Ẹzaya

5 Mẹn dẹ so illo ji ọne imẹn hoẹmhọnlẹn,

Illo rẹji ọne imẹn họemhọnlẹn bi ugbo eran anyọn nọnsọle.

Ọle da kọ ikperan anyọn ne mhẹn an bhọ,

Yẹ bọn uwa nan da khẹ ughe bhi adesẹ ọne ugbo,

Sẹyẹ, ọle da hian eji a da lu anyọn ọbhọ.

Bhiriọ, ọle da ha khẹ nin ebi ọle kọle mọn ikpẹ,

Sokpan, ọ ki mọn ikpẹ, ọ da mọn ikpẹ ne i mhẹn.

 3 Ọne imẹn hoẹmhọnlẹn da yọle: “Ibhokhan Jerusalẹm bi ikpia nesi Juda,

Bha bhuohiẹn imẹn bi ugbo nọnsẹmhẹn, bha ha tare ọnọn lu khọlọ.

 4 Be khẹke nin mẹn lu bhi ugbo eran anyọn nọnsẹmhẹn

Nin mẹn bha sẹ lu?

Bezẹle nan da miẹn ghe mẹn khẹ nọn mọn ikpẹ,

Ọ da dọ ha mọn ikpẹ ne i mhẹn?

 5 Bhi ejayenan nian, bha ji mẹn taman bha ebi mẹn ha lu da ọne ugbo nọnsẹmhẹn:

Mẹn dẹ vuno ene ogba sibhọre,

Yẹ tuẹ ele a sẹsẹsẹ.

Sẹyẹ, ọne ogbe nan re udo lu nẹga ọle,

Mẹn dẹ dunmhun ọlẹn an.

Bhiriọ, a ki re idia ha nunu ọne ugbo.

 6 Imẹn dẹ re ọle kiẹn otọ nan mun fia;*

A i da hie ọle la gbẹn ọlẹn.

Ilunmhun bi igbẹn bi ikhiakhiọ ki vuọn ọlẹn,

Sẹyẹ, imẹn i da ji amẹn da rọ ọbhọ.

 7 Uwa ọsi Izrẹl, ọle hi ọne ugbo eran anyọn ọsi Jehova nọn nyan ene eyokulo;

Ene ikpia nesi Juda, ele hi ebi a kọle nin ẹmhọn ele ti ọle bhọ.

Ọle da ha khẹ nin ele ha bhuohiẹn nọn gbale;

Sokpan, ele da ha bhuohiẹn eku;

Ọle da ha khẹ nin ele ha lu ẹbho nọnsẹn,

Sokpan, eviẹ ọsi ẹbho nan ha lu khọlọ ọle ki ha họn.”

 8 Ọkhọbhegbe hi ọsi ene ẹbho ne muno uwa ebhebhe ba ọsi ele.

Sẹyẹ, ọkhọbhegbe hi ọsi ẹbho ne muno otọ ebhebhe ba ọsi ele,

Rẹ sẹbhọ ghe, ẹbho nekẹle bha yẹ miẹn otọ noo.

Ele ọkpa ki nyẹnlẹn bhi ọne otọ rebhe!

 9 Jehova nọn nyan ene eyokulo ve ihẹn ọbhọ ghe,

Uwa ne bunbun dẹ siẹn sotọ,

Arẹmiẹn ele kpọnọ yẹ mhọnse.

Ẹbho i yẹ da ha nyẹnlẹn bhọ.

10 Anyọn nọn ha vuọn ukodo nọn kpọnọ sẹ bii bat ọkpa,* ọle ọkpa a ha miẹn bhi ugbo eran anyọn nan mun bhi otọ nọn manman kpọnọ,*

Ebale nọn ha vuọn ifa* ọkpa, ọle ọkpa sẹsẹ a ha miẹn bhi ugbo nan kọ ikpẹ nọn vuọn homa* ọkpa ọi.

11 Ọkhọbhegbe hi ọsi ene ẹbho ne riọ bhi owe ọsewewiẹ dọ ha da anyọn,

Ne i re unun sibhi anyọn re, rẹ dọ sẹbhi ẹghe nin ebi ha rẹ lo, rẹ sẹbhi ẹghe nin ọne anyọn ha rẹ ha mun ele!

12 Ele noo afan, gita,

Okede, bi ufele rẹ khue illo bhi iluemhin nọnsele; ele yẹ da anyọn bhọ.

Ọkpakinọn, ele i gbẹlokotọ bhi emhin nin Jehova lu,

Sẹyẹ, ele i daghe iwẹnna obọ nọnsọle.

13 Bhiriọ, a dẹ muno ẹbho nesẹmhẹn ha khian imun

Ranmhude, ele i mhọn ilẹnmhin;

Ohanmhẹn dẹ ha gbe ikpia ne khua nesele,

Sẹyẹ, ohanmhẹn amẹn dẹ ha gbe ẹbho nesele rebhe.

14 Idin* bhia ba egbe,

Sẹyẹ, ọ manman tuje unun an;

Ẹbho* nin Jerusalẹm rẹ hio, ẹbho nesọle ne nyanagban, bi ẹbho nesọle ne duje

Dẹ nabhi ẹkẹ ọne Idin.

