Exodus

19 Ọ wo ribhi uki ea nin ibhokhan Izrẹl sibhi otọ Egypt re, ele da sẹbhi ojẹgbo ọsi Siʹnai. 2 Ele da sibhi Rephʹi·dim re. Ele da sẹbhi ojẹgbo ọsi Siʹnai, yẹ mun agọ bhi ọne ojẹgbo. Ibhokhan Izrẹl da mun agọ bhi odalo ọne oke. 3 Moses da ha bu Osẹnobulua ọsi ẹmhọanta khian. Jehova da na bhi ọne oke so tie ọle, yẹ taman ọlẹn yọle: “Ọnan hi emhin nin uwẹ ha taman uwa nọnsi Jacob, yẹ taman ibhokhan Izrẹl, 4 ‘Ibha tobọbha daghe ebi mẹn lu da ibhokhan Egypt, nin mẹn da re igẹn ọsi oghohọn re mun bha, yẹ ne bha bu mẹn re. 5 Ejayenan nian, ahamiẹn ibha gene ka mẹn ehọ yẹ re obọ rẹkhan akovẹn nin mẹn deba bha ve, bha ki kiẹn ẹbho nesẹmhẹn ne daan mẹn bhi ẹwẹ ẹbho rebhe, ranmhude, imẹn nyan ọne otọ nan rebhe. 6 Bha ki kiẹn ijie bi ohẹn, bi agbaẹbho nọn khiale rẹji mẹn.’ Enan hi ẹmhọn nin uwẹ ha taman ibhokhan Izrẹl.” 7 Bhiriọ, Moses da ha khian dọ tatie ene ewanlẹn ọsi ene ẹbho, yẹ taman ele emhin rebhe nin Jehova taman ọlẹn. 8 Ọnin ki gbera, ene ẹbho da kugbe wanniẹn ọlẹn yọle: “Mhan dẹ lu emhin rebhe nin Jehova tale.” Moses da jẹje dọ taman iJehova ewanniẹn ọsi ene ẹbho. 9 Jehova da taman iMoses yọle: “Ghọle! Mẹn dẹ na bhi adudu amẹn nọn so ebiuki a bu uwẹ re, beji a ha da miẹn ene ẹbho ki họn ẹghe nin mẹn ha rẹ ha ne uwẹ talọ. Bhiriọ, ele ki sabọ yẹ ha mhọn urẹọbhọ da uwẹ.” Moses da ki taman iJehova ebi ene ẹbho tale. 10 Jehova da ki taman iMoses yọle: “Ha khian dọ kpe ene ẹbho khia ẹlẹnan bi akhọ. Ele ki yẹ họ ukpọn nọnsele. 11 Ele ki mun egbe ọbhi otọ khẹ ukpẹdẹ nọnzi ea, ranmhude, bhi ọne ukpẹdẹ nọnzi ea, Jehova dẹ vae bhi uke oke ọsi Siʹnai bhi isira ene ẹbho rebhe. 12 Uwẹ dẹ gbe ogba nẹga ọle nin ene ẹbho, yẹ taman ele yọle, ‘Bha mhọn ẹwan nin bha hẹi diọ bhi ọne oke, la re obọ so ọne ogba. Ọnọn hi ki rẹ khin nọn re obọ so ọne oke, a dẹ gbe ọle a. 13 Ọria ida re obọ so ọle. Sokpan, ido-ido la ufẹnmhẹn a da rẹ gbe ọle a. Aharẹmiẹn elanmhẹn nọn la ọria, a dẹ gbe ọle a.’ Sokpan, ele sabọ rẹ vae bhi uke ọne oke sade ele họn a khue akala.” 14 Moses da ki huẹnre bhi uke ọne oke bu ene ẹbho. Ọle da munhẹn ha kpe ene ẹbho khia. Ele da họ ukpọn nọnsele. 15 Ọle da taman ene ẹbho yọle: “Bha mun egbe khẹ ukpẹdẹ nọnzi ea. Bha rẹban inegbenowẹ.” 16 Ọsewewiẹ bhi ukpẹdẹ nọnzi ea, avan-okhun da ha de, anyan da rẹkhan ọlẹn. Adudu amẹn da ribhi okhun ọne oke. A da yẹ ha họn usomhin ọsi akala nọn manman ha ro. Ẹbho rẹbhe ne ribhi ọne agọ da ha guọ. 17 Moses da ki ne ene ẹbho sibhi ọne agọ re yẹ ne ele bu Osẹnobulua ọsi ẹmhọanta. Ele da mundia bhi otọ ọne oke. 18 Oke ọsi Siʹnai da ha zẹ ighogho, ranmhude, eranlẹn iJehova rẹ vae bhi okhun ọlẹn; ighogho nọn ha zẹ dagbare bhọ da ha zẹ dio bhi okhun bọsi ighogho nọn zẹ dagbare bhi eji a da kuẹ eranlẹn. Ọne oke rebhe da manman ha lueghe. 19 Beji usomhin ọsi ọne akala rẹ manman ha si okhun, Moses da talọ, urulu nọnsi Osẹnobulua ọsi ẹmhọanta da wanniẹn ọlẹn.