Ẹzaya
36 Bhi ukpe nọnzi 14 bhi ugbẹloghe ọsi Hẹzẹkaya, Sẹnakẹrib nin ojie ọsi Asiria da mun okhọn bu agbaẹbho kẹkẹ nesi Juda nan manman gbega, yẹ khọn ele miotọ. 2 Ojie ọsi Asiria da ki je Rabshakẹ* bi eyokhọnlẹn ne bunbun nin ele na bhi Lekish dọ bu Hẹzẹkaya nin ojie bhi Jerusalẹm. Ele ki sẹbhi enin, ele da mundia bhi eji olo-amẹn ye, nin amẹn nọn ribhi omin nọn ribhi obọ ọsi okhun ọlẹn rẹkhan, bhi uwedẹ nan na yo eji okpia nọn họ ukpọn da wẹnna. 3 Bhiriọ, Ẹliakim nin ọmọn nọnsi Hikaya nọn ha gbẹloghe uwa ọsi ọnojie, Shẹbna nin akọwe, bi Joah nin ọmọn nọnsi Esaf nọn gbẹn ebe sunu ọbhi otọ, da dagbare bu ọle re.
4 Bhiriọ, Rabshakẹ da taman ele yọle: “Huẹan, bha taman Hẹzẹkaya yọle, ‘Ọnan hi ebi ojie ọsi Asiria nin ojie nọn khua tale: “Be bhọ uwẹ mun udu tẹ? 5 Uwẹ yọle, ‘Mẹn mhọn emhanmhan bi ahu nin mẹn ha rẹ khọnlẹn.’ Sokpan, ọta ihoho enan gheghe khin. Họla uwẹ mun udu tẹ nin uwẹ da gbudu ha sọtẹ da mẹn? 6 Ghọle, uwẹ mun udu tẹ Ijipt nọn diabe ilunmhun nọn kaka a, nin ọria ha di egbe nyan, ọ ki so ọle bhi obọ. Iriọ Fero nin ojie ọsi Ijipt dia rẹji ọrebhe ne mun udu nyan ọlẹn. 7 Sẹyẹ, ahamiẹn uwẹ taman mẹn yọle, ‘Jehova nin Osẹnobulua nọnsẹmhan mhan mun udu tẹ,’ ọ i be yi eje yoyo nesọle bi ukhuo-izọese nesọle Hẹzẹkaya muno kie, yẹ taman Juda bi Jerusalẹm yọle, ‘odalo ọne ukhuo-izọese nan bha ha ki da ha deuhọnmhọnre’?”’ 8 Ejayenan nian, huẹan, deba ebeanlẹn mẹn nin ojie ọsi Asiria tine ọbhọ nan: Mẹn dẹ ne akasi uli eva* nin uwẹ sade uwẹ dẹ miẹn ene ha hẹn ele. 9 Beji a miẹn Ijipt uwẹ mun udu nyan nin ele muno awẹnẹwẹnẹ nin uwẹ, yẹ ne eyokhọnlẹn ne hẹn akasi nin uwẹ, be uwẹ ha ki rẹ sabọ khu gọvanọ* nọn khere nẹ fikie yẹ, bhi ẹwẹ gọvanọ ne yi eguọmhandia nesi ebeanlẹn mẹn? 10 Uwẹ be riale ghe, ọkhọ obọ mẹn imẹn rẹ mun okhọn vae bhi ọne otọ nan? Ọ i be yi Jehova je mẹn nin mẹn dọ dunmhun ọlẹn an? Jehova tobọle taman mẹn yọle, ‘Mun ọkhọn bu ọne agbaẹbho nan yẹ dunmhun ọlẹn an.’”
