Ẹzaya
37 Hẹzẹkaya nin ojie ki wo họn ọnan, ọle da nyanghan ukpọn nọnsọle a, yẹ re ukpon-akhiẹ hin egbe. Sẹyẹ, ọle da diọbhi uwa nọnsi Jehova. 2 Bhiriọ, ọle da je Ẹliakim nọn gbẹloghe uwa ọsi ọnojie, Shẹbna nin akọwe, bi ewanlẹn ọsi ene ohẹn bu Ẹzaya nin akhasẹ nin ọmọn nọnsi Emọnz. Ele da ne ukpọn-akhiẹ rẹ hin egbe yẹ bu Ẹzaya. 3 Ele da taman ọlẹn yọle: “Ọnan hi ebi Hẹzẹkaya tale, ‘Ukpẹdẹ ọsi ọkakale, ọsi ezuọzuọ,* bi ọsi ẹkhọle ọne ukpẹdẹ nan khin; ẹghe ubiẹmhin sẹle, ọkpakinọn, ahu i ribhọ nan rẹ tẹn egbe. 4 Bhiriọ, re ẹmhọn ọsi ene kẹre ne miuhọnmhọn ọbhi erọnmhọn. Asabọmiẹn Jehova nin Osẹnobulua nọnsẹ dẹ họn ọta ọsi Rabshakẹ, nin ebeanlẹn ọlẹn nin ojie ọsi Asiria je re nọn dọ re unun ji Osẹnobulua. Bhiriọ, Jehova nin Osẹnobulua nọnsẹ ki re ihaosa nanlẹn bhi ene ẹmhọn rebhe nin ọle tale.’”
5 Bhiriọ, eguọmhandia nesi Hẹzẹkaya nin ojie da bu Ẹzaya. 6 Ẹzaya da taman ele yọle: “Bha taman ebeanlẹn bha yọle, ‘Ọnan hi ebi Jehova tale: “Hẹi ji ofẹn mun uwẹ ranmhude ene ọta nin uwẹ họnlẹn, ene ọta nin eguọmhandia nesi ojie ọsi Asiria tale rẹ re unun ji mẹn. 7 Ghọle, mẹn dẹ re ọkhọle nọnsọle ria eria* beji a ha da miẹn ghe, ọle ha họn ẹmhọn, ọle ki fikie diọbhi otọ nọnsọle; sẹyẹ, mẹn dẹ lu ọle nan re agbada gbe ọle a bhi otọ nọnsọle.”’”
8 Rabshakẹ da họn ghe ojie ọsi Asiria sibhi Lekish re. Bhiriọ, ọle da fikie bu ọle, yẹ kere ghe ọle ne agbaẹbho ọsi Libna ha khọnlẹn. 9 Ojie ọsi Asiria da họn ghe, Tẹheka nin ojie ọsi Ẹtiopia mun okhọn bu ọle de. Bhiriọ, ọle da gbo kie je ukọ bu Hẹzẹkaya. Ọle da taman ene ukọ yọle: 10 “Ọnan hi ebi bha ha taman Hẹzẹkaya nin ojie ọsi Juda, ‘Hẹi ji Osẹnobulua nin uwẹ re udu tẹ hiẹ uwẹ, yẹ re uwẹ ha yọle: “Ojie ọsi Asiria i da sabọ khọn Jerusalẹm miotọ.” 11 Ghọle! Uwẹ họn ebi ene ijie nesi Asiria rẹ fuẹn ene agbaẹbho rebhe a yẹ. Uwẹ ọkpa a da be miẹnfan? 12 Osẹ ọsi ene agbaẹbho nin aba mẹn nin ẹdẹlẹ fuẹn an be sabọ miẹn ele fan? Agbaẹbho ọsi Gozan, Heran, Rizẹf, bi ibhokhan Idẹn ne rẹ ha nyẹnlẹn bhi Tẹl-asa ki bho? 13 Ojie ọsi Hemat, ojie ọsi Apad, bi ojie ọsi agbaẹbho ọsi Sẹfaveim, ojie ọsi Hina, bi ojie ọsi Iva ki bho?’”
