odotọ ihẹ nin ibhokhan Egypt mun nyan bha. 8 Mẹn ki ne bha vae bhi otọ nin mẹn ve ive ọle ghe, mẹn dẹ mun nin Abraham, Isaac, bi Jacob; mẹn ki mun ọne otọ nin bha da ha nyẹnlẹn. Imẹn hi Jehova.’” 9 Moses da ki ta ene ẹmhọn nan man ibhokhan Izrẹl, ọkpakinọn, ele bha re ehọ ọle bhọ, ranmhude egbe nọn wo lọ ele, bi igbọn nan ha re ele lu. 10 Jehova da ki taman iMoses yọle: 11 “Ha khian, uwẹ ha dọ taman iPharʹaoh nin ojie ọsi Egypt nin ọle ji ibhokhan Izrẹl da sibhi otọ nọnsọle re.” 12 Sokpan, Moses da taman iJehova yọle: “Ghọle, ibhokhan Izrẹl bhọ bha ka mẹn ehọ; be iPharʹaoh ha rẹ ka mẹn ehọ yẹ beji a miẹn ghe mẹn bhọ iguẹnrẹ talọ?” 13 Jehova da kie taman iMoses bi Aaron ebi ele ha taman ibhokhan Izrẹl, bi ebi ele ha taman iPharʹaoh nin ojie ọsi Egypt, beji ọle ha da sabọ ne ibhokhan Izrẹl sibhi otọ Egypt re. 14 Enan hi ediọn ọsi uwa nọnsi aba ele: Imọn nesi Reuʹben nin ọmọndiọn nọnsi Izrẹl da ha yi Haʹnoch, Palʹlu, Hezʹron, bi Carʹmi. Enan hi azagba-uwa nesi Reuʹben. 15 Imọn nesi Simʹe·on da ha yi Jem·uʹel, Jaʹmin, Oʹhad, Jaʹchin, Zoʹhar, bi Shaʹul nin obhiẹ iCaʹnaan biẹ nanlẹn. Enan hi azagba-uwa nesi Simʹe·on.