11 Bhiriọ, Ẹliakim, Shẹbna, bi Joah da taman ọne Rabshakẹ yọle: “Huẹan, noo urolo ọsi Aramaik* rẹ ne eguọmhandia nesẹ talọ ranmhude mhan họn ọne urolo. Hẹi noo urolo ọsi ibhokhan Ju rẹ ne mhan talọ, nin ẹbho ne ribhi okhun ogbe hẹi họn.” 12 Ọkpakinọn, Rabshakẹ da yọle: “Bha be riale ghe, ibha bi ebeanlẹn bha ọkpa ebeanlẹn mhẹn je mẹn bu nin mẹn dọ ta ene ẹmhọn nan man? A bha be yẹ je mẹn nin mẹn dọ taman ene ikpia ne dotua bhi okhun ogbe, nin bha bi ele ha le isọn nọnsẹbha yẹ wọn afe nọnsẹbha?”
13 Ẹghenin, Rabshakẹ da kpanọ mundia yẹ si urulu okhun rẹ re urolo ọsi ibhokhan Ju yọle: “Bha kaehọ ọta ọsi ojie ọsi Asiria nin ojie nọn khua. 14 Ọnan hi ebi ọnojie tale, ‘Bha hẹi ji Hẹzẹkaya hiẹ bha, ranmhude, ọle i da sabọ hinmhin bha. 15 Sẹyẹ, bha hẹi ji ebi Hẹzẹkaya ta re ibha mun udu nyan Jehova, nin ọle rẹ yọle: “Ebe ha zẹ Jehova bha hinmhin mhan i ribhọ. Sẹyẹ, a i da re otọ nin ojie ọsi Asiria rẹ khọn ọne agbaẹbho nan miotọ.” 16 Bha hẹi ka Hẹzẹkaya ehọ, ranmhude, ọnan hi ebi ojie ọsi Asiria tale: “Bha ji mhan ko re ẹmhọn i nọnsẹn, ibha ha yẹ deuhọnmhọnre nin mẹn. Bha ha lu iriọ, ọdeọde bhi ẹwẹ bha ki ha le bhi eran anyọn bi eran ifig nọnsọle, yẹ ha wọn amẹn bhi omin nọnsọle, 17 ọkuẹsẹ mẹn vae dọ ne bha ha khian otọ nọn diabe otọ nọnsẹbha, otọ nin ebale bi anyọn ọgbọn vuọnlẹn, otọ nan da miẹn emhin ugbo bi ugbo eran anyọn. 18 Bha hẹi ji Hẹzẹkaya hiẹ bha, ranmhude ọle gheghe yọle, ‘Jehova dẹ hinmhin mhan.’ Osẹ ọsi ene agbaẹbho soso sẹ be sabọ hinmhin ẹbho nesọle bhi obọ ojie ọsi Asiria? 19 Osẹ nesi Hemat bi Apad ki bho? Osẹ nesi Sẹfaveim ki bho? Ele be sabọ hinmhin Sameria bhi obọ nọnsẹmhẹn? 20 Họla bhi ẹwẹ osẹ ọsi ene agbaẹbho nan rebhe sẹ sabọ hinmhin ẹbho nesọle bhi obọ nọnsẹmhẹn, nin bha da ha riale ghe Jehova dẹ sabọ hinmhin Jerusalẹm bhi obọ nọnsẹmhẹn?”’”
21 Sokpan, ele da wo nyangbe, ele bha ta ukpọta soso rẹ wanniẹn ọlẹn, ranmhude ojie nọnsele taman ele yọle, “Bha hẹi wanniẹn ọlẹn.” 22 Ọkpakinọn, Ẹliakim nin ọmọn nọnsi Hikaya nọn ha gbẹloghe uwa ọsi ọnojie, Shẹbna nin akọwe, bi Joah nin ọmọn nọnsi Esaf nọn gbẹn ebe sunu ọbhi otọ, da nyanghan ukpọn nin ele ne yọ a ẹghe nin ele rẹ bu Hẹzẹkaya. Ele da taman ọlẹn ebi Rabshakẹ tale.