14 Hẹzẹkaya da miẹn ene ukọ ene ebe yẹ tie ele. Hẹzẹkaya ki da diọbhi uwa nọnsi Jehova yẹ tan ene ebe ọbhi otọ man Jehova. 15 Bhiriọ, Hẹzẹkaya da nan erọnmhọn ji Jehova yọle: 16 “Eo Jehova nọn nyan ene eyokulo, nin Osẹnobulua ọsi Izrẹl, uwẹ hi ọnọn dotua bhi ojukhuo nọn ribhi uke ene chẹrob.* Uwẹ ọkpa sẹsẹ hi Osẹnobulua ọsi ẹmhọanta ọsi ejele rebhe ne ribhi ọne otọ nan. Uwẹ hi ọnọn man otọ bi okhun. 17 Eo Jehova, tan ẹlo a nin uwẹ daghe! Eo Jehova, gbehọkotọ kaehọ! Kaehọ ene ẹmhọn nin Sẹnakẹrib je re rẹ re unun ji uwẹ nin Osẹnobulua nọn nyẹnlẹn. 18 Eo Jehova, ẹmhọanta nọn ghe, ene ijie ne sẹ gbẹloghe Asiria wo fuẹn ene agbaẹbho rebhe a, rẹ sẹbhi otọ nọnsele. 19 Sẹyẹ, ele tuẹ osẹ ọsi ene agbaẹbho a bhi eranlẹn, ranmhude ele i gene yi osẹ, sokpan, iwẹnna obọ ọsi eria ele khin. Eran bi udo a rẹ lu ele. Ọnan zẹle nin ele da sabọ fuẹn ele a. 20 Eo Jehova nin Osẹnobulua nọnsẹmhan, hinmhin mhan bhi obọ ọle, beji a ha da miẹn ghe, ejele rebhe ne ribhi ọne otọ nan ki lẹn ghe, uwẹ ọkpa sẹsẹ hi Osẹnobulua, Eo, Jehova.”
21 Ẹzaya nin ọmọn nọnsi Emọnz ki da je ọne uhọnmhunje nan bu Hẹzẹkaya yọle: “Ọnan hi ebi Jehova nin Osẹnobulua ọsi Izrẹl tale, ‘Ranmhude uwẹ nan erọnmhọn ji mẹn rẹji Sẹnakẹrib nin ojie ọsi Asiria, 22 ọnan hi ebi mẹn nin Jehova tale rẹji ọle:
“Ọmokhuo ọsi Zaiyọn nọn bha sẹ hẹgẹn he uwẹ, sẹyẹ, ọle jiẹ uwẹ.
Ọmokhuo ọsi Jerusalẹm fieghe uhọnmhọn an ranmhude uwẹ.
23 Họla uwẹ re unun je yẹ ta ọta ne bha gba ọle bhi egbe?
Họla uwẹ si urulu okhun ha ne talọ?
Họla uwẹ ghe kọnyọọn?
Ọnọn Khiale Ọsi Izrẹl uwẹ lu ene emhin nan rebhe da!
24 Uwẹ da je eguọmhandia nesẹ re nin ele dọ ha re unun ji mẹn nin Jehova, yẹ yọle,
‘Mẹn dẹ noo awẹnẹwẹnẹ nesẹmhẹn ne bunbun nan rẹ yo okhọnlẹn
Rẹ hẹn oke ne yo nẹ
Ne ribhi Lẹbanọn.
Mẹn dẹ gia eran sida nesọle ne yoyo kua bi eran junipa nesọle ne mhẹn an.
Mẹn dẹ nabhi oke nesọle ne yo nẹ, bi ẹgbo nesọle ne ziẹn nẹ.
25 Mẹn dẹ tọnọ omin yẹ wọn amẹn;
Mẹn dẹ re atata-oẹ nesẹmhẹn rẹ ka ẹdẹ* ne ribhi Ijipt a.’
26 Uwẹ bha be sẹ họn? Rẹ na ẹghe ẹdẹlẹ a rẹ re ọle yi.
Rẹ na bhi ẹghe nọn gbera mẹn rẹ mhanmhan ọlẹn.
Bhi ejayenan nian, mẹn dẹ mun ọlẹn sẹ.
