Exodus

20 Bhiriọ, Osẹnobulua da ta ene ọta nan: 2 “Imẹn hi Jehova nin Osẹnobulua nọnsẹbha, nọn ne bha sibhi otọ Egypt re, nọn ne bha sibhi igbọn re. 3 Bha hẹi ha mhọn osẹ ebhebhe deba mẹn. 4 Bha hẹi man amanzẹ soso nin egbe bha, la emhin soso nọn khọkhọ ebe ribhi okhun la emhin nọn khọkhọ ebe ribhi ọne uke otọ nan, la ebe ribhi ẹkẹ amẹn. 5 Bha hẹi deuhọnmhọnre nin ele. Bha hẹi ji ọle ha yẹẹ bha rẹ ha ga ele, ranmhude imẹn nin Jehova nin Oṣenobulua bha, Osẹnobulua nọn ho nan ha ga ọle ọkpa mẹn khin, nọn ranmhude olukhọ nọnsi aba re oya nin imọn rẹ dọ sẹbhi ore nọnzi ea bi ore nọnzi enẹn ọsi ene he imẹn, 6 Ọkpakinọn, asun-rẹkhan nin ahoẹmhọn-egbe ye, ọle mẹn rẹ nin ore ọsi ene hoẹmhọn mẹn, bi ene re obọ rẹkhan uhi nesẹmhẹn lu emhin. 7 “Hẹi noo elin nọnsi Jehova nin Osẹnobulua nọnsẹ bhi uwedẹ nọn bha gba, ranmhude, a ida miẹn ghe Jehova bha re oya nin ọria nọn noo elin Nọnsọle bhi uwedẹ nọn bha gba. 8 “Ye ukpẹdẹ iSabbath re nin uwẹ da ha ghe ọle bii ukpẹdẹ nọn khiale. 9 Ikpẹdẹ ehan uwẹ ha rẹ wẹnna yẹ miẹnsọn nesẹ rebhe. 10 Sokpan, ukpẹdẹ nọnzi ihinlọn ki ha yi ukpẹdẹ isabbath rẹji Jehova nin Osẹnobulua nọnsẹ. Uwe la ọmọn okpea nọnsẹ, la ọmọn okhuo nọnsẹ, la ọguọmhandia nọnsẹ nin okpea, la ọguọmhandia nọnsẹ nin okhuo, la emhin-uri nọnsẹ, la ọriọbhe nọn deba uwẹ nyẹnlẹn ida lu iwẹnna soso bhi ọne ukpẹdẹ nin. 11 Ranmhude, ikpẹdẹ ehan Jehova rẹ man otọ, okhun, okpẹdẹ, bi emhin rebhe ne ribhi ẹkẹ ele. Ọle da koahua bhi ukpẹdẹ nọnzi ihinlọn. Ọnan zẹle nin Jehova da nan erọnmhọn ọbhi ukpẹdẹ Sabbath yẹ re ọle kiẹn ukpẹdẹ nọn khiale. 12 “Mun ekpẹn nin aba ẹ bi inẹn ẹn, nin uwẹ da tọ bhi ọne oto nin Jehova nin Osẹnobulua nọnsẹ ha re nin uwẹ. 13 “Hẹi gbe ugbele. 14 “Hẹi gboghẹ. 15 “Hẹi ra. 16 “Hẹi sọsali ohoghe gbe idiake nọnsẹ sade a tiẹ uwẹ nin uwẹ dọ sọsali ọbhi ẹmhọn. 17 “Hẹi ji uwa nọnsi ibo uwẹ sa uwẹ bhi ẹlo. Hẹi ji okhuo ọle la ọguọmhandia nọnsọle nin okpea, la ọguọmhandia nọnsọle nin okhuo, la ẹmena nọnsọle, la ekẹtẹkẹtẹ nọnsọle, la emhin nọn irẹ khin nin ọle mhọn sa uwẹ bhi ẹlo.”