Ẹzaya
33 Ọkhọbhegbe hi ọsi uwẹ nọn gbono ẹbho a, sokpan, a bha sẹ gbe uwẹ a;
Uwẹ nọn hiẹ ẹbho, sokpan, a bha sẹ hiẹ uwẹ!
Uwẹ ha ki gbono ẹbho a fo, a ki gbe uwẹ a,
Uwẹ ha ki hiẹ ẹbho fo, a ki hiẹ uwẹ.
2 Eo Jehova, mhọn itohan da mhan.
Uwẹ mhan re udu ba.
Re obọ nọnsẹ rẹ ha re iyobọ nin mhan ọsewewiẹ-ọsewewiẹ,
Ehe, ha yi umiẹnfan nọnsẹmhan bhi ẹghe ọkakale.
3 Ẹbho ha họn ghe ẹbibi zẹ, ele ki nẹgbe.
Uwẹ ha munhẹn ha lu emhin, agbaẹbho kẹkẹ ki zagha a.
4 Beji iriso rẹ vẹ ru emhin, iriọ ẹbho ha rẹ vẹ ru emhin ne ghanlẹn nesẹ;
Ẹbho ki ha hulu ele beji usun iriso rẹ hulu emhin.
5 Jehova dẹ manman hẹn usi.
Eje yoyo bhi okhun ọle da nyẹnlẹn.
Ọle dẹ lu ọle nan ha bhuohiẹn nọn gbale bhi Zaiyọn, sẹyẹ, nan ha lu ebe gbale bhi ijerebhe bhọ.
6 Ọle hi ọnọn gbega iẹnlẹn* nọnsẹ,
Ọle hi ọnọn re umiẹnfan nọn khua re. Ọle hi ọnọn re ẹwanlẹn bi ilẹnmhin nin ọria, yẹ re ẹbho ha mun ofẹn Jehova.
Ọnan hi emhin nọn ghanlẹn nọnsọle.
7 Ghọle! ikpia ne mhọn izebhudu bhi ẹwẹ ele* viẹ bhi ughe;
Ene ukọ nan je ne dọ khu ọbhi ọfure wo ha viẹ.
8 Ene ukhuo fiahiẹ a;
Ọsoso i yẹ na ene ukhuo gbera.
9 Ọne otọ lu akhiẹ,* sẹyẹ, ọ bha yẹ ji a rẹ lu emhin soso.
Ẹkhọle lu Lẹbanọn, emhin ne ribhọ kaka a.
Sharọn diabe ugbenẹbubu,
Sẹyẹ, eran ne ribhi Beshan bi Kamẹl khakha ebe kua.
10 Jehova yọle, “Bhi ejayenan nian, mẹn dẹ lu emhin,
Mẹn dẹ re ahu nọnsẹmhẹn man;
Mẹn dẹ rẹman ghe Osẹ nọn khua men khin.
11 Ibha nin eria ebe, ebi bha mhanmhan bi ebi bha lu dẹ de ihoho a. Inian ele diabe ilunmhun ne kaka a, bi ene a gia kẹre bhi otọ.
Emhin ebe nin bha guẹle dẹ fuẹn bha a bọsi eranlẹn.
12 Sẹyẹ, ẹbho ki tuẹ a dọ diabe ẹmun.*
A ki kuẹ eranlẹn nyan ele nin ele tuẹ a, beji a rẹ tuẹ igbẹn nan gia kua.
13 Ibha ne ribhi eje reele, bha kaehọ ebi mẹn ha lu,
Ibha ne ribhi eje sire, bha daghe ahu nọnsẹmhẹn.
14 Ofẹn mun ene lu emhin ebe ne ribhi Zaiyọn;
Ene sọtẹ da Osẹnobulua guọ, ele yọle:
‘Họla bhi ẹwẹ mhan ha sabọ nyẹnlẹn bhi eji eranlẹn da manman to?
Sẹyẹ, họla bhi ẹwẹ mhan ha sabọ nyẹnlẹn bhi eji eranlẹn nọn i fun ye?’
15 Ọnọn wo lu emhin nọn khiale ẹghe rebhe,
Nọn ta ẹmhọanta, nọn i guanọ elele ọsi ohoghe bi elele ọsi eku,
Nọn i ka re obọ so ebi a re nanlẹn bhi ikeke,
Nọn i re ehọ ọbhi ẹmhọn ọsi ugbele,
Sẹyẹ, nọn gue ẹlo nọnsọle
Beji a ha da miẹn ọle bha daghe emhin ebe.
16 Ọle dẹ ha nyẹnlẹn bhi okhun oke;
Otọ udo-udo nọn i lẹkhẹ nan rẹ na i ọle da mhọn eji ọle da rẹko,
Ebale i da ha tuẹ ọle,
A i da miẹn ọle bha miẹn amẹn wọn.”
17 Ẹlo nọnsẹ dẹ daghe ojie nọn mhọn uyi,
Ọ dẹ daghe otọ nọn ribhi eje reele.
18 Uwẹ ki ha re ọkhọle muno emhin ne re ofẹn mun uwẹ yẹ ha nọọn egbe uwẹ yọle:
“Ọne akọwe ki bho?
Ọnọn ha ọne oko ki bho?
Sẹyẹ, ọnọn ka ene uwa ne yoyo ki bho?”
19 Uwẹ i da yẹ ha miẹn eria ne siegbe okhun,
Ẹbho nan i sabọ lẹn otọ urolo* nin ele zẹ,
Ẹbho nin ọta nọnsele diabe ọta ọsi ẹbho ne bẹmhọn, nan i sabọ lẹn otọ ebi ele ta.
20 Ghe Zaiyọn nin agbaẹbho nin mhan da lu iluemhin nesẹmhan!
Uwẹ dẹ daghe ọle ghe, eje fu nan da nyẹnlẹn Jerusalẹm khin,
Ibọkpọ nan i da mun sibhi eji ọ ye re.
Ẹghe i ribhọ nan ha rẹ banọn ene ise kie nan rẹ khan ọne ibọkpọ,
Sẹyẹ, a i da giagia uri nesọle soso a.
21 Bhi enin, Jehova Nin Osẹ Nọn Kpọnọ Nẹ ki ha gbega mhan,
Beji ẹdẹ bi eje bhiabhia nan zẹ nin amẹn nọn ribhi ẹdẹ ha nẹ na rẹ gbega agbaẹbho,
Nin okọ nan rẹ yo okhọn i sabọ na i,
Bi nin udede okọ i sabọ na gbera.
22 Ranmhude, Jehova hi Ọbhuohiẹn nọnsẹmhan.
Jehova hi Ọnọn re uhi nin mhan.
Jehova hi Ojie nọnsẹmhan.
Ọle hi Ọnọn ha hinmhin mhan.
23 Uri ọsi ene okọ ọsi eghian ele dẹ tanọn an;
Ọ i da sabọ mun eran* ọsi ọne okọ mhọnlẹn, la tan ukpọn* ọsi ọne okọ a.
Bhi ọne ẹghenin, ele ki gha emhin ne bunbun ọsi eghian ele,
Ene bunbun bhi ene emhin ki yẹ sẹ ene akhun obọ.
24 Sẹyẹ, ọria i ribhọ nọn nyẹnlẹn bhi enin nọn ha yọle: “Imẹn khọnmhọn.”
A dẹ gbo olukhọ ọsi ẹbho ne nyẹnlẹn bhi ọne otọ kua.