Ẹzaya

 2 Ghọle! Ijerebhe bhi otọ dẹ so ebiuki a,

Ojobi dẹ gugu agbaẹbho kẹkẹ;

Ọkpakinọn, Jehova dẹ ha bhala nyan uwẹ,

A ki ha daghe uyi nọnsọle bhi egbe nọnsẹ.

 3 Ene agbaẹbho dẹ vae bhi eje ẹfua nọnsẹ ye,

Sẹyẹ, enijie ki vae bhi eji ẹfua ọsi ukpa nọnsẹ nọn manman bhala ye.*

Imikpia nesẹ nabhi eje manman ree vade,

A yẹ mun imikhuo nesẹ khua bhi efẹn ha vade.

 5 Uwẹ dẹ daghe ọnan bhi ọne ẹghe nin yẹ manman ha ghọnghọn.

Ọkhọle nọnsẹ ki ha sọnyẹnmhẹn, sẹyẹ, eghọnghọn ki gbe uwẹ udu a,

Ranmhude uwẹ dẹ ha miẹn ẹfe nan miẹn bhi okpẹdẹ;

Ẹfe bi ua ọsi ene agbaẹbho ki ha bu uwẹ re.

 6 Usun ne bunbun ọsi kẹtẹkẹtẹ nesi ibhokhan Midian bi Ifah

Dẹ vuọn otọ nọnsẹ,*

Ẹbho rebhe ne ribhi Shiba dẹ vae;

Ele dẹ muno igolu bi frankisẹns rẹkhan egbe vae.

Mẹn dẹ re obọ bhọ nan rẹ ha re ele zọese bhi ukhuo-izọese nọnsẹmhẹn,

Mẹn dẹ re uwa nọnsẹmhẹn nọn mhọnse kie manman ha mhọnse.

 8 Hela khenan ne vade bọsi adudu amẹn,

Bọsi idulu ne tin khian akolo* nọnsele?

 9 Imẹn ẹbho ne ribhi otọ nin ẹdẹ nẹga da ha khuaẹloghe;

Okọ ọsi Tashish ke odalo, nin ele dọ nabhi eje reele muno imikpia nesẹ re,

Ele bi isiliva bi igolu nesele,

Beji ele ha da vae dọ ha re ogẹn ji elin nọnsi Jehova nin Osẹnobulua nọnsẹ

Bi Ọnọn Khiale Ọsi Izrẹl,

Ranmhude ọle dẹ re uyi* nin uwẹ.

10 Eriọbhe dẹ bọn ogbe nesẹ,

Sẹyẹ, enijie nesele ki ha ga uwẹ.

Ranmhude ẹkẹ nọn ha khọ mẹn zẹle nin mẹn da gbehẹ uwẹ,

Sokpan, ranmhude ọmhẹn nọnsẹmhẹn, mẹn dẹ mhọn itohan da uwẹ.

11 A dẹ wo ha tuje igeti nesẹ ọbhi otọ ẹghe rebhe;

A i da ha khue ele asọn la odanmhẹn,

Beji a ha da ha muno ẹfe ọsi ene agbaẹbho ji uwẹ;

Ijie nesele hi ene ha mun ọkalo rẹ ha muno ele re.

12 Agbaẹbho la ejele nọn hi ki rẹ khin nọn bha ga uwẹ dẹ fuẹn an,

Sẹyẹ, a ki dunmhun ene agbaẹbho a sẹsẹsẹ.

13 A dẹ ne emhin ne mhẹn nẹ ọsi Lebanọn ji uwẹ,

A dẹ ne eran junipa, eran ash, bi eran saiprẹs* ji uwẹ,

Nin uwẹ rẹ ho eje khiale nọnsẹmhẹn ose;

Mẹn dẹ re eji mẹn ne oẹ ọi manman ha mhọnse.

14 Imọn ọsi ene ha denyẹnyẹn uwẹ dẹ bu uwẹ re yẹ deuhọnmhọnre nin uwẹ.

Ọrebhe ne bha mun ekpẹn nin uwẹ ki debhẹre nin uwẹ.

Ele ki ha tie uwẹ agbaẹbho ọsi Jehova,

Zaiyọn ọsi Ọnọn Khiale Ọsi Izrẹl.

15 Arẹmiẹn ghe imẹn zẹ uwẹ obọ, arẹmiẹn ẹbho he uwẹ, sẹyẹ, ọria soso i yẹ na uwẹ gbera,

Mẹn dẹ re uwẹ kiẹn ọne ẹbho da ha gẹn rẹ sẹbhi ighegheghe,

Ọnọn ha re ẹbho ha ghọnghọn rẹ na ore rẹ sẹbhi ore.

16 Agbaẹbho kẹkẹ bi ijie kẹkẹ dẹ re emhin rebhe nin uwẹ guanọ nin uwẹ,

Beji okhuo rẹ re inyẹn nin ọmọn nọnsọle nyẹn;

Bhiriọ, uwẹ ki dọ lẹn ghe imẹn nin Jehova, imẹn hi Ọnọn Miẹn Uwẹ Fan,

Sẹyẹ, Ọnọn Manman Mhọn Ahu Nin Osẹ Ọsi Jekop hi Ọnọn Dẹ Uwẹ Kiere.

17 Mẹn dẹ re igolu ọbhi ihe ọsi oze,

Mẹn ki yẹ re isiliva ọbhi ihe ọsi emantọn.

Mẹn dẹ re oze ọbhi ihe ọsi oran,

Mẹn ki yẹ re emantọn ọbhi ihe ọsi udo.

Mẹn dẹ re ọfure nin bha nọn ha sun bha,

Yẹ re ikhiale nin bha nọn ha gha ẹsọn nin bha.

18 A i yẹ da ha họn ẹmhọn okhọnlẹn bi ugbele bhi otọ nọnsẹ,

Sẹyẹ, a i yẹ da ha họn ghe a dunmhun emhin an, la riia emhin an bhi eji otọ nọnsẹ nale rebhe.

19 Ọ i yẹ yi oẹnlẹn da ha re ukpa nin uwẹ ọsodanmhẹn,

Sẹyẹ, ọ i yi ẹfua ọsi uki da ha re ukpa nin uwẹ,

Ranmhude Jehova dẹ ha yi ukpa rẹji uwẹ rẹ ha khian ighegheghe,

Uyi ọsi Osẹnobulua nọnsẹ dẹ re uwẹ ha mhọnse.

20 Oẹnlẹn nọnsẹ i da yẹ defia,

A i da miẹn ghe uki nọnsẹ bha yẹ bhala

Ranmhude, Jehova dẹ kiẹn ukpa rẹji uwẹ rẹ ha khian ighegheghe.

Sẹyẹ, ẹghe nin uwẹ rẹ ha lu akhiẹ ki gbera.

21 Ẹbho nesẹ rebhe dẹ ha lu emhin ne gbale,

Ele dẹ nyẹnlẹn bhi ọne otọ rẹ ha khian ighegheghe.

Ele hi ukhu ne jẹre bhi ebi mẹn kọle,

Iwẹnna obọ nesẹmhẹn ele khin nin mẹn ha rẹ re uyi nin egbe mẹn.

22 Ikpeta dẹ bun sẹbhi uli,

Ọnọn dia khere ki kiẹn agbaẹbho nọn khua.