Uwẹ dẹ re ene agbaẹbho ne ziẹnlẹn rẹ kiẹn otọ nan dunmhun an.
27 Ene nyẹnlẹn bhọ i da sabọ lu emhin soso;
Ofẹn ki ha mun ele, sẹyẹ, a ki re ẹkhọle lu ele a.
Ele ki diabe ilunmhun bi emhin nan kọ bhi ugbo,
Sẹyẹ, ele ki diabe ilunmhun ne jẹre bhi okhun uwa, nin ahoho* nọn na bhi obọ ọsi isti* vae kaka a.
28 Mẹn lẹn ẹghe nin uwẹ rẹ dotua, ẹghe nin uwẹ rẹ dagbare, bi ẹghe nin uwẹ rẹ fikiere,
Sẹyẹ, mẹn lẹnmhin sade ẹkẹ mẹn khọ uwẹ,
29 Ranmhude, mẹn họn ghe uwẹ so-yo-so-re yẹ re ohu mẹn.
Bhiriọ, mẹn dẹ fi agbede* uwẹ bhi ihue, yẹ diẹn iri* nọnsẹmhẹn bhi ikpabunun nọnsẹ,
Sẹyẹ, mẹn ki dia uwẹ fikie rẹkhan uwedẹ nin uwẹ na vae.”
30 “‘Ọnan dẹ ha yi iyaman rẹji uwẹ:* Bhi ọne ukpe nan, uwẹ ki le ebe do jẹre;* bhi ukpe nọn vade, uwẹ ki le idojẹ ọsi ọne ukpe nan; ọkpakinọn, bhi ukpe nọnzi ea, uwẹ ki kọ emhin yẹ rọ ebi uwẹ kọle, sẹyẹ, uwẹ ki mun ugbo eran anyọn yẹ le ikpẹ nesọle. 31 Ene kẹre bhi ulin-uwa ọsi Juda ne miuhọnmhọn, dẹ diabe ebi a kọle nọn manman fino iniẹn mun otọ, nọn yẹ wo manman biẹ ebale. 32 Ikpeta ẹbho dẹ dagbare bhi Jerusalẹm, sẹyẹ ene miuhọnmhọn dẹ dagbare bhi Oke Ọsi Zaiyọn. Ọyaya Jehova nọn nyan ene eyokulo ha rẹ lu ọnan.
33 “‘Bhiriọ, ọnan hi ebi Jehova tale rẹji ojie ọsi Asiria:
“Ọle i da nabhi ẹkẹ ọne agbaẹbho nan,
La fi ufẹnmhẹn ọbhọ,
La mun ugue nan rẹ yo okhọn re bhọ,
La bọn emhin rẹ hẹn okhun ogbe mun okhọn bu ọle.”’
34 ‘Beji ọle rẹ vae, iriọ ọle ha yẹ rẹ fikie;
Ọle i da nabhi ẹkẹ ọne agbaẹbho nan.’ Iriọ Jehova tale.
35 ‘Mẹn dẹ gbega ọne agbaẹbho nan yẹ hinmhin ọlẹn ranmhude elin nọnsẹmhẹn
Bi ranmhude Devid nin ọguọmhandia nọnsẹmhẹn.’”
36 Ẹhi nọnsi Jehova da vae dọ gbono ikpia uli isẹn nyan egbọ enẹn nyan iyisẹn* an bhi eko ọsi ibhokhan Asiria. Ẹbho ki riọre ọsewewiẹ, ele da ke olinmhin nọnsele rebhe re bhi otọ. 37 Sẹnakẹrib nin ojie ọsi Asiria da ki fikie diọbhi Nenivẹ, yẹ debhi enin an. 38 Ẹghe nin ọle ki rẹ ha deuhọnmhọnre bhi aluẹbọ rẹ ga Nisrọk nin osẹ nọnsọle, Adramẹlẹk bi Shariza nin imikpia nesọle da re agbada gbe ọle a, yẹ nẹgbe diọbhi otọ ọsi Ararat. Bhiriọ, ọmọn nọnsọle nin Isahadọn da kiẹn ojie bhi ihe nọnsọle.