Exodus
4 Iriọ, Moses da wanniẹn ọlẹn yọle: “Ọkpakinọn, ahamiẹn ele bha rẹọbhi ebi mhẹn ta, ele bha da ka mhẹn ehọ, ele dẹ yọle, ‘Jehova bha zegbe re man uwẹ.’” 2 Jehova ki da taman ọlẹn yọle: “Be ọnin khin nọn ribhi obọ nọnsẹ?” Ọ da wanniẹn ọlẹn yọle: “Ukpokpo.” 3 Ọ da yọle: “Re fi ọbhi otọ.” Bhiriọ, ọ da re fi ọbhi oto. Ọ da kiẹn ẹnyẹn; Moses da nẹgbe fiọ ya. 4 Jehova ki da taman Moses yọle: “Niẹn obọ nọnsẹ rẹ mun bhi ukperunmhun.” Bhiriọ, ọ da niẹn obọ rẹ mun ọlẹn, ọ da kiẹn ukpokpo bhi obọ nọnsọle. 5 Osẹnobulua ki da yọle: “Ọnan ele ha rẹ rẹọbhọ ghe, Jehova nin Osẹnobulua ọsi aba bha odede, Osẹnobulua ọsi Abraham, Osẹnobulua ọsi Isaac, bi Osẹnobulua ọsi Jacob, gene zegbere man uwẹ.” 6 Jehova da sẹyẹ taman ọlẹn yọle: “Huẹan, re obọ nọnsẹ fi ọbhi ẹkẹ awu-egbe nọnsẹ.” Bhiriọ, ọ da re obọ fi ọbhi ẹkẹ awu-egbe nọnsọle. Ẹghe nin ọle ki rẹ re dagbare, emianmhẹn egbekẹn da vẹ gba ọle obọ! 7 Ọ ki da yọle: “Kie re obọ nọnsẹ fiọbhi ẹkẹ awu-egbe nọnsẹ.” Bhiriọ, ọ da kie re obọ fi ọbhi ẹkẹ awu-egbe nọnsọle. Ẹghe nin ọle ki rẹ re ọle sibhi ẹkẹ ọne awu-egbe re, ọ da denegbe dia beji egbe nọnsọle nekẹle dia! 8 Ọ da yọle: “Ahamiẹn ele bha rẹọbhọ ebi uwẹ tale la ele bha re ẹlo ọbhi iyaman nin ọhẹnhẹn, ele dẹ gene re ẹlo ọbhi ọne iyaman nọnkẹle nan. 9 Sẹyẹ, aharẹmiẹn ele bha ka rẹọbhọ ene iyaman veva nan, ele bha da ka uwẹ ehọ, uwẹ ha sa amẹn bhi ẹdẹ Nile dọ buru ọle ọbhi otọ nọn ka. Ọne amẹn nin uwẹ sa bhi ẹdẹ Nile ki kiẹn aranlẹn bhi otọ nọn ka.” 10 Moses da ki taman iJehova yọle: “Jehova, huẹan, rẹbọ mẹn, ọkpakinọn, mẹn iguẹnrẹ talọ. Rẹ na otọ ha de bi yẹ rẹ na ẹghe nin uwẹ rẹ ne ọguọmhandia nọnsẹ talọ, mẹn bha sẹyẹ guẹ ebi a rẹ talọ yẹ, ranmhude, beji mẹn rẹ talọ shọlọ-shọlọ, iriọ olanmẹn yẹ rẹ khua mẹn bhi unun.” 11 Jehova da ki taman ọlẹn yọle: “Họla re unun nin ọria, la họla re ele kiẹn odin, ọyehọ, ọnọn daghe nọnsẹn, la ọnọn ruẹlo? Ọ ibe yi mẹn nin Jehova nọn? 12 Bhiriọ, ha khian nian, mẹn dẹ ha re uwẹ bhi ikeke ẹghe nin uwẹ ha rẹ ha talọ. Mẹn dẹ yẹ man uwẹ ebi uwẹ ha ta.” 13 Sokpan, ọle da yọle: “Jehova, huẹan je ọria nọn iki rẹ khin nọn ghọn uwẹ.” 14 Ohu iMoses da wo manman re iJehova. Ọle da yọle: “Aaron nin obhio uwẹ nin obhi Levi kii? Mẹn lẹnmhin ghe ọle sabọ talọ nọnsẹn. Sẹyẹ, ọle vade enan nian nin ọle dọ miẹn uwẹ. Ẹghe nin ọle ha rẹ miẹn uwẹ, ọle dẹ wo ha ghọnghọn. 15 Bhiriọ, uwẹ dẹ ne ọle talọ, yẹ ne ene ọta ọle bhi unun. Mẹn dẹ ne uwẹ bi ọle dia ẹghe nin uwẹ ha rẹ ha talọ. Mẹn dẹ man bha ebi bha ha lu. 16 Ọle ki ha rẹkpa uwẹ rẹ ne ene ẹbho talọ. Ọle ki ha yi ọtọtare nọnsẹ. Uwẹ ki ha yi Osẹnobulua rẹji ọle. 17 Uwẹ ki re ọne ukpokpo nan nin uwẹ re mhọn bhi obọ, yẹ re ọle lu ene emhin ọhan-ilo.” 19 Jehova ki da taman iMoses bhi Midian yọle: “Kpanọ, fikie ha khian Egypt, ranmhude, ene ikpea rebhe ne rẹ ha guanọ uwẹ uhọnmhọn yulu.” 24 Bhi uwedẹ, bhi eji ele da gbe ẹdẹwe, Jehova da bu ọle re, ọ da ha guanọ nin ọle gbe ọle a. 25 Ọkike ọle, Zip·poʹrah da re ukpọghae rẹ ruẹ ọmọn nọnsọle. Ọle da ji emhin nin ọle hian sibhi ekuẹ nọnsọle re de so oẹ nọnsọle. Ọle da yọle: “Ranmhude, ọdafẹn ọsi aranlẹn, ọle uwẹ khin rẹji mẹn.” 26 Bhiriọ, Ọle da zẹ ọle obọ. Bhi ọne ẹghenin, Zip·poʹrah da yọle, “ọdafẹn ọsi aranlẹn,” ranmhude ọne uruẹmhin.