Exodus
5 Ọkizẹbue, Moses bi Aaron da bu iPharaoh re yọle: “Inian Jehova nin Osẹnobulua ọsi Israel tale, ‘fan ẹbho nesẹmhẹn fia nin ele da dọ lu iluemhin ji mhẹn bhi ẹkẹ ojẹgbo.’” 2 Ọkpakinọn, Pharʹaoh da yọle: “Họ bhọ hi Jehova, nin mẹn ha da ka ọle ehọ, yẹ fan ibhokhan Izrẹl fia? Mẹn bha lẹn iJehova hiehie, rẹ deba ọnin, mẹn ida fan ibhokhan Izrẹl fia.” 3 Ele da yọle: “Osẹnobulua ọsi ibhokhan Israel nin mhan talọ. Huẹan wowo, mhan ho nin mhan khian okhian nọn ha re ikpẹdẹ ea diọ bhi ẹkẹ ojegbo, nin mhan dọ zọẹse ji Jehova nin Osẹnobulua nọnsẹmhan; mhan bha da lu iriọ, ọle dẹ mun emianmhẹn gbe mhan la re agbada gbono mhan an.” 4 Ọnojie ọsi Egypt da wanniẹn ele yọle: “Moses bi Aaron, bezẹle nin bha da ha nin ene ẹbho nan obọ sibhi iwenna re? Bha fikie dọ ha miẹn ẹsọn nọnsẹbha!” 5 Pharaoh da yẹ yọle: “Ghe ebi ẹbho ne ribhi ọne agbaẹbho nan bun sẹyẹ, bha ki dọ ne ele obọ sibhi ẹsọn nọnsele re.” 6 Bhi ọne ukpẹdẹ nin, Pharaoh da taman ene re ene ẹbho wẹnna bi ene deba ele: 7 “Bha hẹi yẹ gia ato nin ene ẹbho nan rẹ ha man ekẹn. Ji ele da tobele dọ ha gia ato. 8 Bha ha sẹyẹ jamiẹn ghe ele man ekẹn nọn bun sẹ bii ọne ele ka man khẹ. Bha hẹi si ọle kotọ nin ele, ranmhude ele koahua. Ọnin zẹle nin ele da ha viẹ yọle ‘mhan ho nin mhan kpanọn, mhan ho nin mhan dọ zọese ji Osẹnobulua nọnsẹmhan!’ 9 Bha rẹ ẹsọn gbe ele, ji ẹsọn vuọn ele bhi obọ, nin ele hẹi yẹ miẹn otọ rẹ ha kaẹhọ ọta ohoghe.” 21 Ele da wo re ẹjẹje taman ele yọle: “Nin Jehova ghe bha yẹ bhohiẹn, beji a miẹn ghe bha re ẹkẹ mhan ha khọ Fero bi eguọmhandia nesọle. Sẹyẹ, ibha re agbada ele bhi obọ nin ele rẹ gbọnọ mhan an.”