15 A dẹ faa okpia a,

Sẹyẹ, a dẹ re ekpẹn si okpia bhi egbe re.

Ene tẹngbemun, a dẹ re ekpẹn si ele bhi egbe re.

16 A dẹ ha gẹn Jehova nọn nyan ene eyokulo, ranmhude uwedẹ nin ọle rẹ bhuohiẹn;*

Osẹnobulua ọsi ẹmhọanta, Osẹ Nọn Khiale, dẹ re emhin ne gbale nin ọle lu rẹ rẹman ghe, Osẹ nọn khiale ọle khin.

17 Ene ihuan ki ha le ebale bọsi ghe otọ nọnsele ele ye;

Eriọbhe dẹ ha le ebale bhi ọne otọ nan ki mun fia, nin elanmhẹn ne le ebale nọnsẹn da rẹ ka ha nyẹnlẹn.

18 Ọkhọbhegbe hi ọsi eria ne bha ohoghe, ne re ohoghe rẹ si emhin ebe bi olukhọ nọnsele rẹkhan egbe,

Beji elanmhẹn rẹ re uri rẹ si awẹnẹwẹnẹ;

19 Ene yọle: “Ji Ọle tua lu iwẹnna nọnsọle;

Ji Ọle jẹje lu ọle, nin mhan da daghe ọle.

Ji iho ọsi Ọnọn Khiale Ọsi Izrẹl munsẹ

Nin mhan da lẹn ọlẹn!”

20 Ọkhọbhegbe hi ọsi ẹbho ne yọle ghe, emhin ebe, ọle emhin esili khin, emhin esili, ọle emhin ebe khin,

Ene re ebiuki kiẹn ẹfua, yẹ re ẹfua kiẹn ebiuki,

Bi ene re emhin nọn riala kiẹn emhin nọn lẹnlẹn, yẹ re emhin nọn lẹnlẹn kiẹn emhin nọn riala!

21 Ọkhọbhegbe hi ọsi ẹbho ne riale ghe ele wanlan gbe,

Ne yẹ riale ghe, ẹwanlẹn ribhi uwedẹ nin ele rẹ ghe emhin!

22 Ọkhọbhegbe hi ọsi ẹbho ne manman da anyọn

Bi ene ikpia ne manman fuẹlo ebi a rẹ re anyọn gua anyọn yẹ,

23 Ọkhọbhegbe yẹ hi ọsi ọria nọn fan ọluemhiebe fia, ranmhude emhin nan do re nanlẹn bhi ikeke.

Sẹyẹ, ọkhọbhegbe hi ọsi ọnọn bhuohiẹn gbe ọnọn khiale!

24 Ọnan zẹle nan ha da fuẹn ele a.

Ele dẹ diabe ilunmhun nan gbẹn ọlẹn ọgiagia ne kale nin eranlẹn tuẹ a,

Nin iniẹn nọnsele wea,

Nin eghọn nọnsele khakha kua bii ẹmun,

Ranmhude, ele fikekegbe uhi* nọnsi Jehova nọn nyan ene eyokulo,

Sẹyẹ, ele re ẹlo gbe ọta ọsi Ọnọn Khiale Ọsi Izrẹl a.

25 Ọnin zẹle nin Jehova da manman khọẹkẹ ẹbho nesọle,

Bhiriọ, ọle dẹ niẹn obọ nọnsọle a rẹ fi ele emhin.

Ene oke dẹ mun lueghe,

Ẹbho nan gbono a ki diabe iku bhi ughe.

Ranmhude ene emhin* nan rebhe, ẹkẹ bha sẹ fu ọle re,

Ọle sẹyẹ wo niẹn obọ nọnsọle a, nin ọle rẹ re oya nin ele.

26 Ọle re eran fiba bhi otọ rẹ lu aman, nin agbaẹbho nọn ribhi eje ree ha daghe ọle;

Ọle da fi ukpuhiele rẹ datie ele bhi eje ree nẹ bhi otọ, nin ele vae;

Ghọle! ele vade ẹjẹje.

Ugbakun nin ele rẹ gba akun sẹyẹ wo toto,

Sẹyẹ, uri nin ele rẹ gba ibata nọnsele bha tanọn an.

28 Ufẹnmhẹn nesele rebhe manman mun,

Uhẹn nọnsele rebhe kuẹnre.*

Inian atata-oẹ* ọsi akasi nesele diabe udo,

Sẹyẹ, awẹnẹwẹnẹ nọnsele manman nẹ bọsi okpahoho nọn manman ha fi.

29 Usomhin nọnsele diabe ọsi oduman;

Ele so bii usasa-oduman.*

Ele dẹ reso yẹ mun elanmhẹn nin ele ho nin gbe ele;

Ele ki mun ọlẹn kpanọ, ọnọn ha hinmhin ọlẹn bhi obọ ele i ribhọ.

30 Bhi ọne ukpẹdẹ nin, ele dẹ so nẹga ọne elanmhẹn nin ele mun

Beji okpẹdẹ rẹ wie.

Ọria nọn hi ki rẹ khin nọn ghe ọne otọ, ọbalọ bi ebiuki ọle ha daghe;

Ẹfua bhọ kiẹn ebiuki, ranmhude ene adudu amẹn.