Ẹzaya

61 Ẹlinmhin nọnsi Jehova Nin Ebeanlẹn Nọn Ke Okhun Nẹ ne mẹn,

Ranmhude Jehova zẹ mẹn nin mẹn dọ wewe ọta nọn mhẹn man eria ne mhọn ẹkẹ-omẹnhiẹn.

Ọle je imẹn nin mẹn dọ re ikoudure nin ẹbho nin udu nọnsele wanọ a,

Nin mẹn dọ wewe ọle man ene a muno ghe, a dẹ fan ele fia,

Nin mẹn dọ wewe ọle ghe, ene ribhi ighan dẹ manman ha daghe,

 2 Nin mẹn dọ wewe ọle ghe, ẹghe nin Jehova ha rẹ re itohan man,

Bi ukpẹdẹ nin Osẹnobulua nọnsẹmhan ha rẹ re ohu nọnsọle man vae,

Nin mẹn do re ikoudure nin ọrebhe ne lu akhiẹ,

 3 Nin mẹn gbẹloghe ene lu akhiẹ ranmhude Zaiyọn,

Nin mẹn re ugbaneto nin ele, nin ele rẹ gbanọ eto, beji ele ha da zobọ bhọ rẹ ha zẹ ẹmun ọbhi uhọnmhọn,

Nin mẹn sa abhii nin ele nọn ha re ele ha ghọnghọn, nin ele hẹi yẹ ha lu akhiẹ.

Nin mẹn re ukpọn nin ele, nin ele rẹ ha gẹn Osẹnobulua, nin ele hẹi yẹ ha kiẹgbe.

A dẹ ha tie ele udede eran ranmhude iluemhin-nọnsẹn nọnsele,

—Udede eran nin Jehova kọle, rẹ ha re uyi ji egbọle.

 4 Ele dẹ kie bọn agbaẹbho nan rẹ dunmhun an bhi ẹghe ẹdẹlẹ;

Ije kẹkẹ nan rẹ dunmhun an bhi ẹghe ẹdẹlẹ, ele dẹ kie bọn ele,

Sẹyẹ, ele ki kie bọn agbaẹbho kẹkẹ nan dunmhun sotọ,

Rẹ sẹbhi ije kẹkẹ nin ẹbho i yẹ da nyẹnlẹn bhi ore ne bunbun ne gbera.

 5 “Eriọbhe ki vae dọ ha sun ihuan nesẹbha,

Sẹyẹ, erunmhunyẹn ki ha yi ene gbẹloghe ugbo nọnsẹbha bi ene wẹnna bhi ugbo eran anyọn nọnsẹbha.

 6 Bhi ọsẹbha, a dẹ ha tie ibha ohẹn nesi Jehova;

A dẹ ha tie ibha ene wẹnna nin Osẹnobulua nọnsẹmhan,

Bha dẹ ha noo afe bi ua ọsi ene agbaẹbho,

Sẹyẹ, bha ki ha re ene afe bi ua nin bha miẹn ele le rẹ dẹgbọ.

 7 Mẹn dẹ nan erọnmhọn ba erọnmhọn nin ẹbho nesẹmhẹn, ẹkhọle i yẹ da ha lo ele,

Ele dẹ ha re eghọnghọn so dagbare ranmhude erọnmhọn nan nan nin ele, ele i yẹ da miẹn iregbebhunun.

 8 Imẹn nin Jehova, ibhuohiẹn nọn gbale yẹẹ mẹn,

Sokpan, nan rẹ ha gbe ọria miẹn ọlẹn emhin bi nan rẹ ha lu ebe i mhẹn sọnnọn mẹn.

Bhiriọ, mẹn dẹ re ihaosa nin ele beji mẹn vele,

Sẹyẹ, mẹn dẹ deba ele ve akovẹn nọn da ha ribhọ rẹ ha khian ighegheghe.

 9 A dẹ lẹn imọn nesele bhi ẹwẹ ene agbaẹbho;

A ki yẹ sẹ ele ẹlo bhi agbaẹbho kẹkẹ.

Ọrebhe ne daghe ele ki lẹn ghe,

Imọn ọsi ẹbho nin Jehova nan erọnmhọn nan ele khin.”

Ranmhude ọle re ukpọn ọsi umiẹnfan rẹ hin mẹn,

Ọle re awegbe* ọsi ikhiale yọ mẹn,

Bọsi okpia nọn khian dọ re okhuo, nọn gbanọ eto bọsi ohẹn,

Bi bọsi okhuo nọn khian dọ bọ ọdọ, nọn noo emhin kẹkẹ nan rẹ ho ose rẹ ho egbe ọle ose.

11 Beji emhin re jẹre bhi otọ,

Bi beji ebi a kọle bhi ugbo rẹ jẹre,

Iriọ Jehova Nin Ebeanlẹn Nọn Ke Okhun Nẹ ha rẹ lu ọle

Nin ẹbho ha lu emhin ne gbale, yẹ gẹn elin nọnsọle bhi isira ene agbaẹbho.