Genesis
18 Akizẹbue, Jehova da re egbe man ọlẹn bhi ẹwẹ eran ne khua ne ribhi Mamʹre, ẹghe nin ọle rẹ dotua bhi unuro ọsi ibọkpọ nọnsọle bhi ẹghe nin ovuẹn rẹ manman zẹ. 2 Ọle da khua ẹlo okhun yẹ daghe ikpea ea ne mundia bhi eje bha ree gbe bhi eji ọle ye. Ọle ki daghe ele, ọle da na bhi unuro ọsi ibọkpọ nọnsọle runẹ bu ele, ọle da yẹ deuhọnmhọnre nin ele. 3 Ọle da yọle: “Jehova, ahamiẹn ghe uwẹ re ẹlo esili ghe mẹn, huẹan, hẹi gbera odibo nọnsẹ. 4 Huẹan, ji mẹn sa obhi amẹn khere re, nin bha kpe oẹ a. Ẹghenin, bha ki dotua bhi odotọ ọne oran nan 5 Beji a miẹn ibha bu odibo nọnsẹbha re bhi enan, bha ji mẹn re obhi ebale re, nin bha rẹ mun egbe mhọn. Ẹghenin, ibha sabọ ha khian eji bha khian.” Ele da ki yọle: “Ọmhẹn khiriọ. Uwẹ sabọ lu emhin nin uwẹ tale.” 6 Bhiriọ, Abraham da jẹje bu iSarah bhi ẹkẹ ibọkpọ yẹ taman ọlẹn yọle: “Jẹje, maan ukpu ea ọsi emhin nan nọ sun nan rẹ lu ibrẹdi, fun ọlẹn, uwẹ ha re ọle lu ibrẹdi.” 7 Abraham ki ta ọnin fo, ọle da runẹ diọ bhi eji emhin uri nesọle ye, ọle da guanọ usasa ẹmena nin egbe gba nan. Ọle da mun nin ọguọmhandia nọnsọle. Ọne oguọmhandia da jẹje nyẹn ọlẹn. 8 Abraham da mun ibutter, miliki bi ọne usasa ẹmena nan nyẹn nin ele. Ọle da mundia sikẹ ele bhi odotọ ọne oran beji ele rẹ ha le ọne ebale. 9 Ele da nọọn ọlẹn yọle: “Sarah nin okhuo ẹ bho?” Ọle da yọle: “Ọ ribhi ẹkẹ ibọkpọ.” 10 Ọkpa bhi ẹwẹ ele da yọle: “Isẹnan bhi ukpe nọn vade, mẹn dẹ gene fikie bu uwẹ re, ghọle! Sarah nin okhuo ẹ dẹ biẹ ọmọn okpea.” Bhi ejayenan, Sarah da na bhi unuro ọsi ibọkpọ nọn ha ribhi ikeke ọne okpea ha kaehọ. 11 Abraham bi Sarah ki wo dọmanlẹn; ele ki manman wanre. Sarah bhọ iyẹ mun obọ mhọn. 12 Bhiriọ, Sarah da ha jẹ yọle: “Imẹn nọn ki kiẹn ọmanlẹn fo, nin ebeanlẹn ọlẹn yẹ dọmanlẹn dẹ gene miẹn ọnyẹnmhẹn nọn sẹnian?” 13 Jehova da ki nọọn Abraham yọle: “Bezẹle nin Sarah da jẹ yọle, ‘Mẹn dẹ gene biẹ ọmọn arẹmiẹn ghe mẹn dọmanlẹn fo?’ 14 Emhin soso be ribhọ nọn kaka gbe nin Jehova? Mẹn dẹ fikie bu uwẹ re bhi ọne ẹghe nan ukpe nọn vade, ẹghenin, Sarah dẹ biẹ ọmọn okpea.” 15 Ọkpakinọn, Sarah da ha sin yọle, “Mẹn bha jẹ!” ranmhude ofẹn da ha mun ọlẹn. Ọle da ki yọle: “Ehe! Uwẹ jẹ.” 16 Ẹghe nin ene ikpea ki rẹ kpanọ mundia nin ele ha khian, ele da ghe obọ ọsi Sodʹom. Bhi ọne ẹghe nan, Abraham da ha hoho ele khian. 17 Jehova da yọle: “Mẹn dẹ be re ebi mẹn ho nin mẹn lu he nin Abraham? 18 Abraham dẹ gene kiẹn agbaẹbho nọn khua. Sẹyẹ, rẹ na obọ ọle agbaẹbho rebhe ha da miẹn erọnmhọn. 19 Ranmhude, mẹn dọ lẹn ọlẹn, beji a da miẹn ghe ọle ki gbe uhi nin imọn nesọle bi azagba-uwa nọnsọle nin ele khian rẹkhan uwedẹ nọnsi Jehova, yẹ ha lu emhin nọn gbale bi emhin nọn diale, beji a da miẹn ghe Jehova ki sabọ mun ive nin ọle ve rẹji Abraham sẹ.” 20 Bhiriọ, Jehova da yọle: “Usomhin nan wo ha so da Sodʹom bi Go·morʹrah wo manman ha khọ ọbhọ, sẹyẹ, ele wo manman ha lu olukhọ. 21 Mẹn dẹ ha khian dọ fẹ ọle ghe si emhin nin ele lu gene diẹn mun emhin nin mẹn họn rẹji ele. Sade ọ iyi iriọ, mẹn ki dọ lẹn.” 22 Ene ikpea da sibhi enin re ha khian obọ ọsi Sodʹom, sokpan, Jehova da sẹyẹ ne Abraham dia. 23 Abraham da ki sikẹ ọle yẹ yọle: “Uwẹ dẹ gene fuẹn eria ne khiale a deba eria ọbe? 24 Ahakimiẹn ghe itue 50 ne khiale ribhi ọne agbaẹbho? Uwẹ dẹ sẹyẹ fuẹn ele a? Uwẹ ida be rẹhunmhan ọne agbaẹbho ranmhude ene itue 50 ne khiale ne ribhi ẹkẹ ọle? 25 Awaa! uwẹ ida sabọ re inian lu emhin, ghe uwẹ ki gbe ọria nọn khiale a deba ọria ọbe, nin elele ọsi ọria nọn khiale bi ọria ọbe ha yi ọkpa! Awaa! Uwẹ ida re iriọ lu emhin. Uwẹ nin Ọbhuohiẹn ọsi ọne otọ nan rebhe ida be lu emhin nọn diale? 32 Bhi ọkike ọle, ọle da yọle: “Jehova, huẹan wowo, hẹi ji ohu re uwẹ, sẹyẹ re otọ nin mẹn rẹ talọ osukpa ọkpa: Ahakimiẹn ghe itue igbe ribhi ọne agbaẹbho? Ọle da wanniẹn ọlẹn yọle: “Ranmhude ene itue igbe, mẹn ida fuẹn ọlẹn an.”