Exodus
3 Moses da ha sun ihuan ọsi Jethro nin aba okhuo ọle. Ọhẹn ọsi Midian Jethro khin. Ẹdẹ ọkpa nin ọle rẹ ha re ene ihuan kọn khian bhi ọne ẹgbo, bhi obọ nin oẹnlẹn da defia, ọ da dọ sẹbhi Horẹb, ukoke ọsi Osẹnobulua nin ẹmhọanta. 2 Ẹghẹnin, ẹhi nọnsi Jehova da zegbe dagbare man ọlen bọsi eranlẹn nọn to bhi udu ẹwẹ igbẹn. Beji ọle ki ha ghe ọne eranlẹn, ọ da daghe ghe, eranlẹn ribhi ọne udu ẹwẹ igbẹn, ọkpakinọn, ọne udu ẹwẹ igbẹn bhọ itoa. 3 Bhiriọ Moses da yọle: “Mhẹn dẹ sikẹ ọle nin mhẹn fẹ ọne emhin ọhan-ilo nan ghe nọnsẹn, nin mhẹn daghe ebezẹle nin ọne udu ẹwẹ igbẹn nan bha da toa.” 4 Jehova ki kere ghe Moses khian nọn dọ fẹ ọle ghe, Osẹnobulua da nabhi ẹkẹ ọne udu ẹwẹ igbẹn datie ole yọle: “Moses! Moses!” Ọ da wannien yọle: “Ghẹ mhẹn bhi enan.” 5 Ọ ki da yọle: “Hẹi sike ọle gbera ọnin. Ne ibata sibhi oẹ nọnsẹ re, ranmhude ọtọ nin uwẹ nan mundia, otọ nọn khiale nọn.” 6 Ọ da sẹyẹ yọle: “Imhẹn hi Osẹnobulua nọnsi aba ẹ, Osẹnobulua ọsi Abraham, Osẹnobulua osi Isaac, bi Osẹnobulua ọsi Jacob.” Moses ki da mun elọ nọnsọle nẹhe, ranmhude ofẹn mun ọlẹn nin ọle rẹ ghe Osẹnobulua nin ẹmhọanta. 7 Jehova da yẹ yọle: “Mẹn manman daghe oya nin ẹbho nesẹmhẹn ne ribhi Egypt ye, mẹn họn usomhin nọnsele ranmhude ẹbho ne re ele miẹn ẹsọn igbọn; mẹn manman lẹn ọbalọ nin ele ye. 8 Mẹn dẹ ha khian enin dọ miẹn ele fan bhi ọbo ọsi ibhokhan Egypt, sẹyẹ ne ele sibhi ọne otọ nin re ha khian otọ nọn mhẹn, otọ nọn bhiabhia, otọ nin miliki bi amẹnlọn vuọnlẹn, otọ ọsi ibhokhan Canaan, ibhokhan Heth, ibhokhan Amorites, ibhokhan Perizzites, ibhokhan Hivites, bi ibhokhan Jebus. 9 Ejayenan nian! Mhẹn họn usomhin ọsi ibhokhan Israel, mhẹn sẹyẹ daghe uwedẹ ọbe nin ibhokhan Egypt rẹ ha dẹnyẹnnyẹn ele. 10 Vae, mhẹn dẹ je ẹ bu iPharaoh, uwẹ de ne ibhokhan Israel nin ẹbho nesẹmhẹn sibhi otọ Egypt re.” 11 Ọkpakinọn, Moses da taman Osẹnobulua ọsi ẹmhọanta yọle: “Họla hi mẹn, nin mẹn ha da bu iPharaoh dọ ne ibhokhan Izrẹl sibhi Egypt re?” 12 Rẹji ọnan o da yọle: “Mhẹn dẹ ha ribhi ikeke ẹ, ọnan iyaman nin uwẹ ha rẹ lẹn ghe imhẹn je ẹ: Uwẹ ha ne ene ẹbho sibhi Egypt re fo, bha dẹ dọ ga Osẹnobulua nin ẹmhon-ata bhi ọne ukoke nan.” 13 Moses ki da taman Osẹnobulua nin ẹmhọanta yọle: “Ahamiẹn mhẹn bu ibhokhan Israel dọ taman ele yọle, ‘Osẹnobulua ọsi aba bha odede je imhẹn bu bha,’ ele ha ki yi mhẹn, ‘Be hi elin ọlẹn?’ Be imhẹn ha taman ele yẹ?” 14 Bhiriọ Osẹnobulua da taman iMoses yọle: “Mẹn Dẹ Kiẹn Ebi Mẹn Guanọ Nin Mẹn Kiẹn.” Ọle da yẹ yọle: “Ọnan hi ebi uwẹ ha taman ibhokhan Israel, ‘Mẹn Dẹ Kiẹn, ọle je imẹn bu bha re.’” 15 Osẹnobulua da sẹyẹ taman iMoses yọle: “Ọnan hi ebi uwẹ ha taman ibhokhan Israel, ‘Jehova nin Osẹnobulua ọsi aba bha odede, Osẹnobulua ọsi Abraham, Osẹnobulua ọsi Isaac, bi Osẹnobulua ọsi Jacob, ọle je mhẹn bu bha.’ Ọnan hi elin nọnsẹmhẹn rẹ ha khian ighegheghe, inian a ha rẹ ha ye mhẹn re rẹ nanbhi ore rẹ sẹbhi ore. 16 Ejayenan, akhian, dọ si ene ewanlẹn ọsi ibhokhan Israel koko, uwẹ ha taman ele yọle, ‘Jehova nin Osẹnobulua ọsi aba bha odede zegbere man mhẹn, Osẹnobulua ọsi Abraham, Isaac, bi Jacob, ọle da yọle: “Mhẹn gene gbẹlokotọ bhi egbe bha, daghe ebi ele khian bha yẹ bhi Egypt. 17 Ranmhude ọnan zẹ mhẹn yọle, mhẹn dẹ ne bha sibhi oya re nin bha ye bhi obọ ọsi ibhokhan Egypt, mhẹn ki ne bha ha khian otọ ọsi ene Canaan, ene Heth, ene Amorites, ene Perizzites, ene Hivites, bi ene Jebus, otọ nin miliki bi amẹnlọn vuọnlẹn.”’ 18 “Ele dẹ gene ka uwẹ ehọ. Uwẹ bi ene ewanlẹn ọsi Israel, bha bu ojie ọsi Egypt, bha ha taman ọlẹn ghe: ‘Jehova nin Osẹnobulua ọsi ibhokhan Hebrews ne mhan talọ. Bhiriọ, huẹan, ji mhan da khian okhian nọn ha re mhan ikpẹde ea nanbhi ẹkẹ ẹgbo, nin mhan da sabọ zọẹse ji Jehova nin Osẹnobulua nọnsẹmhan.’ 19 Imhẹn tobọmhẹn ka lẹn khẹ ghe, ọnojie ọsi Egypt ida ji bha da ha khian sade a bha da re obọ nọn kaka mun ọlẹn. 20 Bhiriọ, mhẹn dẹ niẹn obọ nọnsẹmhẹn an rẹ gbe Egypt, rẹ nanbhi emhin ọhan-ilo kẹkẹ nin mhẹn ha lu bhi enin, ọnan ha ki fo, ọle ki ji bha da ha khian 21 Mhẹn dẹ ji ibhokhan Egypt re ẹlo nọn mhẹn rẹ ha ghe ene ẹbho, ẹghe ha sẹ nin bha rẹ kpanọ, aida miẹn ebezẹle bha re obọbọ kpanọ. 22 Ọdeọde bhi ene ikhuo ki taman ene diake ele bi ene nyẹn bhi uwa nọnsele, nin ele ne siliver bi golu deba ukpọn nin ele. Bha ha ne yọ imọn ikpea bi imọn ikhuo nesẹbha; bha dẹ miẹn ibhokhan Egypt emhin nin ele mhọnlẹn.”