Ẹzaya
6 Bhi ọne ukpe nin Uzaya nin ojie yu, mẹn da daghe Jehova dotua bhi ojukhuo nọn manman yoyo. Buluku nin ọle yọ da wo gue ijerebhe bhi ọne uwa oga. 2 Ene seraf* da mundia bhi odokhun uhọnmhọn nọnsọle; ọdeọde bhi ẹwẹ ele da ha mhọn igẹn ehan. Ọdeọde da re eva bhi ene igẹn gue ẹlo nọnsele, re eva gue oẹ, yẹ re eva ha tin nẹga.
3 Ọkpa da ha reso taman ọnọnkẹle yọle:
“Jehova nọn nyan ene eyokulo khiale, ọ khiale, ọ khiale.
Uyi nọnsọle vuọn otọ rebhe.”
4 Ene odẹ ne ribhi ene ununro da wo ha mun lueghe ranmhude ọne usomhin,* sẹyẹ, ighogho da wo vuọn ọne uwa oga.
5 Bhiriọ, mẹn da yọle: “Ọsẹmhẹn fo!
Imẹn wo diabe ọnọn yu,*
Ranmhude, ọta ne si mẹn bhi unun re bha khia,
Sẹyẹ, ẹwẹ ẹbho ne ta ọta ne bha khia mẹn da nyẹnlẹn;
Rẹ deba ọnin, mẹn daghe Jehova tobọle nin Ojie, nọn nyan ene eyokulo!”
6 Bhiriọ, ọkpa bhi ene seraf* da tin bu mẹn re. Ọle da re ujiọnmhẹn eranlẹn mhọn bhi obọ, nin ọle re emhin rẹ re bhi ukhuo-izọese. 7 Ọle da re ọne ujiọnmhẹn eranlẹn so mẹn bhi unun, yẹ taman mẹn yọle:
“Ghọle! Mẹn re ọle so uwẹ bhi unun.
A rẹhunmhan olukhọ nọnsẹ,
Sẹyẹ, a kpe olukhọ nọnsẹ kua.”
8 Imẹn da ki họn ukpuru nọnsi Jehova yọle: “Họla mẹn ha je? Họla ha yo nin mhan?” Bhiriọ, mẹn da yọle: “Ghe mẹn bhi enan! Je mẹn!”
9 Bhiriọ, ọle da ki taman mẹn yọle, “Ha khian dọ taman ene ẹbho nan yọle:
‘Ibha dẹ họn ọne uhọnmhunje igba ne bunbun,
Sokpan, bha i da lẹn otọ ọle;
Ibha dẹ daghe ọle igba ne bunbun,
Sokpan, bha i da ha mhọn ilẹnmhin soso.’
10 Re ọkhọle ọsi ene ẹbho gbin,
Lan ehọ nọnsele,
Uwẹ ha yẹ gue ele ẹlo.
Beji a ha da miẹn ghe, ele bha re ẹlo nọnsele daghe,
La re ehọ nọnsele họn ẹmhọn,
Sẹyẹ, beji a ha da miẹn ghe, ele i da sabọ re ọkhọle lẹn otọ ebi a tẹmhọnlẹn,
Yẹ fikie bu mẹn re nin mẹn da hinmhin ele.”
11 Bhiriọ, mẹn ki da nọọn yọle: “Eo Jehova, be ọ ha bue sẹ yẹ?” Ọle da yọle:
“Ọ dẹ bue sẹ ẹghe nan ha rẹ dunmhun ọne agbaẹbho a, ẹghe nan ha rẹ miẹn ghe ẹbho bha yẹ ha nyẹnlẹn bhọ,
Ẹghe nan ha rẹ miẹn ghe, ẹbho i yẹ ribhi ene uwa,
Sẹyẹ, ẹghe nin ọne otọ ha rẹ kiẹn otọ nan dunmhun an bi otọ nan mun fia;
12 Rẹ dọ sẹbhi ẹghe nin Jehova ha rẹ khu ikpia diọbhi eje manman ree,
Rẹ dọ sẹbhi ẹghe nin eji a dunmhun an bhi ọne otọ ha rẹ manman ha kpọnọ.
13 “Ọkpakinọn, ikpeta ẹbho* dẹ sẹyẹ ha nyẹnlẹn bhi ọne otọ. Ọrẹyiriọ, a dẹ sẹyẹ tuẹ ọle a. Bọsi eran nọn kpọnọ nan ha hian fia, ugungunmhun ọlẹn ki yẹ ha ribhi otọ, ugungunmhun ọlẹn dẹ ha ribhi otọ; ọ ki jiẹ ukhu nọn khiale.”*