Exodus

21 “Enan hi ene uhi nin mẹn gbe, nin uwẹ ha taman ibhokhan Izrẹl: 2 “Ahamiẹn uwẹ dẹ obhi Hebrew bọsi igbọn, ọle ki ga uwẹ na bhi ikpe ehan, sokpan, bhi ukpe nọnzi ihinlọn, uwẹ ki fan ọlẹn fia ọsọhẹ. Ọle ida ha uwẹ emhin soso. 3 Ahamiẹn ọle ọkpa vae, ọle ọkpa ki kpanọ. A ha ki miẹn ọle bi okhuo ọle kugbe vae, okhuo ọle dẹ rẹkhan ọlẹn kpanọ. 4 Ahamiẹn ebeanlẹn ọlẹn, ọle re okhuo nanlẹn, nin onẹ okhuo da biẹ imọn ikpea la imọn ikhuo nanlẹn, ọne okhuo bi ene imọn ki kiẹn ọsi ebeanlẹn ọlẹn, ọle ọkpa ki kpanọ. 5 Sokpan, ahamiẹn ọne igbọn da yọle: ‘Mẹn hoẹmhọn ebeanlẹn mẹn, okhuo mẹn, bi imọn ikpea nọnsẹmhẹn; mẹn bha guanọ nan fan mẹn fia,’ 6 ebeanlẹn ọlẹn ki mun ọlẹn vae bhi odalo Osẹnobulua ọsi ẹmhọanta. Ọle ki mun ọlẹn vae bhi isi odẹ la isi eran-odẹ. Ebeanlẹn ọlẹn ki re agbede rẹ ha uhio ọle bhi ehọ. Bhiriọ, ọle ki kiẹn ọguọmhandia nọnsọle rẹ ha khian. 7 “Ọria ha khiẹn ọmọn okhuo nọnsọle bọsi igbọn, a ida fan ọne ọmọn okhuo fia beji a rẹ fan okpea nan rẹ lu igbọn fia. 8 Ahamiẹn ẹmhọn ọlẹn bha ti ebeanlẹn ọlẹn bhọ, nin ọle bha da re ọle ọbhi ihe ọsi ọshọ, ọle ida sabọ khiẹn ọlẹn nin eriọbhe aharẹmiẹn ọle guanọ nin ọle khiẹn ọlẹn, ranmhude, emhin nọn lu ọle le bha gba. 9 Ọle ha ki rẹ ọle nin ọmọn okpea nọnsọle nin ọle ha yi okhuo ọle, ọle ki ha re obọ nin ọle rẹ mun imọn ikhuo nesọle mun ọlẹn. 10 Ọle ha rẹ re okhuo ọbhebhe, ọle dẹ sẹyẹ ha ne ene emhin nan nin okhuo ọle nin ọhẹnhẹn bii ọnikhẹ: ebale, ukpọn, bi inegbenowẹ nọn khẹke ọle. 11 Ahamiẹn ọle bha muegbe nin ọle rẹ ha ne ene emhin ea nan nanlẹn, ọne okhuo ki kpanọ ọsọhẹ. Ọle ida ha ọle emhin soso. 12 “Ọria nọn irẹ khin nọn fi ọria emhin, nin ọne ọria da yu, a dẹ gbe ọle a. 13 Sokpan, ahamiẹn idobọ ọ rẹ sunu, nin Osẹnobulua ọsi ẹmhọanta da ji ọle sunu, mẹn dẹ rẹman uwẹ eji ọle ha sabọ nẹ diọ. 14 Ahamiẹn okpea khọẹkẹ ibo ọle, yẹ taan ẹlo a gbe ọle a, a ki gbe ọne okpea a, aharẹmiẹn ghe eji ukhuo izọese nọnsẹmhẹn ye bha da mun ọlẹn. 15 Ọnọn fi aba ọle la inẹn ọlẹn emhin, a ki gbe ọle a. 16 “Ọria ha do ọria mun, nan da kere ghe ọ mun ọlẹn mhọn, la ọ khiẹn ọlẹn, a ki gbe ọne ọria a. 17 “Ọnọn irẹ khin nọn ghunmhun aba ọle la inẹn ọlẹn, a ki gbe ọle a. 18 “Ahamiẹn ikpea eva ko van, nin ọkpa bhọ da fi ọnọnkẹle udo la etin, nin ọle bha da yẹ sabọ ha lu emhin soso arẹmiẹn ọle bha yu, ọnan hi emhin nọn ha sunu: 19 Ahamiẹn ọne ọria sabọ kpanọ ha re ukpokpo tẹ rẹ khian nẹga, a ida re oya nin ọne ọria nọn fi ọle emhin. Ẹghe nin ọle bha rẹ wẹnna ọkuẹsẹ egbe daan ọlẹn ọkpa ọnọn fi ọle emhin ha haosa ọi. 20 “Ahamiẹn ghe okpea re ukpokpo rẹ gbe ọguọmhandia nọnsọle nin okpea la ọguọmhandia nọnsọle nin okhuo, nọn da yu ọle bhi obọ, a dẹ sọ ọle ikhi. 21 Ọkpakinọn, a ha ki miẹn ọne igbọn sabọ sun sẹbhi ukpẹdẹ ọkpa la ikpẹdẹ eva, a ida sọ ọle ikhi, ranmhude, igho nọnsọle ọle rẹ dẹ ọle. 22 “Ahamiẹn ikpea ne egbe dan, nin ele da degbe okhuo nọn hanmhan, nin ọne okhuo da biẹ bhi ẹghe nin uki bha sẹ rẹ sẹ ọle, ọne ọria nọn degbe ọne okhuo dẹ ha oko nin ọdọ ọne okhuo ha hian ọlẹn le, sade ọne okhuo la ọne ọmọn bha yu. Ọle dẹ na bhi obọ ene bhohiẹn ha ọne oko. 23 Ọkpakinọn, ahamiẹn ọne okhuo la ọmọn nọnsọle yu, a ki yẹ gbe ọne ọria a, 28 “Ahamiẹn ẹmena re ukhaẹn nọnsọle rẹ ha okpea la okhuo, nin ọne ọria da yu, a ki re ido-ido rẹ gbe ọne ẹmena a, a ida le ekuọ ọle; a ida lu emhin soso da ọria nọn nyan ọne ẹmena. 29 Ọkpakinọn, ahamiẹn ẹghe-ẹghe ẹmena rẹ guanọ nọn re ukhaẹn nọnsọle rẹ ha ọria, nan da gbuhi nin ọnọn nyan ọne ẹmena, nin ọle bha da gbe ogba ga ọle, nọn da dọ gbe okpea la okhuo a, a ki re ido-ido rẹ gbe ọne ẹmena a. A ki yẹ gbe ọnọn nyan ọne ẹmena a.